Нымӕцтӕ 2 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Фӕндагыл цӕуыны ӕмӕ рӕсӕнуаты лӕууыны фӕтк

¹ Дунедарӕг Моисей ӕмӕ Ааронӕн загъта:

² «Израилӕгтӕ, алчи — йӕ тырыса, йӕ хӕдзарвӕндаджы бӕрӕг нысӕнттимӕ, афтӕмӕй рӕсӕнуат скӕнӕнт Фембӕлды Цатыры алфамбылай».

³ Разӕй, скӕсӕнӕрдыгӕй, хъуамӕ йӕ къордтимӕ ӕрбынат кӕна Иудӕйы ӕфсад; Иудӕйы байзӕддӕгты фӕтӕг — Нахшон, Аминадавы фырт.

⁴ Йе ’фсӕддон къорды — ӕвдай цыппар мин ӕхсӕзсӕдӕ адӕймаджы.

⁵ Йӕ фарсмӕ — Иссахары мыггаг; Иссахары байзӕддӕгты фӕтӕг — Нетанел, Цуары фырт.

⁶ Йе ’фсӕддон къорды — фӕндзай цыппар мин цыппарсӕдӕ адӕймаджы.

⁷ Зевулоны мыггаг: Зевулоны байзӕддӕгты фӕтӕг — Елиав, Хелоны фырт.

⁸ Йе ’фсӕддон къорды — фӕндзай авд мин цыппарсӕдӕ адӕймаджы.

⁹ Иудӕйы ӕфсады нымӕц ӕдӕппӕтӕй — сӕдӕ ӕстай ӕхсӕз мин цыппарсӕдӕ; уыдонӕн разӕй цӕугӕ у.

¹⁰ Рувимы ӕфсад йӕ къордтимӕ ӕрбынат кӕнӕд хуссарӕрдыгӕй. Рувимы байзӕддӕгты фӕтӕг — Елицур, Шедеуры фырт.

¹¹ Йе ’фсӕддон къорды — цыппор ӕхсӕз мин фондзсӕдӕ адӕймаджы.

¹² Йӕ фарсмӕ — Симеоны мыггаг. Симеоны байзӕддӕгты фӕтӕг — Шелумиел, Цуришаддайы фырт.

¹³ Йе ’фсӕддон къорды — фӕндзай фараст мин ӕртӕсӕдӕ адӕймаджы.

¹⁴ Дарддӕр — Гады мыггаг; Гады байзӕддӕгты фӕтӕг — Елйасаф, Реуелы фырт.

¹⁵ Йе ’фсӕддон къорды — цыппор фондз мин ӕхсӕзсӕдӕ фӕндзай адӕймаджы.

¹⁶ Рувимы ӕфсӕддон къордты ӕдӕппӕтӕй — сӕдӕ фӕндзай иу мин цыппарсӕдӕ фӕндзай адӕймаджы; уыдонӕн Иудӕйы ӕфсады фӕстӕ цӕугӕ у.

¹⁷ Фӕндагыл Уаз Цӕрӕн ӕмӕ левиттӕ хъуамӕ уой ӕфсӕдты астӕу. Рӕсӕнуаты чи куыд лӕууыд, фӕндагыл дӕр сын афтӕ цӕугӕ у: алчи — йӕхи бынаты, йӕхи ӕфсадимӕ.

¹⁸ Ефремы ’фсад йӕ къордтимӕ ӕрбынат кӕнӕд ныгуылӕнӕрдыгӕй; Ефремы байзӕддӕгты фӕтӕг — Елишама, Аммиуды фырт.

¹⁹ Йе ’фсӕддон къорды — цыппор мин фондзсӕдӕ адӕймаджы.

²⁰ Йӕ фарсмӕ — Менассиайы мыггаг; Менассиайы байзӕддӕгты фӕтӕг — Гамлиел, Педацуры фырт.

²¹ Йе ’фсӕддон къорды — ӕртын дыууӕ мин дыууӕсӕдӕ адӕймаджы.

²² Дарддӕр — Бениамины мыггаг; Бениамины байзӕддӕгты фӕтӕг — Авидан, Гидеонийы фырт.

²³ Йе ’фсӕддон къорды — ӕртын фондз мин цыппарсӕдӕ адӕймаджы.

²⁴ Ефремы ӕфсады нымӕц ӕдӕппӕтӕй — сӕдӕ аст мин сӕдӕ адӕймаджы; уыдонӕн Рувимы ӕфсады фӕстӕ цӕугӕ у.

²⁵ Даны ӕфсад йӕ къордтимӕ ӕрбынат кӕнӕд цӕгатӕрдыгӕй; Даны байзӕддӕгты фӕтӕг — Ахиезер, Амишаддайы фырт.

²⁶ Йе ’фсӕддон къорды — ӕхсай дыууӕ мин авдсӕдӕ адӕймаджы.

²⁷ Йӕ фарсмӕ — Асиры мыггаг; Асиры байзӕддӕгты фӕтӕг — Пагиел, Охраны фырт.

²⁸ Йе ’фсӕддон къорды — цыппор иу мин фондзсӕдӕ адӕймаджы.

²⁹ Дарддӕр — Неффалимы мыггаг; Неффалимы байзӕддӕгты фӕтӕг — Ахира, Енаны фырт.

³⁰ Йе ’фсӕддон къорды — фӕндзай ӕртӕ мин цыппарсӕдӕ адӕймаджы.

³¹ Даны ӕфсады ӕдӕппӕтӕй — сӕдӕ фӕндзай авд мин ӕхсӕзсӕдӕ адӕймаджы. Уыдонӕн се ’ппӕты фӕстӕ цӕугӕ у.

³² Уый — хӕдзарвӕндаггай израилӕгты сфыстмӕ чи бахауд, уыдон. Ӕдӕппӕтӕй се ’фсады, алы къорд дӕр хынцгӕйӕ, уыдис ӕхсӕзсӕдӕ ӕртӕ мин фондзсӕдӕ фӕндзай адӕймаджы.

³³ Уыимӕ левиттӕ израилӕгты хыгъдмӕ хаст не ’рцыдысты, Дунедарӕг Моисейӕн куыд загъта, афтӕ.

³⁴ Дунедарӕг Моисейӕн куыддӕриддӕр загъта, алцыдӕр афтӕ бакодтой израилӕгтӕ — рӕсӕнуаты сӕ чи куыд лӕууыди йе ’фсадимӕ, фӕндагыл дӕр цыдысты афтӕ: алчи — йӕхи мыггаг, йӕхи хӕдзарвӕндагимӕ.