Нымӕцтӕ 22 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Балак ӕххуысмӕ сиды Балааммӕ

¹ Уырдыгӕй израилӕгтӕ сӕ фӕндаг дарддӕр кодтой ӕмӕ Моавы дӕлвӕзы, Иорданы фале, Йерихонмӕ хӕстӕг ӕрлӕууыдысты.

² Федта Балак, Ципоры фырт, Израил аморӕгтӕн цытӕ бакодта, уый.

³ Израилӕгтӕ уый бӕрц уыдысты, ӕмӕ моавӕгтӕ иууылдӕр тасы бацыдысты.

⁴ Ӕмӕ загътой моавӕгтӕ Мидианы хистӕртӕн: «Ацы бардз, гал быдыры кӕрдӕг куыд асӕрфы, афтӕ асӕрфдзӕн алцы нӕ алывӕрсты». Балак та, Ципоры фырт, уӕд Моавы паддзах уыд.

Хатджыты фыццаг балц Балааммӕ

⁵ Ӕмӕ Балак минӕвӕрттӕ арвыста Балааммӕ, Беоры фыртмӕ, йӕ райгуырӕн Петормӕ (аммонӕгты зӕххыл ис, Евфраты был), цӕмӕй йын йӕ номӕй зӕгъой: «Иу адӕм рацыди Мысырӕй. Уый бӕрц сты, ӕмӕ зӕххӕн уӕз кӕнынц. Мӕ разы ӕрбынат кодтой.

⁶ Ӕвӕстиатӕй мӕм рацу ӕмӕ мын фелгъит уыцы адӕмы, уымӕн ӕмӕ уыдон мӕнӕй тыхджындӕр сты. Чи зоны, ӕмӕ мын сӕ афтӕмӕй басӕттын ӕмӕ мӕ зӕххӕй атӕрын бантысид, уымӕн ӕмӕ зонын: ды арфӕ кӕмӕн ракӕнай, уый арфӕгонд у, ды кӕй фелгъитай, уый — ӕлгъыст».

⁷ Ацыдысты Моав ӕмӕ Мидианы хистӕртӕ. Балаамӕн мызд ахастой дӕсныфӕрсӕггаг ӕмӕ йын Балакы ныхӕстӕ рафӕзмыдтой.

⁸ Уый сын загъта: «Ацы ӕхсӕв ам лӕуут, ӕмӕ уын ӕз, Дунедарӕг мын цы зӕгъа, уый зӕгъдзынӕн». Ӕмӕ бахсӕвиуат кодтой Моавы уӕздӕттӕ Балааммӕ.

⁹ Рацыди Хуыцау Балааммӕ ӕмӕ бафарста: «Чи дын сты ацы адӕм?»

¹⁰ Ӕмӕ загъта Хуыцауӕн Балаам: «Балак, Ципоры фырт, Моавы паддзах, ӕрбарвыста мӕм,

¹¹ мӕнӕ, дам, Мысырӕй рацӕуӕг адӕм зӕххӕн уӕз кӕнынц, ӕмӕ рацу, фелгъит мын сӕ, кӕд семӕ схӕцын мӕ бон суаид ӕмӕ сӕ атӕрин!»

¹² Ӕмӕ загъта Хуыцау Балаамӕн: «Ма ацу семӕ; ма фелгъит уыцы адӕмы, уымӕн ӕмӕ арфӕгонд сты».

¹³ Ӕмӕ сыстад Балаам сӕумӕрайсом ӕмӕ загъта Балакы уӕздӕттӕн: «Цӕут уӕ бӕстӕм, уымӕн ӕмӕ Дунедарӕджы нӕ фӕнды, цӕмӕй ӕз уемӕ ацӕуон».

¹⁴ Ӕмӕ сыстадысты Моавы уӕздӕттӕ, Балакмӕ аздӕхтысты ӕмӕ йын загътой: «Нӕ бакуымдта Балаам махимӕ рацӕуын».

