Неемиа 3 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Алчер Елиашив бавдӕлд ӕмӕ йӕ сауджын ӕфсымӕртимӕ Фысвосы кулдуар сарӕзтой. Срухс ӕй кодтой ӕмӕ йын йӕ дуӕрттӕ сӕвӕрдтой. Сӕдӕйы мӕсыгӕй Хананелы мӕсыгмӕ дӕр къул самадтой ӕмӕ йӕ срухс кодтой.

² Уыдоны фарсмӕ къулы хай дарддӕр амадтой йерихонӕгтӕ, сӕ фарсмӕ та — Имрийы фырт Заккур.

³ Кӕсаджы кулдуар арӕзтой Сенаайы байзӕддӕгтӕ: йӕ хъайвантӕ йын ныффидар кодтой, йӕ дуӕрттӕ йын ӕрцауыгътой, йӕ гуыдыртӕ ӕмӕ йын йе ’хгӕнӕнтӕ сӕвӕрдтой.

⁴ Уыдоны фарсмӕ къул дарддӕр амадта Уриайы фырт Меремот, Хакоцы байзӕддаг, сӕ фарсмӕ та — Варахийы фырт Мешуллам, Мешезавелы байзӕддаг; уый фарсмӕ — Баанайы фырт Цадок.

⁵ Уыдоны фарсмӕ къул дарддӕр амадтой текойӕгтӕ; уӕвгӕ, сӕ тӕккӕ нымаддӕртӕй никӕй бафӕндыд Дунедарӕджы номыл бакусын.

⁶ Зӕронд кулдуарыл архайдтой Пасеахы фырт Иоада ӕмӕ Бесодиайы фырт Мешуллам; кулдуар сарӕзтой, йӕ дуӕрттӕ йын ӕрцауыгътой, йӕ гуыдыртӕ ӕмӕ йын йе ’хгӕнӕнтӕ сӕвӕрдтой.

⁷ Уыдоны фарсмӕ къул амайыныл дарддӕр, Цӕугӕдоны фаллаг фарсы хицауы цӕрӕнты онг, архайдтой гивонаг Мелатиа ӕмӕ меронотаг Йадон, семӕ — гивонӕгтӕ ӕмӕ мицпайӕгтӕ.

⁸ Къулы иннӕ хай амадта Хархаиайы фырт, зӕрингуырд Уззиел, йӕ фарсмӕ та — Хананиа, хӕрздӕфгӕнӕнтӕ аразӕг. Уыйадыл Йерусалим, куыд уыди, афтӕ фӕстӕмӕ скодтой — суанг Фӕтӕн Къулы онг.

⁹ Уыдоны фарсмӕ къулы иннӕ хай амайыныл архайдта Хуры фырт Рефайа, Йерусалимы ӕрдӕгзылды хицау.

¹⁰ Къулы иннӕ хай, растдӕриддӕр йӕ хӕдзары бакомкоммӕ, амадта Харумафы фырт Иедайа, дарддӕр та — Хашавниайы фырт Хаттуш.

¹¹ Къул дарддӕр, уыимӕ — Пецы мӕсыг дӕр, амадтой Харимы фырт Малкиа ӕмӕ Пахат-Моавы фырт Хашшув.

¹² Къул йӕ чызджытимӕ дарддӕр скодта Халлохешы фырт Шаллум, Йерусалимы ӕрдӕгзылды хицау.

¹³ Дӕлвӕзы Кулдуар самадтой Ханун ӕмӕ заноахӕгтӕ, йӕ дуӕрттӕ йын ӕрцауыгътой, йӕ гуыдыртӕ ӕмӕ йын йе ’хгӕнӕнтӕ сӕвӕрдтой. Уымӕй уӕлдай ма къулӕй ноджыдӕр мин ӕлмӕрины — Фаджыскалӕн кулдуары онг — самадтой.

¹⁴ Фаджыскалӕн кулдуар самадта Рехавы фырт Малкиа, Бет-Керемы зылды хицау. Йӕ дуӕрттӕ йын сӕвӕрдта, гуыдыртӕ ӕмӕ ӕхгӕнӕнтӕ ӕрцауыгъта.

