Неемиа 4 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Мах къул кӕй аразӕм, уый Санбаллатӕн йӕ тъӕнгтӕ цагъта, ӕмӕ маст кодта иудейӕгтӕн, хынджылӕг сӕ кодта

² йе ’фсымӕртӕ ӕмӕ самариаг ӕфсӕддонты раз: «Цы архайынц ацы ницӕйаг иудейӕгтӕ? Ау, ахӕм бар сын ратдзысты, ӕмӕ нывӕндтӕ хӕссой? Ау, сӕ куыст искуы кӕронмӕ фӕуыдзысты? Ау, дуртӕ, чи ныртхутӕг, уыцы сыгъд дуртӕ ныхъхъӕбӕр уыдзысты?»

³ Аммонаг Тобиа дӕр йӕ цуры уыд ӕмӕ йын загъта: «Уадз ӕмӕ аразой: рувас ыл куы ауайа, уӕд дӕр ӕркӕлдзӕн сӕ дурӕй амад къул».

⁴ Фехъуысӕд дӕм, нӕ Хуыцау, сӕ къӕхты бын нӕ куыд кӕнынц, уый! Се ’лгъыстытӕ сын сӕхи сӕрыл ӕруадз, уацайраджы хал куыд ахӕрой ӕмӕ кӕйдӕр зӕххыл ӕгадӕй сӕ бонтӕ куыд ӕрвитой!

⁵ Се ’наккаг митӕ сын ма ныббар, аразджыты тӕригъӕд сын ма ныххатыр кӕн!

⁶ Цыфӕндыйӕ дӕр мах куыстам ӕмӕ нӕ къул ӕрдӕгмӕ фестӕм, ӕмӕ дарддӕр кусынмӕ дӕр адӕм цӕттӕ сты.

⁷ Санбаллат ӕмӕ Тобиа, араббӕгтӕ, аммонӕгтӕ ӕмӕ ашдодӕгтӕ куы фехъуыстой, Йерусалимы къултӕ ногӕй аразӕм, сӕ къахыртӕ сын ӕхгӕнӕм, уӕд мӕстӕй ссыгъдысты.

⁸ Баныхас кодтой иууылдӕр иумӕ, Йерусалимы ныхмӕ схӕцӕм ӕмӕ сӕ ныкъкъуылымпы кӕнӕм, зӕгъгӕ.

⁹ Мах нӕ Хуыцаумӕ куывтам, ӕхсӕвӕй-бонӕй хӕстифтонгӕй лӕууыдыстӕм, цӕмӕй фыдгулӕй нӕхи бахъахъхъӕнӕм.

¹⁰ Иудейӕгтӕ бустӕ кодтой: «Уаргъхӕсджытӕн сӕ хъару басасти, быронӕн та ныккӕнӕн дӕр нӕй; къул саразынӕн не стӕм мах».

¹¹ Нӕ фыдгултӕ та дзырдтой: «Ӕвиппайды се ’хсӕн куыд февзӕрдзыстӕм, куыд сӕ ныццӕгъддзыстӕм ӕмӕ хъуыддаг куыд ӕрбайхалдзыстӕм, уый уыдон зонгӕ дӕр нӕ бакӕндзысты».

¹² Сӕ фарсмӕ цӕрӕг иудейӕгтӕ нӕм алы рӕттӕй иу-дӕс хатты ӕрбацыдысты ӕмӕ нын загътой, кӕцырдыгӕйты нӕм лӕбурынвӕнд кӕнынц, уый.

¹³ Уӕд ӕз, систӕ ӕрдӕгамад кӕм уыдысты, уымыты адӕмы ӕрлӕууын кодтон мыггаггай, цирхъытӕ, ӕрцытӕ ӕмӕ ӕрдынтимӕ.

¹⁴ Ӕркастӕн сӕм ӕмӕ сын сӕ номдзыддӕртӕн ӕмӕ сӕ хицӕуттӕн, стӕй иннӕ адӕмӕн загътон: «Ма тӕрсут фыдгулӕй! Рох уӕ ма уӕд цытджын ӕмӕ тасӕфтауӕг Дунедарӕг, афтӕмӕй схӕцут уе ’фсымӕртӕ, уӕ лӕппутӕ ӕмӕ уӕ чызджытӕ, уӕ устытӕ ӕмӕ уӕ хӕдзӕртты сӕраппонд!»

¹⁵ Не знӕгтӕ куы фехъуыстой, сӕ фӕнд нын зындгонд у, уый, уӕд сын Хуыцау сӕ фыдвӕндтӕ сӕ хъуыры фӕбадын кодта, махӕй та алчидӕр фӕстӕмӕ къул аразынмӕ бавнӕлдта, йӕ куысты сӕр ӕрлӕууыди.

¹⁶ Уыцы бонӕй фӕстӕмӕ мӕ кусджыты иу ӕмбис кусгӕ кодта, иннӕ ӕмбис та ӕд ӕрцытӕ, ӕд уартытӕ ӕмӕ ӕд ӕрдынтӕ, сӕ уӕлӕ уыди згъӕрхӕдӕттӕ, афтӕмӕй лӕууыдысты. Ӕфсадхонтӕ дӕр ӕмбырдӕй уыдысты Иудӕйы хӕдзары фӕскъул.

¹⁷ Къуламайджытӕ ӕмӕ уаргъхӕсджытӕ иу къухӕй кусгӕ кодтой, иннӕмӕй та ӕрцытыл хӕцыдысты.

¹⁸ Аразджытӕй алкӕмӕн дӕр йӕ кард баст уыди йӕ астӕуыл, афтӕмӕй куыстой. Мӕ цуры та лӕууыд хӕтӕлӕйуасӕг.

¹⁹ Ӕз загътон номдзыддӕртӕ ӕмӕ хицӕуттӕн, стӕй иннӕ адӕмӕн: «Куыст тынг хъазуат ӕмӕ дзӕвгар у. Къулыл ныххӕлиу стӕм, кӕрӕдзийӕ — дӕрддзӕф.

²⁰ Уымӕ гӕсгӕ уӕ хъус дарут, ӕмӕ уӕм хӕтӕлы уаст кӕцӕй фехъуыса, уырдӕм-иу ӕвӕстиатӕй ӕрбамбырд ут. Нӕ Хуыцау нӕ бӕсты тох кӕндзӕни».

²¹ Афтӕ уыди нӕ куыст: сӕуӕхсидӕй суанг стъалыты фӕзындмӕ адӕмӕн се ’мбис ӕрцытӕ нӕ уӕгъд кодтой сӕ къухтӕй.

²² Ноджыдӕр ма уыди уыцы рӕстӕг мӕ ныхас адӕмӕн: «Йерусалимы уӕ алчидӕр ӕхсӕвиуат кӕнӕд йӕ лӕггадгӕнджытимӕ: уыдон нын ӕхсӕв хъахъхъӕнӕг уыдзысты, бон та кусгӕ кӕндзысты».

²³ Нӕ ластам нӕ дарӕс нӕдӕр мӕхӕдӕг, нӕдӕр ме ’фсымӕртӕ, нӕдӕр мӕ лӕггадгӕнджытӕ, нӕдӕр мӕ хъахъхъӕнджытӕ. Алчидӕр нӕ рахизӕрдыгӕй йӕ фарсмӕ цӕттӕйӕ дардта йӕ цирхъ, алкӕмӕн дӕр нӕ йӕ цуры уыди дон.