Нымӕцтӕ 27 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Цалфахады чызджытӕ

¹ Хеферы фырт Цалфахады (Хефер — Галаады фырт, Галаад — Махиры фырт, Махир — хӕдзарвӕндаджы хистӕр Менассиайы фырт, Менассиа — Йосефы фырт) чызджытӕ — Махла, Ноа, Хогла, Милка ӕмӕ Тирца —

² бацыдысты Моисей ӕмӕ сауджын Елеазар, фӕтӕгтӕ ӕмӕ ӕппӕт дзыллӕйы цурмӕ, Фембӕлды Цатыры размӕ, ӕмӕ загътой:

³ «Нӕ фыд амард ӕдзӕрӕг быдыры, ӕмӕ уый, Дунедарӕджы ныхмӕ чи растад, уыцы бардзы нӕ уыди Корахы цӕдисонты ’хсӕн, фӕлӕ амард йӕхи тӕригъӕды аххосӕй, ӕмӕ йын фырттӕ нӕ баззад.

⁴ Фырт ын кӕй нӕй, уый тыххӕй цӕмӕн хъуамӕ фесӕфа нӕ фыды ном йӕ мыггагӕй? Хай нын скӕн нӕ фыды ’фсымӕрты ’хсӕн».

⁵ Ӕмӕ сын Моисей сӕ хъуыддаг Дунедарӕджы раз бавдыста.

⁶ Ӕмӕ загъта Дунедарӕг Моисейӕн:

⁷ «Раст зӕгъынц Цалфахады чызджытӕ. Скӕн сын хай сӕ фыды ’фсымӕрты ’хсӕн ӕмӕ сын сӕ фыды хай ратт.

⁸ Израилӕгтӕн та зӕгъ афтӕ: лӕг амарди ӕмӕ йӕ фӕдыл фырт нӕй, зӕгъгӕ, уӕд-иу ын йӕ зӕххы хай раттут йӕ чызгӕн.

⁹ Чызг ын нӕй, зӕгъгӕ, уӕд та йын йӕ хай раттут йе ’фсымӕртӕн.

¹⁰ Ӕфсымӕртӕ йын нӕй, зӕгъгӕ, уӕд-иу ын йӕ хай раттут йӕ фыды ’фсымӕртӕн.

¹¹ Фыды ’фсымӕртӕ йын куынӕ уа, уӕд-иу ын йӕ хай раттут, йӕ хӕдзарвӕндагӕй йӕм ӕввахсдӕр чи у, уыцы хионӕн. Уый израилӕгтӕн баззайӕд ӕгъдауӕн, Дунедарӕг Моисейӕн куыд загъта, афтӕ».

Йешуа — Моисейы фӕдон

¹² Ӕмӕ загъта Дунедарӕг Моисейӕн: «Мӕнӕ Аваримы хохмӕ ссу ӕмӕ, израилӕгтӕн цы зӕхх радтон, уымӕ акӕс.

¹³ Ӕмӕ йӕм куы акӕсай, уӕд ды дӕр дӕ адӕмы ’хсӕнӕй фӕхъӕудзынӕ, де ’фсымӕр Аарон куыд фӕхъуыди, афтӕ.

¹⁴ Уымӕн ӕмӕ сымах Мӕ ныхасмӕ нӕ байхъуыстат Цины ӕдзӕрӕг быдыры, адӕм куы сызмӕстой, уӕд: цӕмӕй уыдон, Ӕз уаз кӕй дӕн, уый сӕхи цӕстӕй феной, уыцы суадоны был». (Уыцы суадон уыди Меривайы, Кадешы, Цины ӕдзӕрӕг быдыры.)

¹⁵ Ӕмӕ загъта Моисей Дунедарӕгӕн:

¹⁶ «Дунедарӕг, ӕппӕт цӕрӕг удтӕн царды комулӕфт дӕттӕг Хуыцау, ацы дзыллӕйӕн сӕ сӕргъы ахӕм адӕймаджы сӕвӕрӕд,

¹⁷ балцы цӕугӕйӕ дӕр ӕмӕ фӕстӕмӕ здӕхгӕйӕ дӕр сӕ разӕй чи цӕуа, йӕ фӕдыл кӕнын сӕ йӕ бон кӕмӕн уа ӕмӕ-иу сӕ фӕстӕмӕ дӕр чи ’рбакӕна, цӕмӕй Дунедарӕджы дзыллӕ ӕнӕфыййау дзуджы хуызӕн ма уа».

¹⁸ Ӕмӕ загъта Дунедарӕг Моисейӕн: «Райс дӕхимӕ Нуны фырт Йешуайы, Хуыцауы Удӕй хайджын чи у, уыцы адӕймаджы, ӕмӕ йыл дӕ къух ӕрӕвӕр.

¹⁹ Ӕрлӕууын ӕй кӕн сауджын Елеазар ӕмӕ ӕппӕт дзыллӕйы раз, сбарджын ӕй кӕн сӕ разы.

²⁰ Дӕ кадӕй йӕ скадджын кӕн, цӕмӕй йӕм израилӕгты дзыллӕ иууылдӕр хъусой.

²¹ Ӕмӕ-иу бацӕуӕд уый сауджын Елеазары размӕ, цӕмӕй йын уый уримы фӕрцы Дунедарӕджы бафӕрса. Дунедарӕджы ныхасмӕ гӕсгӕ цӕудзысты фӕндагыл, Дунедарӕджы ныхасмӕ гӕсгӕ здӕхдзысты фӕстӕмӕ — Йешуа ӕмӕ ӕппӕт израилӕгтӕ, ӕгас дзыллӕ».

²² Бакодта Моисей, Дунедарӕг ын куыд загъта, афтӕ: Йешуайы сауджын Елеазар ӕмӕ ӕппӕт дзыллӕйы раз ӕрлӕууын кодта,

²³ йӕ арм ыл ӕрӕвӕрдта ӕмӕ йӕ ӕххӕстбарджын скодта, Дунедарӕг Моисейы уылты куыд бафӕдзӕхста, афтӕ.