Нымӕцтӕ 29 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Ӕвдӕм мӕйы фыццаг бон та уын уӕд уазӕмбырд, мацы куыст кӕнут, уыцы бон-иу сыкъауадындзты уасын хъуысӕд.

² Акусарт-иу кӕнут иууылсудзинаг нывонд, Дунедарӕгӕн ӕхцон хӕрздӕфӕн: иу уӕныг, иу фыр, авд фыргуисты — ӕнӕсахъат куыд уой, афтӕ.

³ Семӕ сойхӕццӕ ӕвзаргӕ мӕнӕуы ссадӕй хуымилиаг: ефӕйы ӕртӕ дӕсӕймаджы — уӕныгӕн, дыууӕ дӕсӕймаджы — фырӕн,

⁴ иу дӕсӕймаг — авд уӕрыккӕй алкӕмӕн дӕр.

⁵ Иу цӕу та ма — тӕригъӕды нывондӕн, уӕ тӕригъӕдтӕ ссыгъдӕг кӕныны охыл.

⁶ Мӕйноджы ӕмӕ ӕрвылбоны иууылсудзинаг нывӕндтӕй уӕлдай ма, сӕ хуымилиаг ӕмӕ, ӕгъдау кӕй домы, уыцы сӕнимӕ, ацы нывӕндтӕ дӕр хӕссын хъӕуы Дунедарӕгӕн. Уый у арты нывонд, ӕхцон хӕрздӕф Дунедарӕгӕн.

⁷ Уыцы мӕйы дӕсӕм бон та уын уӕд уазӕмбырд; ком-иу дарут ӕмӕ-иу мацы бакусут.

⁸ Иууылсудзинаг нывонд-иу ӕрхӕссут Дунедарӕгӕн ӕхцон хӕрздӕфӕн: иу уӕныг, иу фыр ӕмӕ авд фыргуисты, ӕнӕсахъат куыд уой, афтӕ.

⁹ Семӕ — сойхӕццӕ ӕвзаргӕ мӕнӕуы ссадӕй хуымилиаг: ефӕйы ӕртӕ дӕсӕймаджы — уӕныгӕн, дыууӕ дӕсӕймаджы — фырӕн,

¹⁰ иу дӕсӕймаг хай та — авд уӕрыккӕй алкӕцыйӕн дӕр.

¹¹ Иу цӕу — тӕригъӕды нывондӕн, ссыгъдӕджы охыл тӕригъӕды нывонд ӕмӕ ӕрвылбоны иууылсудзинаг нывондӕй уӕлдай, сӕ хуымилиаг ӕмӕ сӕнимӕ.

¹² Ӕвдӕм мӕйы фынддӕсӕм бон уын уӕд уазӕмбырд, мацы-иу бакусут. Дунедарӕджы бӕрӕгбон авд боны дӕргъы бӕрӕг кӕнут

¹³ ӕмӕ-иу иууылсудзинагӕн, арты нывондӕн, Дунедарӕгӕн ӕхцон хӕрздӕфӕн, акусарт кӕнут ӕртындӕс уӕныджы, дыууӕ фыры ӕмӕ цыппӕрдӕс нӕлгуисты, ӕнӕсахъат куыд уой, афтӕ.

¹⁴ Семӕ сойхӕццӕ ӕвзаргӕ мӕнӕуы ссадӕй хуымилиаг: ефӕйы ӕртӕ дӕсӕймаджы — ӕртындӕс уӕныгӕй алкӕцыйӕн дӕр, фӕйнӕ дыууӕ дӕсӕймаджы — дыууӕ фырӕн,

¹⁵ иу дӕсӕймаг — цыппӕрдӕс уӕрыккӕй алкӕцыйӕн дӕр.

¹⁶ Иу сӕгъ та — тӕригъӕды нывондӕн, ӕрвылбон цы иууылсудзинаг нывонд ӕд хуымилиаг ӕмӕ сӕн ӕрхӕссут, уымӕй уӕлдай.

¹⁷ Дыккаг бон та — дыууадӕс уӕныджы, дыууӕ фыры, цыппӕрдӕс фыргуисты, ӕнӕсахъат куыд уой, афтӕ.

¹⁸ Семӕ хуымилиаг ӕмӕ сӕн — уӕнгуытӕ, фырытӕ ӕмӕ уӕрыччытӕн сӕ нымӕцмӕ гӕсгӕ, ӕгъдау куыд домы, афтӕ.

¹⁹ Иу сӕгъ та — тӕригъӕды нывондӕн, ӕрвылбон хуымилиаг ӕмӕ сӕнимӕ цы иууылсудзинаг нывонд ӕрхӕссут, уымӕй уӕлдай.

