Матфей 6 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Мӕгуыртӕн баххуысы тыххӕй

¹ Уӕхи хизут, рӕстгӕнджытӕ кӕй стут, уый адӕмы цӕстмӕ ӕвдисынӕй, науӕд хӕрзиуӕг нӕ райсдзыстут уӕ Уӕларвон Фыдӕй.

² Мӕгуырӕн ӕххуыс кӕныс, уӕд ӕй дӕрдтыл ма ныхъхъӕр кӕн. Афтӕ синагогӕтӕ ӕмӕ уынгты фӕкӕнынц дыдзӕсгӕмттӕ — искӕй цӕстмӕ, кады охыл. Ӕцӕг цы у, уый уын зӕгъын: уыдон ныридӕгӕн райстой сӕ хорзӕх.

³ Ды та мӕгуырӕн куы ӕххуыс кӕнай, уӕд дӕ галиу къух ма зонӕд, рахиз цы гӕнӕг у, уый.

⁴ Уӕд де ’ххуысы хай уыдзӕни сусӕг, ӕмӕ дӕ Фыд, сусӕг хъуыддӕгтӕ уынӕг, дӕу схорзӕхджын кӕндзӕн ӕргомӕй.

Кувыны тыххӕй

⁵ Уӕдӕ, куы фӕкувут, уӕд дыдзӕсгӕмтты ма фӕзмут — уыдон уарзынц адӕмы цӕстмӕ синагогӕты ӕмӕ тигътыл лӕугӕйӕ кувын. Ӕцӕг цы у, уый уын зӕгъын: уыдон ныридӕгӕн райстой сӕ хорзӕх.

⁶ Ды та, куы фӕкувыс, уӕд бацу дӕ уатмӕ, сӕхгӕн дӕ дуар ӕмӕ скув, цӕстӕй Кӕй нӕ уыныс, дӕ уыцы Фыдмӕ. Ӕмӕ дӕ Фыд, сусӕг хъуыддӕгтӕ уынӕг, дӕу схорзӕхджын кӕндзӕн ӕргомӕй.

⁷ Кувгӕйӕ та уӕлдай ныхӕстӕ ма дзурут муртаттӕгтау — уыдон афтӕ ӕнхъӕл сты, ӕмӕ, фылдӕр куы дзурой, уӕд сӕ куывд хуыздӕр фехъуысдзӕн Хуыцаумӕ.

⁸ Ма сӕ фӕзмут, уымӕн ӕмӕ, нӕма ской кӕнут, афтӕмӕй йӕ уӕ Фыд фӕзоны, сымах хъуаг цӕмӕй ӕййафут, уый.

⁹ Кувгӕ та кӕнут афтӕ: Нӕ Уӕларвон Фыд! Кадджын уӕд Дӕ ном!

¹⁰ Ӕрцӕуӕд Дӕ Паддзахад, уӕлӕрвты куыд у, афтӕ зӕххыл дӕр сӕххӕст уӕд Дӕ фӕндон.

¹¹ Ратт нын абон цӕрынваг къӕбӕр.

¹² Ныббар нын нӕ хӕстӕ, мах нӕ хӕсджынтӕн куыд барӕм, афтӕ.

¹³ Ма нӕ бафтау фыдӕвзарӕны, фӕлӕ нӕ бахиз сайтанӕй. Уымӕн ӕмӕ Паддзахад, тых ӕмӕ кад Дӕу сты мыггагмӕ. Аммен.

Хатыр кӕныны тыххӕй

¹⁴ Ӕмӕ адӕмӕн сӕ рӕдыдтытӕ куы хатыр кӕнат, уӕд сымахӕн дӕр уӕ Уӕларвон Фыд ныббардзӕни уӕ тӕригъӕдтӕ.

¹⁵ Фӕлӕ сымах адӕмӕн сӕ рӕдыдтытӕ куынӕ хатыр кӕнат, уӕд уын уӕ Фыд дӕр нӕ ныббардзӕн уӕ рӕдыдтытӕ.

Ком дарыны тыххӕй

¹⁶ Ком даргӕйӕ-иу дыдзӕсгӕмттау уӕхи ма хъуынтъыз кӕнут — уыдон ныттар кӕнынц сӕ цӕсгӕмттӕ, цӕмӕй адӕм уыной, ком кӕй дарынц, уый. Ӕцӕг цы у, уый уын зӕгъын: уыдон ныридӕгӕн райстой сӕ хорзӕх.

¹⁷ Ды та, ком куы дарай, уӕд ныффас дӕ сӕр ӕмӕ цӕхс дӕ цӕсгом,

¹⁸ цӕмӕй, ком кӕй дарыс, уый адӕм ма уыной, фӕлӕ йӕ фена Дӕ Фыд, цӕстӕй Кӕй нӕ уыныс, Уый, ӕмӕ дӕ уӕд дӕ Фыд, сусӕг хъуыддӕгтӕ уынӕг, схорзӕхджын кӕндзӕн ӕргомӕй.