Хатджыты дыккаг балц Балааммӕ

¹⁵ Фервыста та Балак ногӕй йӕ уӕздӕтты, ӕмӕ уыдон фыццӕгтӕй ноджы фылдӕр ӕмӕ дзырддзӕугӕдӕр уыдысты.

¹⁶ Ӕмӕ бацыдысты уыдон Балааммӕ ӕмӕ йын загътой: «Ципоры фырт Балак дӕм ӕрвиты: „Саккаг кӕн, ӕрбацу мӕм.

¹⁷ Тынг дӕ скадджын кӕндзынӕн, цыдӕриддӕр мын зӕгъай, уый бакӕндзынӕн. Рацу ӕмӕ мын уыцы адӕмы ралгъит“».

¹⁸ Балаам загъта Балакы дӕлдӕртӕн: «Балак мын йӕ хӕдзар куы ратта, сыгъзӕрин ӕмӕ ӕвзистӕй йемыдзагӕй, уӕд дӕр мӕ бон нӕ бауыдзӕн Дунедарӕджы, мӕ Хуыцауы, ныхасы сӕрты ахизын, Йе ’вастӕй чысыл кӕнӕ стыр исты саразын.

¹⁹ Ныр та уал ацы ӕхсӕв сымах дӕр ам баззайут, ӕмӕ ӕз базонон, Дунедарӕг ма мын цы зӕгъдзӕн, уый».

²⁰ Ӕмӕ рацыди Дунедарӕг Балааммӕ ӕхсӕвы ӕмӕ йын загъта: «Кӕд дӕм ацы адӕм хонӕг ӕрбацыдысты, уӕд сыст ӕмӕ ацу семӕ, фӕлӕ дын Ӕз цы зӕгъон, ӕрмӕстдӕр уый кӕн».

Балаамы хӕрӕг

²¹ Ӕмӕ сыстад Балаам сӕумӕрайсом, йӕ сыл хӕрӕгыл саргъ сӕвӕрдта ӕмӕ моаваг уӕздӕттимӕ ацыди.

²² Хуыцауӕн йӕ маст рафыхти Балааммӕ, кӕй ацыди, уый тыххӕй, ӕмӕ Дунедарӕджы зӕд цӕхгӕрмӕ ӕрлӕууыди Балаамы фӕндагыл. Ныр уый та йӕ хӕрӕгыл бадти, йӕ дыууӕ фӕсдзӕуины йемӕ.

²³ Хӕрӕг Дунедарӕджы зӕды кардӕлвӕстӕй лӕугӕйӕ куы федта, уӕд фӕндагӕй быдыры ’рдӕм фӕзылди. Балаам ыл ралӕууыди, цӕмӕй йӕ фӕстӕмӕ фӕндагмӕ раздаха.

²⁴ Уӕд Дунедарӕджы зӕд ӕрлӕууыд, дыууӕ сӕндоны ӕхсӕн фӕндаг кӕм ӕрбанарӕг ис, уыцы ран: къул — иуӕрдыгӕй, къул — иннӕрдыгӕй.

²⁵ Федта хӕрӕг Дунедарӕджы зӕды, къулмӕ йӕхи нылхъывта ӕмӕ Балаамы къах дӕр йӕ фӕстӕ фӕци. Балаам ӕй ногӕй нӕмын райдыдта.

²⁶ Дунедарӕджы зӕд дарддӕр ацыд ӕмӕ, фӕндагӕй рахизӕрдӕм дӕр ӕмӕ галиуӕрдӕм дӕр азилӕн кӕм нӕ уыди, ахӕм уынгӕг ран ӕрлӕууыди.

²⁷ Федта хӕрӕг Дунедарӕджы зӕды, ӕмӕ Балаамы бын зӕххыл ныххуыссыд. Балаамӕн йӕ маст рафыхти ӕмӕ лӕдзӕгӕй ралӕууыд хӕрӕгыл.