²⁰ Ӕртыккаг бон — иуӕндӕс уӕныджы, дыууӕ фыры, цыппӕрдӕс фыргуисты, ӕнӕсахъат куыд уой, афтӕ.

²¹ Семӕ — хуымилиаг ӕмӕ сӕн — уӕнгуытӕ, фырытӕ ӕмӕ уӕрыччытӕн сӕ нымӕцмӕ гӕсгӕ, ӕгъдау куыд домы, афтӕ.

²² Ӕмӕ иу сӕгъ — тӕригъӕды нывондӕн, ӕрвылбон хуымилиаг ӕмӕ сӕнимӕ цы иууылсудзинаг нывонд ӕрхӕссут, уымӕй уӕлдай.

²³ Цыппӕрӕм бон — дӕс уӕныджы, дыууӕ фыры, цыппӕрдӕс фыргуисты, ӕнӕсахъат куыд уой, афтӕ.

²⁴ Семӕ хуымилиаг ӕмӕ сӕн — уӕнгуытӕ, фырытӕ ӕмӕ уӕрыччытӕн сӕ нымӕцмӕ гӕсгӕ, ӕгъдау куыд домы, афтӕ.

²⁵ Иу сӕгъ та — тӕригъӕды нывондӕн, ӕрвылбон хуымилиаг ӕмӕ сӕнимӕ цы иууылсудзинаг нывонд ӕрхӕссут, уымӕй уӕлдай.

²⁶ Фӕндзӕм бон — фараст уӕныджы, дыууӕ фыры, цыппӕрдӕс нӕлгуисты, ӕнӕсахъат куыд уой, афтӕ.

²⁷ Семӕ — хуымилиаг ӕмӕ сӕн — уӕнгуытӕ, фырытӕ ӕмӕ уӕрыччытӕн сӕ нымӕцмӕ гӕсгӕ, ӕгъдау куыд домы, афтӕ.

²⁸ Иу сӕгъ та — тӕригъӕды нывондӕн, ӕрвылбон цы иууылсудзинаг нывонд ӕрхӕссут, хуымилиаг ӕмӕ сӕнимӕ, уымӕй уӕлдай.

²⁹ Ӕхсӕзӕм бон — аст уӕныджы, дыууӕ фыры, цыппӕрдӕс фыргуисты, ӕнӕсахъат куыд уой, афтӕ.

³⁰ Семӕ хуымилиаг ӕмӕ сӕн — уӕнгуытӕ, фырытӕ ӕмӕ уӕрыччытӕн сӕ нымӕцмӕ гӕсгӕ, ӕгъдау куыд домы, афтӕ.

³¹ Иу сӕгъ та — тӕригъӕды нывондӕн, ӕрвылбон цы иууылсудзинаг нывонд ӕрхӕссут, хуымилиаг ӕмӕ сӕнимӕ, уымӕй уӕлдай.

³² Ӕвдӕм бон — авд уӕныджы, дыууӕ фыры, цыппӕрдӕс фыргуисты, ӕнӕсахъат куыд уой, афтӕ.

³³ Семӕ — хуымилиаг ӕмӕ сӕн — уӕнгуытӕ, фырытӕ ӕмӕ уӕрыччытӕн сӕ нымӕцмӕ гӕсгӕ, ӕгъдау куыд домы, афтӕ.

³⁴ Иу сӕгъ та — тӕригъӕды нывондӕн, ӕрвылбон цы иууылсудзинаг нывонд ӕрхӕссут, хуымилиаг ӕмӕ сӕнимӕ, уымӕй уӕлдай.

³⁵ Ӕстӕм бон уын уӕд уазӕмбырд; мацы куыст кӕнут.

³⁶ Ӕмӕ-иу иууылсудзинагӕн, арты нывондӕн, Дунедарӕгӕн ӕхцон хӕрздӕфӕн, акусарт кӕнут иу уӕныг, иу фыр, авд фыргуисты, ӕнӕсахъат куыд уой, афтӕ.

³⁷ Семӕ хуымилиаг ӕмӕ сӕн — уӕныг, фыр ӕмӕ уӕрыччытӕн сӕ нымӕцмӕ гӕсгӕ, ӕгъдау куыд домы, афтӕ.

³⁸ Иу сӕгъ та — тӕригъӕды нывондӕн, ӕрвылбон цы иууылсудзинаг нывонд хӕссут, хуымилиаг ӕмӕ сӕнимӕ, уымӕй уӕлдай.

³⁹ Дунедарӕгӕн ӕппӕт уыцы нывӕндтӕ хӕссут нысангонд бонты, сомы бакӕнгӕйӕ кӕнӕ Йын барвӕндонӕй ӕд хуымилиаг ӕмӕ сӕн цы иууылсудзинӕгтӕ ӕмӕ нывӕндтӕ хӕссут, уыдонӕй уӕлдай».