Нымӕцтӕ 30 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Моисей израилӕгтӕн рафӕзмыдта, Дунедарӕг ын цы бафӕдзӕхста, уыдӕттӕ.

² Моисей израилаг хӕдзарвӕндӕгты хистӕртӕн загъта: «Мӕнӕ цы фӕдзӕхсы Дунедарӕг:

³ „Исчи Дунедарӕгӕн сомы куы ракӕна кӕнӕ истӕмӕй йӕхицӕн тобӕ куы зӕгъа, уӕд хъуамӕ йӕ дзырд ма фӕсайа, цыдӕриддӕр загъта, уый сӕххӕст кӕна.

⁴ Сылгоймаг йӕ фыды хӕдзары, мойгонд нӕма у, афтӕмӕй Дунедарӕгӕн ард куы бахӕра кӕнӕ истӕмӕй йӕхицӕн тобӕ куы зӕгъа

⁵ ӕмӕ йын йӕ фыд йӕ ардбахӕрд кӕнӕ йӕ тобӕ куы фехъуса ӕмӕ куы ницы зӕгъа, уӕд сылгоймагӕн йӕ ардбахӕрд дӕр фидар уыдзӕн ӕмӕ йӕ тобӕ дӕр.

⁶ Фыд ӕй куы фехъуса ӕмӕ йӕ ныхмӕ куы рацӕуа, уӕд та йӕ ардбахӕрд ӕмӕ йӕ тобӕ ӕцӕг нӕ уыдзысты. Дунедарӕг ын ныххатыр кӕндзӕн, уымӕн ӕмӕ йын йӕ фыд бар нӕ радта.

⁷ Чындзы фӕцӕугӕйӕ, ардбахӕрдтӕ ӕмӕ ӕнӕрхъуыды сомытӕй баст кӕй у,

⁸ уый йӕ сӕрыхицау куы базона ӕмӕ куы ницы зӕгъа, уӕд сылгоймагӕн йӕ ардбахӕрд дӕр ӕмӕ йӕ тобӕ дӕр фидар сты.

⁹ Йӕ сӕрыхицау ӕй куы базона ӕмӕ йӕ ныхмӕ куы рацӕуа, уӕд та йын мӕнг сты. Дунедарӕг ын ныххатыр кӕндзӕн.

¹⁰ Идӕдз кӕнӕ йӕ лӕгӕй хицӕн сылгоймаджы ардбахӕрд та йӕ хъару нӕ сафы.

¹¹ Кӕд ӕмӕ йӕ лӕджы хӕдзары бахордта ард ӕмӕ цӕмӕйдӕр, сомы ракӕнгӕйӕ, йӕхицӕн тобӕ загъта,

¹² йӕ сӕрыхицау та йӕ фехъуыста ӕмӕ ницы загъта, йӕ ныхмӕ нӕ рацыд, уӕд ӕцӕг у йӕ ардбахӕрд, ӕцӕг у йӕ алы тобӕ дӕр.

¹³ Фӕлӕ йын сӕ йӕ сӕрыхицау куы базона ӕмӕ ныхмӕ куы рацӕуа, уӕд йӕ ардбахӕрд ӕмӕ йӕ тобӕтӕ ӕцӕг нӕ уыдзысты: йӕ сӕрыхицау сӕ фӕмӕнг кодта, ӕмӕ йын Дунедарӕг ныххатыр кӕндзӕн.

¹⁴ Сылгоймагӕн йӕ цыфӕнды ардбахӕрд дӕр ӕмӕ тобӕ дӕр хъуамӕ йӕ сӕрыхицау сфидар кӕнӕ фӕмӕнг кӕна.

¹⁵ Фӕлӕ йӕ сӕрыхицау дыккаг бонмӕ йӕхи куы ныхъхъус кӕна, уӕд ын уымӕй йӕ ардбахӕрдтӕ ӕмӕ йӕ тобӕтӕ сфидар кодта, уымӕн ӕмӕ сӕ куы фехъуыста, уӕд уыцы бон ницы загъта.

¹⁶ Куы сӕ фехъуса, уымӕй сӕ цасдӕр рӕстӕджы фӕстӕ куы аива, уӕд та йӕ бӕсты тӕригъӕд бафиддзӕн“».

¹⁷ Уыдон — Дунедарӕг Моисейӕн кӕй бафӕдзӕхста, уыцы ӕгъдӕуттӕ, лӕг ӕмӕ усӕн, фыд ӕмӕ йе ’рыгон чызджы ’хсӕн, цалынмӕ мойгонд нӕма у ӕмӕ йӕ фыды хӕдзары ис, уӕдмӕ.