¹⁵ Суадоны кулдуар самадта Кол Хозейы фырт Шаллум, Мицпайы зылды хицау. Сарӕзта йӕ, уӕлейӕ йын ӕрдынагъуыст скодта, гуыдыртӕ ӕмӕ ӕхгӕнӕнтӕ йыл сӕвӕрдта. Уымӕй уӕлдай ма паддзахы дыргъдоны акомкоммӕ, Силоамы цадӕй Давиды сахарӕй ӕрхизӕн къӕпхӕнты онг, къул самадта.

¹⁶ Дарддӕр — Давиды зӕппӕдзтӕй хикъахт цад ӕмӕ ӕфсӕддонты агъуысты онг — къул самадта Азбукы фырт Неемиа, Бет-Цуры ӕрдӕгзылды хицау.

¹⁷ Дарддӕр къул амайыныл архайдтой левиттӕ: Банийы фырт Рехум, уыдоны фӕстӕ — Хашавиа, Кеилайы ӕрдӕгзылды хицау.

¹⁸ Къул дарддӕр самадтой се ’фсымӕртӕ: Хенадады фырт Баввей, Кеилайы ӕрдӕгзылды хицау.

¹⁹ Уый фарсмӕ къулы иннӕ хай, тигъыл цы хотыхдон ис, уый схизӕны акомкоммӕ, сарӕзта Йешуайы фырт Езер, Мицпайы хицау.

²⁰ Иннӕ хай, тигъӕй алчер Елиашивы хӕдзары дуары онг, самадта Заббайы фырт Барух.

²¹ Дарддӕр, Елиашивы хӕдзары дуарӕй Елиашивы хӕдзары тигъмӕ, къул самадта Уриайы фырт Меремот, Хакоцы фырты фырт.

²² Дарддӕр къул самадтой ӕввахсдӕр рӕттӕй ӕрбацӕуӕг сауджынтӕ.

²³ Сӕ фарсмӕ, сӕхи хӕдзары акомкоммӕ, къулы хай самадтой Бениамин ӕмӕ Хашшув. Уыдоны фарсмӕ, сӕхи хӕдзары цур, — Маасеайы фырт Азариа, Ананиайы байзӕддаг.

²⁴ Йӕ фарсмӕ, къулы иннӕ хай, Азариайы хӕдзарӕй тигъы фӕзилӕнмӕ, амадта Хенадады фырт Биннуй.

²⁵ Йӕ фарсмӕ, ахӕстоны кӕрты цур, тигъы ӕмӕ паддзахы уӕллаг хӕдзары мӕсыджы акомкоммӕ — Узайы фырт Палал. Йӕ фарсмӕ — Парошы фырт Педаиа.

²⁶ Офел, зӕгъгӕ, сахары уыцы ран цӕрӕг Кувӕндоны кусджытӕ самадтой къулы иннӕ хай — скӕсӕнӕрдыгӕй Донхӕссӕн кулдуармӕ, цы мӕсыг дзы фӕцыд, уый онг.

²⁷ Сӕ фарсмӕ къул дарддӕр амадтой текойӕгтӕ: стыр цӕстахадгӕ мӕсыгӕй Офелы къулы онг.

²⁸ Дарддӕр, Бӕхты кулдуарӕй уӕлӕмӕ, цӕгатӕрдӕм, амадтой сауджынтӕ: алчидӕр — йӕ хӕдзары акомкоммӕ.

²⁹ Сӕ фарсмӕ, йӕ хӕдзары акомкоммӕ, амадта Иммеры фырт Цадок. Уый фарсмӕ та — Шеханиайы фырт Шемайа, скӕсӕйнаг кулдуары хъахъхъӕнӕг.

³⁰ Дарддӕр, къулы иннӕ хай, амадтой Шелемийы фырт Хананиа ӕмӕ Цалафы ӕхсӕзӕм фырт Ханун. Сӕ фарсмӕ, йӕ агъуысты акомкоммӕ, къул дарддӕр амадта Варахийы фырт Мешуллам.

³¹ Йӕ фарсмӕ Хацорфийы фырт Малкиа, зӕрингуырд, амадта дарддӕр къул Кувӕндоны кусджытӕ ӕмӕ сӕудӕджерты хӕдзары онг, Цӕстдарджыты кулдуары акомкоммӕ, сахары къулы фисыны уӕллаг агъуысты онг.

³² Фисыны уӕллаг агъуыстӕй Фысвосы кулдуары онг та къул амадтой зӕрингуырдтӕ ӕмӕ сӕудӕджертӕ.