Нымӕцтӕ 36 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Бынтӕ ныууадзыны фӕтк

¹ Йосефы байзӕддӕгтӕ, Галаады, Менассиайы фырт Махиры фырты, хӕдзарвӕндӕгты хистӕртӕ ӕрбацыдысты. Моисей ӕмӕ фӕтӕгтӕн, израилаг хӕдзарвӕндӕгты хистӕртӕн

² загътой: «Дунедарӕг бафӕдзӕхста нӕ хицауӕн, цӕмӕй хӕлттӕм гӕсгӕ байуара зӕхх израилӕгтӕн; нӕ хицауӕн Дунедарӕгӕй фӕдзӕхст у уый дӕр, цӕмӕй не ’фсымӕр Цалфахады хай уымӕн йӕ чызджытӕн ратта.

³ Фӕлӕ уыдон ӕндӕр израилаг хӕдзарвӕндагмӕ куы смой кӕной, уӕд сӕ хай нӕ фыдӕлты хӕдзарвӕндаджы нал уыдзӕн; цы хӕдзарвӕндагмӕ смой кӕной, уыцы хӕдзарвӕндаджы хайыл бафтдзӕн, мах фыдӕлты хӕдзарвӕндаджы хай та фӕкъахыр уыдзӕн.

⁴ Израилӕгты ӕрдӕгсӕдӕйон аз куы ралӕууа, уӕд дӕр уыдоны хай, цы хӕдзарвӕндагмӕ смой кодтой, уымӕн баззайдзӕн, мах фыдӕлты хӕдзарвӕндаджы хай та фӕкъахыр уыдзӕн».

⁵ Ӕмӕ загъта Моисей израилӕгтӕн Дунедарӕджы амындӕй: «Рӕстытӕ дзурынц Йосефы байзӕддӕгтӕ.

⁶ Дунедарӕг Цалфахады чызджыты тыххӕй афтӕ бафӕдзӕхста, зӕгъгӕ, кӕй зӕрдӕмӕ фӕцӕуой, уыдонмӕ сӕ бон у смой кӕнын, фӕлӕ сын моймӕ цӕуӕн ис ӕрмӕст сӕхи фыды хӕдзарвӕндагмӕ.

⁷ Цӕмӕй хай иу израилаг хӕдзарвӕндагӕй иннӕмӕ ма цӕуа, уымӕн ӕмӕ алы израилаг дӕр хъуамӕ йӕ фыдӕлты хӕдзарвӕндаджы хайыл фидар хӕца.

⁸ Хай кӕмӕн баззади, уыцы быны чызг та мой хъуамӕ скӕна йӕхи фыды хӕдзарвӕндагмӕ, цӕмӕй израилӕгтӕй алкӕмӕн дӕр йӕ фыдӕлты хай йӕхицӕн баззайа,

⁹ цӕмӕй хай иу хӕдзарвӕндагӕй иннӕмӕ ма цӕуа, уымӕн ӕмӕ алы израилаг дӕр хъуамӕ йӕ фыдӕлты хӕдзарвӕндаджы хайыл баст уа».

¹⁰ Дунедарӕг Моисейӕн куыд загъта, афтӕ бакодтой Цалфахады чызджытӕ.

¹¹ Махла, Тирца, Хогла, Милка ӕмӕ Ноа смой кодтой сӕ фыды ’фсымӕрты лӕппутӕм.

¹² Йосефы фырт Менассиайы хӕдзарвӕндаджы чындзытӕ баисты, ӕмӕ сӕ хай сӕхи фыды хӕдзарвӕндагӕн баззади.

¹³ Ахӕм фӕтк ӕмӕ ӕгъдӕуттӕ ныффӕдзӕхста Дунедарӕг израилӕгтӕн, ӕмӕ сын сӕ Моисей фехъусын кодта Моавы быдырты, Иорданы цур, Йерихоны бакомкоммӕ.