Ӕцӕг хӕзна ӕмӕ сайӕн хӕзнайы тыххӕй

¹⁹ Зӕххыл уӕхицӕн хӕзнатӕ ма ӕмбырд кӕнут — ам сӕ рӕмпӕг ӕмӕ згӕ бахӕрынц, хуыснӕджытӕ сӕм баирвӕзынц ӕмӕ сӕ адавынц.

²⁰ Уӕхицӕн хӕзнатӕ ӕмбырд кӕнут уӕларвы — уым сӕ нӕдӕр рӕмпӕг хӕры, нӕдӕр сыл згӕ хӕцы, хуыснӕджытӕ дӕр сӕм не ’ххӕссынц ӕмӕ сӕ нӕ давынц.

²¹ Уымӕн ӕмӕ уӕ хӕзна кӕм ис, уӕ зӕрдӕ дӕр уым уыдзӕн.

Рухс ӕмӕ талынг

²² Буарӕн йӕ рухсгӕнӕн цӕст у. Ӕмӕ дӕ цӕст сыгъдӕг куы уа, уӕд дӕ буар иууылдӕр рухс уыдзӕн.

²³ Фӕлӕ дӕ цӕст хӕрамӕй талынг куы уа, уӕд дӕ буар иууылдӕр талынг уыдзӕн. Уӕдӕ дӕ мидӕг цы рухс ис, уый талынг кӕд у, уӕд ма талынг та цавӕр у, цымӕ!

Хуыцау ӕви мулк?

²⁴ Никӕй бон у дыууӕ хицауӕн кусын — сӕ иуӕй йе сӕфт уындзӕн, иннӕйы та уарздзӕни, кӕнӕ сӕ иуыл иузӕрдион уыдзӕн, иннӕйы та ницӕмӕ дардзӕни. Уӕ бон нӕ бауыдзӕни Хуыцауӕн дӕр ӕмӕ ӕхцайӕн дӕр лӕггад кӕнын.

²⁵ Уымӕ гӕсгӕ уын зӕгъын: ма мӕт кӕнут нӕдӕр, цы бахӕрат ӕмӕ цы бануазат, ууыл, нӕдӕр дарӕсыл. Ау, цард хойрагӕй ахсджиагдӕр нӕу, буар та — дарӕсӕй?

²⁶ Акӕсут-ма уӕларвон мӕргътӕм: уыдон нӕдӕр таугӕ кӕнынц, нӕдӕр кӕрдгӕ, нӕдӕр хордӕтты хор ӕфснайынц, ӕмӕ сӕ уӕ Уӕларвон Фыд хӕссы. Сымах уыдонӕй бирӕ зынаргъдӕр не стут, ӕви?

²⁷ Стӕй куы мӕт кӕнат, уӕддӕр уӕ уымӕй йӕ цардыл бирӕ нӕ, фӕлӕ иу сахат бафтауын дӕр кӕй бон бауыдзӕн?

²⁸ Уӕдӕ дарӕсыл дӕр цы мӕт кӕнут? Акӕсут-ма, быдираг дидинджытӕ куыд рӕзынц, уымӕ: нӕдӕр кусынц, нӕдӕр ӕлвисынц,

²⁹ фӕлӕ уын зӕгъын: суанг Соломон дӕр, уый бӕрц кадджын уӕвгӕйӕ, уыдонӕй иуы хуызӕн дӕр нӕ фӕлыста йӕхи.

³⁰ Абон чи ис, райсом та пецы кӕй баппардзысты, уыцы быдираг зайӕгхалы Хуыцау афтӕ кӕм фӕлынды, уым сымах ӕнӕ дарӕсӕй куыд ныууадздзӕни, лӕмӕгъуырнджытӕ!

³¹ Уӕдӕ ма мӕт кӕнут ӕмӕ ма дзурут: «Цы хӕрӕм?», «Цы нуазӕм?», «Нӕ уӕлӕ цы скӕнӕм?»

³² Ӕппӕт уыдӕттыл муртаттӕгтӕ тыхсынц; сымахӕн та уӕ Уӕларвон Фыд зоны, уыдон уӕ иууылдӕр кӕй хъӕуынц, уый.

³³ Фыццаджыдӕр агурут Хуыцауы Паддзахад ӕмӕ Йӕ рӕстдзинад, ӕмӕ уын ӕппӕт уыдӕттӕ дӕр лӕвӕрд уыдзысты.

³⁴ Уӕдӕ ма мӕт кӕнут сомбоныл, уымӕн ӕмӕ сомбон йӕхӕдӕг тыхсдзӕни йӕхиуыл. Алы бонӕн дӕр йӕхи сагъӕстӕ фаг сты.