Нымӕцтӕ 35 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Левитты аст ӕмӕ дыууиссӕдз сахары

¹ Ӕмӕ загъта Дунедарӕг Моисейӕн Моавы быдырты, Иорданы раз, Йерихоны бакомкоммӕ:

² «Зӕгъ израилӕгтӕн, цӕмӕй сӕ исбоны хӕйттӕй левиттӕн сахартӕ раттой цӕрынӕн, ӕмӕ сын уыцы сахарты алфамбылай быдыртӕ дӕр раттут.

³ Сахартӕ сын цӕрынӕн уыдзысты, быдыртӕ та — сӕ фосӕн ӕмӕ сӕ царды алы хабӕрттӕн.

⁴ Левиттӕн сахарты алыварс цы быдыртӕ дӕттут, уыдон сахары сисы ӕдде алырдӕм дӕр хъуамӕ уой мингай ӕлмӕринтӕ.

⁵ Рабарут фӕссахар дыууӕ мин ӕлмӕрины скӕсӕнӕрдӕм, хуссарӕрдӕм дӕр — дыууӕ ӕлмӕрины, ныгуылӕнӕрдӕм дӕр — дыууӕ ӕлмӕрины, цӕгатӕрдӕм дӕр — дыууӕ ӕлмӕрины, сахар та — астӕуӕй. Уыдон уыдзысты хизӕн быдыртӕ сӕ сахарты алыварс.

⁶ Левиттӕн кӕй раттат, уыцы сахартӕй ӕхсӕз ӕмбӕхсӕндонӕн рахицӕн кӕндзыстут, цӕмӕй-иу лӕгмар уырдӕм алидза; уыдоны ӕдде ма сын раттут ноджы дыууӕ ӕмӕ дыууиссӕдз сахары.

⁷ Левиттӕн ӕд быдыртӕ кӕй ратдзыстут, уыцы сахартӕ ӕдӕппӕтӕй — аст ӕмӕ дыууиссӕдз.

⁸ Израилӕгты исбонӕй куы дӕттат левиттӕн сахартӕ, уӕд, фылдӕр кӕмӕ ис, уымӕй фылдӕр исут, къаддӕр кӕмӕ ис, уымӕй — къаддӕр. Алчи йӕ хаймӕ гӕсгӕ хъуамӕ ратта йӕ сахартӕй левиттӕн».

⁹ Ӕмӕ Дунедарӕг загъта Моисейӕн:

¹⁰ «Фӕдзур израилӕгтӕм ӕмӕ сын зӕгъ: Иорданыл куы ахизат Ханааны бӕстӕм,

¹¹ уӕд уӕхицӕн ӕмбӕхсӕн сахартӕ снысан кӕнут, ӕмӕ-иу ӕнӕбары чи фӕтуджджын ис, уый йӕ сӕр уым бафснайдзӕн.

¹² Ӕмӕ уын уыдзысты уыцы сахартӕ, йӕ туг чи агуры, уымӕй хи ӕмбӕхсынӕн, цӕмӕй туджджын ма фӕмард уа дзыллӕйы тӕрхоны размӕ.

¹³ Цы сахартӕ раттат, уыдонӕй ӕхсӕз хъуамӕ уой ӕмбӕхсӕндӕттӕ.

¹⁴ Ӕртӕ сахары раттут Иорданӕн йӕ ацы фарс, ӕртӕ сахары та — Ханааны зӕххыл: ӕмбӕхсӕндонӕн уын уыдзысты уыцы сахартӕ.

¹⁵ Израилӕгтӕн дӕр ӕмӕ се ’хсӕн цӕрӕг ӕрцӕуӕггӕгтӕн дӕр уыцы ӕхсӕз сахары ӕмбӕхсӕндон уыдзысты, цӕмӕй уырдӕм алидзын йӕ бон уа, ӕнӕбары искӕй чи амардта, уыдонӕй алкӕмӕн дӕр.

¹⁶ Исчи ӕфсӕйнагӕй искӕй ныццавта, зӕгъгӕ, ӕмӕ йӕ амардта, уӕд ныццӕвӕг у марӕг; марӕгӕн ӕнӕ амаргӕ нӕй.

¹⁷ Амарӕн кӕмӕй ис, ахӕм дурӕй искӕй чи ныццӕва ӕмӕ амара, уый марӕг у; марӕгӕн ӕнӕ амаргӕ нӕй.

