Михей 1 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Иудейаг паддзӕхтӕ Иотам, Ахаз ӕмӕ Езекиайы заман Дунедарӕг Йӕ ныхас фехъусын кодта морешетаг Михайӕн; цӕстылуайӕны йын раргом чындӕуыд, Самари ӕмӕ Йерусалиммӕ цы ’нхъӕлмӕ кӕсы, уый:

² «Байхъусут, ӕппӕт адӕмтӕ, байхъусут лӕмбынӕг, ӕгас зӕхх ӕмӕ йе ’ппӕт цӕрджытӕ! Дунедарӕг Хуыцау уӕ ныхмӕ ӕвдисӕн ныллӕууӕд, Йӕ уаз Кувӕндонӕй рацӕуӕд Бардарӕг!

³ Мӕнӕ Дунедарӕг рацӕуы Йӕ сыгъдӕг цӕрӕнӕй, ӕрцӕудзӕн ӕмӕ зӕххы бӕрзӕндтӕ бассӕнддзӕн.

⁴ Хӕхтӕ атайдзысты Йӕ быны; мыдадз артӕй куыд акъӕртт вӕййы, къӕдзӕхы фахсыл дон куыд рацӕйзгъоры, афтӕ дӕлвӕзтӕ фӕркгай фӕхаудзысты.

⁵ Ӕппӕт адӕттӕ ’рцӕудзысты Йаковы ӕнӕхуыцау миты, Израилы тӕригъӕдты аххосӕй. Самари — мӕнӕ ис Йаковы тӕригъӕд! Йерусалим — мӕнӕ ис Иудейы уаз къуыпп!

⁶ Уыдӕтты тыххӕй Ӕз Самарийы фестын кӕндзынӕн ӕдзӕрӕг быдыр, хӕлддзӕгты кӕритӕ, сӕндӕттӕ кӕм сараздзысты, ахӕм бынат; йӕ дуртӕ йын фехсдзынӕн дӕлвӕзмӕ, йӕ бындуртӕ йын разынын кӕндзынӕн.

⁷ Йӕ гуымирытӕ иууылдӕр ӕрцӕудзысты пырх, йӕ хӕтыны тыххӕй йын цыдӕриддӕр бафыстой, уыдон та — сыгъд, йӕ гуымирыты йын фесафдзынӕн. Ахӕм фиддон хъахбай айсдзӕн йӕ хӕтыны тыххӕй».

⁸ Ӕз кӕудзынӕн ӕмӕ дзыназдзынӕн ууыл, бӕгъӕввад ӕмӕ бӕгънӕгӕй цӕудзынӕн; хъӕддаг куыдзау ниудзынӕн ӕмӕ страусау мӕ цӕссыг згъалдзынӕн,

⁹ уымӕн ӕмӕ нӕй сдзӕбӕхгӕнӕн йӕ хъӕдгомӕн. Стыр бӕллӕх ӕрбахӕстӕг Иудеймӕ, суанг мӕ адӕмы кулдуары раз, Йерусалимы цур ӕрбалӕууыд.

¹⁰ Уыцы хабар Гаты ма ахъӕр кӕнут, уым-иу ма кӕут! Бет-ле-Афрейы сахары рыджы сӕвдулут уӕхи!

¹¹ Шафиры цӕрджытӕ! Ӕгадӕй ӕмӕ бӕгънӕгӕй ӕцӕгӕлон бӕстӕм ацӕут! Цаананы цӕрӕг нӕ алидздзӕнис; Бет-Ха-Эцелӕй хъарӕг хъуысы, фӕлӕ ӕххуыс нӕ фендзысты.

¹² Кӕуы йӕ исбоныл Мароты цӕрӕг, уымӕн ӕмӕ Дунедарӕг ӕвирхъау фыдбылыз ӕруагъта Йерусалимы кулдуарыл.

¹³ Лахишы цӕрӕг, дӕ бӕхтӕ уӕрдоны сифтындз! Сионы чызгӕн йӕ тӕригъӕдтӕ дӕуӕй райдыдтой! Израилы фыдракӕндты аххосджын ды дӕ!

¹⁴ Морешет-Гаты сахармӕ дӕ чындздзон хуынтӕ арвитдзынӕ; Ахзивы хъӕуы цӕрджытӕ фыдӕнхъӕл фӕкӕндзысты Израилы паддзӕхты.

¹⁵ Марешайы цӕрӕг, тыхгӕнӕджы дӕм ӕрбакӕндзынӕн, ӕмӕ суанг, Израил сӕрыстыр кӕмӕй у, уыцы Адулламы онг ныххӕццӕ уыдзӕн.

¹⁶ Дӕ сӕрыхъуынтӕ адас, ныхъхъарӕг кӕн дӕ уарзон хъӕбултыл! Хӕдмӕлхорау ныггӕмӕх кӕн дӕ сӕр, уымӕн ӕмӕ дын дӕ сабиты уацары акодтой!