²⁸ Дунедарӕг адӕймаджы ӕвзагӕй сдзурын кодта хӕрӕджы, ӕмӕ загъта уый Балаамӕн: «Цы дын кодтон, ӕртӕ хатты мӕ цӕй тыххӕй фӕнадтай?»

²⁹ Ӕмӕ загъта Балаам хӕрӕгӕн: «Уымӕн ӕмӕ ды мӕнӕй фӕхъазыдтӕ. Мӕ къухы кард куы фӕуыдаид, уӕд дӕ ӕрбамардтаин».

³⁰ Ӕмӕ загъта хӕрӕг Балаамӕн: «Цӕрӕнбонты кӕуыл цӕуыс, исты ӕз дӕ уыцы хӕрӕг нӕ дӕн? Искуы мӕм ахӕм миниуӕг уыди, ӕмӕ демӕ мӕхи афтӕ дарон?» «Нӕ», — дзуапп ын радта уый.

³¹ Байгом кодта Дунедарӕг Балаамы цӕстытӕ, ӕмӕ уый федта Дунедарӕджы зӕды: кардӕлвӕстӕй лӕууыди фӕндагыл. Ӕрхаудта Балаам йӕ зонгуытыл, зӕххыл ныддӕлгом ис.

³² Бафарста Дунедарӕджы зӕд: «Цӕй тыххӕй фӕнадтай дӕ хӕрӕджы ӕртӕ хатты? Уый Ӕз рацыдтӕн дӕ размӕ, цӕмӕй дӕ бакъуылымпы кӕнон, уымӕн ӕмӕ раст нӕ кӕныс Мӕ разы.

³³ Хӕрӕг мӕ федта ӕмӕ ӕртӕ хатты Мӕ разӕй иуварс азылди; куынӕ азылдаид, уӕд дӕу ӕрбамардтаин, уый та удӕгасӕй ныууагътаин».

³⁴ Ӕмӕ загъта Балаам Дунедарӕджы зӕдӕн: «Тӕригъӕды бацыдтӕн, уымӕн ӕмӕ нӕ зыдтон, Ды мӕ развӕндагыл лӕууыс, уый. Ныр та, кӕд Дын фӕндон нӕу, уӕд фӕстӕмӕ аздӕхдзынӕн».

³⁵ Ӕмӕ загъта Дунедарӕджы зӕд Балаамӕн: «Ацу ацы адӕмимӕ, фӕлӕ-иу дын Ӕз цы зӕгъон, ӕрмӕстдӕр уый дзур». Ӕмӕ ацыди Балаам Балакы уӕздӕттимӕ.

Балаам — Балакы уазӕг

³⁶ Фехъуыста Балак, Балаам ӕрбацӕуы, уый ӕмӕ йӕ размӕ рацыди Моавы сахармӕ, Арноны арӕныл чи ис, тӕккӕ арӕнгӕрон, уырдӕм.

³⁷ Ӕмӕ загъта Балак Балаамӕн: «Ӕз дӕм куы арвыстон, уӕд мӕм цӕуылнӕ цыдтӕ? Исты дын мӕ бон кад скӕнын нӕу?»

³⁸ Ӕмӕ загъта Балаам Балакӕн: «Мӕнӕ дӕм ӕрбацыдтӕн ныр, фӕлӕ мӕ бон дзурын у? Хуыцау мын мӕ дзыхы цы бафтауа, уый дзурдзынӕн».

³⁹ Ӕмӕ ацыди Балаам Балакимӕ ӕмӕ бацыдысты Кирйат-Хуцотмӕ.

⁴⁰ Ӕмӕ аргӕвста Балак стуртӕ ӕмӕ лыстӕг фос ӕмӕ арвыста хӕйттӕ Балаам ӕмӕ, йемӕ цы уӕздӕттӕ уыд, уыдонӕн.

⁴¹ Дыккаг бон, сӕумӕйӕ, Балак Балаамы Бамот-Баалмӕ скодта, ӕмӕ уый уырдыгӕй израилӕгты рӕсӕнуатӕн ӕрмӕст йӕ чысыл хай федта.