¹⁸ Амарӕн кӕмӕй ис, ахӕм хъӕдын дзаумайӕ искӕй чи ныццӕва ӕмӕ амара, уый марӕг у; марӕгӕн ӕнӕ амаргӕ нӕй.

¹⁹ Кӕмфӕнды йыл куы бамбӕла, уӕддӕр тугисӕгӕн йӕ бон у марӕджы амарын.

²⁰ Фыддӕрагӕн искӕй чи асхойа кӕнӕ йыл барӕй исты чи фӕкӕна ӕмӕ амара;

²¹ йӕ фыдзӕрдӕйӕ искӕй чи ныццӕва ӕмӕ амара, уымӕн ӕнӕ амаргӕ нӕй — марӕг у; тугисӕгӕн йӕ бон у, кӕм ыл бамбӕла, марӕджы уым амарын.

²² Фӕлӕ ӕнӕбары, ӕвзӕр зӕрдӕ йӕм нӕ дардта, афтӕмӕй искӕй чи асхойа, ӕнӕбары йыл исты дзаума куы фехса

²³ кӕнӕ, амарӕн кӕмӕй ис, ахӕм дур ыл ӕнӕбары куы ӕрӕппара ӕмӕ амара, йе знаг нӕ уыд ӕмӕ йӕ уымӕн фыд ракӕнын нӕ фӕндыд, афтӕмӕй,

²⁴ уӕд дзыллӕ мӕнӕ ацы ӕгъдӕуттӕм гӕсгӕ хъуамӕ равзарой марӕг ӕмӕ тугисӕджы хъуыддаг.

²⁵ Дзыллӕ хъуамӕ марӕджы фервӕзын кӕной тугисӕджы къухӕй ӕмӕ йӕ, кӕдӕм алыгъди, йӕ уыцы ӕмбӕхсӕн сахарыл фӕстӕмӕ сӕмбӕлын кӕной. Цӕрӕд уым уаз сойӕ сӕрст хистӕр сауджыны амӕлӕтмӕ.

²⁶ Марӕг, кӕдӕм алыгъди, йӕ уыцы ӕмбӕхсӕн сахарӕй куы рацӕуа

²⁷ ӕмӕ йыл сахары ӕдде йӕ туджджын куы бамбӕла ӕмӕ йӕ куы амара, уӕд йӕ тугныккалды аххосджын нӕ уыдзӕн.

²⁸ Уымӕн ӕмӕ хистӕр сауджыны амӕлӕтмӕ уый хъуамӕ йе ’мбӕхсӕн сахары лӕууыдаид, стыр сауджыны амӕлӕты фӕстӕ та йӕ уӕзӕгмӕ ӕрбаздӕхтаид.

²⁹ Уый уын, кӕмдӕриддӕр цӕрат, ӕгъдауӕн ныффидар уыдзӕн фӕлтӕрӕй фӕлтӕрмӕ.

³⁰ Лӕг чидӕриддӕр амара — ӕвдисӕнты ныхасмӕ гӕсгӕ маргӕ у ахӕм марӕг, фӕлӕ иунӕг ӕвдисӕны ныхасӕй адӕймагӕн мӕлӕты тӕрхон рахӕссӕн нӕй.

³¹ Марӕджы балхӕныны ныхмӕ ахӕстаргъ ма исут. Уый ӕнӕмӕнг амарын хъӕуы.

³² Ӕмбӕхсӕн сахары чи бамбӕхсти, уый ныхмӕ дӕр ахӕстаргъ ма исут, цӕмӕй хистӕр сауджыны амӕлӕтӕй раздӕр йӕ уӕзӕгмӕ ма ӕрбаздӕха.

³³ Цы зӕххыл ӕрбынат кодтат, уый ма фӕчъизи кӕнут, уымӕн ӕмӕ зӕхх тугӕй фӕчъизи вӕййы, ӕмӕ йын, искӕй туг чи ныккалдта, ӕрмӕстдӕр уымӕн йӕхи тугӕй ис ссыгъдӕг кӕнӕн.

³⁴ Нӕй фӕчъизи кӕнӕн, кӕм цӕрут ӕмӕ Ӕз кӕм ӕрбынат кодтон, уыцы бӕстӕн, уымӕн ӕмӕ Ӕз, Дунедарӕг, израилӕгты ’хсӕн цӕрын».