Матфей 23 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Фарисейты ма фӕзмут

¹ Уӕд Йесо адӕмӕн ӕмӕ Йӕ ахуыргӕнинӕгтӕн райдыдта дзурын:

² «Моисейы бадӕны ӕрбадтысты динамонджытӕ ӕмӕ фарисейтӕ.

³ Уымӕ гӕсгӕ, цы уын дзурынц, уый кӕнут, фӕлӕ сын сӕ хъуыддӕгтӕ ма фӕзмут, уымӕн ӕмӕ уыдон, цы фӕзӕгъынц, уый сӕхӕдӕг нӕ кӕнынц.

⁴ Уӕззау, зынхӕссӕн уӕргътӕ бӕттынц ӕмӕ сӕ адӕмы ӕккой сӕвӕрынц, сӕхӕдӕг та сӕм сӕ ныхы кӕронӕй дӕр не ’вналынц.

⁵ Сӕ алы хъуыддаг дӕр адӕмы цӕстмӕ кӕнынц. Сӕ чырвӕзтӕ аразынц уӕрӕхдӕр, сӕ дарӕсы хаутӕ та — даргъдӕр;

⁶ уарзынц минасы фынгтыл кадджындӕр ӕмӕ синагогӕты раззаг бынӕтты бадын;

⁷ уарзынц, цӕмӕй сын сахарты фӕзты адӕм арфӕтӕ кӕной ӕмӕ сӕм дзурой: „Ахуыргӕнӕг! Ахуыргӕнӕг!“

⁸ Сымах та ахуыргӕнджытӕ ма хонӕнт, уымӕн ӕмӕ уын иу Ахуыргӕнӕг ис — Чырысти, уӕхӕдӕг та уе ’ппӕт дӕр ӕфсымӕртӕ стут.

⁹ Зӕххыл уӕ фыд дӕр макӕй хонут, уымӕн ӕмӕ уын ис иунӕг Фыд — уӕларвы Чи ис, Уый.

¹⁰ Зондамонджытӕ дӕр уӕ ма хонӕнт, уымӕн ӕмӕ уын ис иу Зондамонӕг — Чырысти.

¹¹ Уе ’хсӕн уӕлдӕр чи у, уый уын уӕд лӕггадгӕнӕг.

¹² Уымӕн ӕмӕ, йӕхи бӕрзонд чи ӕвӕры, уый ӕрныллӕг уыдзӕн. Йӕхи чи ныллӕг кӕны, уый та сбӕрзонд уыдзӕн.

Сар уӕ сӕр, динамонджытӕ ӕмӕ фарисейтӕ!

¹³ Сар уӕ сӕр, динамонджытӕ ӕмӕ фарисейтӕ, дыдзӕсгӕмттӕ! Адӕмӕн Уӕларвон Паддзахады дуар ӕхгӕнут; уӕхӕдӕг дӕр ӕм нӕ цӕут ӕмӕ йӕм бацӕуын кӕй фӕнды, уыдоны дӕр нӕ уадзут.

¹⁴ [Сар уӕ сӕр, динамонджытӕ ӕмӕ фарисейтӕ, дыдзӕсгӕмттӕ! Сымах сафтид кӕнут идӕдз устыты хӕдзӕрттӕ ӕмӕ адӕмы цӕстмӕ кувынӕй не ’фсӕдут. Уый тыххӕй карз ӕфхӕрд баййафдзыстут.]

¹⁵ Сар уӕ сӕр, динамонджытӕ ӕмӕ фарисейтӕ, дыдзӕсгӕмттӕ! Сымах ӕрзилут денджыз ӕмӕ зӕххыл, цӕмӕй уӕ динмӕ иу адӕймаджы уӕддӕр раздахат, ӕмӕ уый уӕ къухы куы бафты, уӕд дзы зындоны хъӕбул саразут — уӕхицӕй дыууӕ хатты фыддӕр.

¹⁶ Сар уӕ сӕр, куырм фӕтӕгтӕ! Сымах дзурут: „Исчи Кувӕндонӕй куы басомы кӕна, уӕд йӕ сомыйӕ баст нӕу, фӕлӕ, Кувӕндоны сыгъзӕринӕй чи басомы кӕна, уый йӕ сомы хъуамӕ сӕххӕст кӕна“.

¹⁷ Ӕнӕзӕндтӕ ӕмӕ куырмытӕ! Сыгъзӕрин ахсджиагдӕр у ӕви, чи йӕ сыгъдӕг кӕны, уыцы Кувӕндон?

¹⁸ Ноджы фӕзӕгъут: „Исчи нывондхӕссӕнӕй куы басомы кӕна, уӕд йӕ сомыйӕ баст нӕу, фӕлӕ нывондхӕссӕныл цы нывонд ис, уымӕй чи басомы кӕна, уый йӕ сомы хъуамӕ сӕххӕст кӕна“.

¹⁹ Куырмытӕ! Ахсджиагдӕр цы у: нывонд ӕви йӕ чи сыгъдӕг кӕны, уыцы нывондхӕссӕн?

²⁰ Уӕдӕ нывондхӕссӕнӕй сомыгӕнӕг сомы кӕны нывондхӕссӕнӕй дӕр ӕмӕ, йӕ уӕлӕ цы ис, уымӕй дӕр.

²¹ Кувӕндонӕй сомыгӕнӕг сомы кӕны Кувӕндонӕй дӕр ӕмӕ дзы Чи цӕры, Уымӕй дӕр.

²² Арвӕй сомыгӕнӕг сомы кӕны Хуыцауы бадӕнӕй дӕр ӕмӕ уыцы бадӕны Бадӕгӕй дӕр.

²³ Сар уӕ сӕр, динамонджытӕ ӕмӕ фарисейтӕ, дыдзӕсгӕмттӕ! Моисейы Ӕгъдаумӕ гӕсгӕ суанг битъына, хъонтхора ӕмӕ зирайӕ дӕсӕймаг хай дӕттут, йӕ ахъаззӕгтӕ та — рӕстдзинад, хӕрзаудӕн ӕмӕ уырнындзинад — ницӕмӕ дарут. Сымахӕн адӕттӕ кӕнын дӕр ӕмбӕлд ӕмӕ уын уыдӕттӕ дӕр рохуаты ныууадзын нӕ хъуыд.

²⁴ Куырм фӕтӕгтӕ! Сымах къогъойы фӕрсудзгӕ кӕнут, теуайы та аныхъуырут!

²⁵ Сар уӕ сӕр, динамонджытӕ ӕмӕ фарисейтӕ, дыдзӕсгӕмттӕ! Сымах къус ӕмӕ тӕбӕгъ ӕддӕрдыгӕй ссыгъдӕг кӕнут, мидӕгӕй та йедзаг сты, уӕ кӕрӕф ӕмӕ уе ’нӕфсисы руаджы уӕ къухы цы бафтыдис, уымӕй.

²⁶ Куырм фарисей! Раздӕр уал къус ӕмӕ тӕбӕгъ мидӕгӕй ссыгъдӕг кӕн, ӕмӕ уӕд ӕддейӕ дӕр сыгъдӕг уыдзысты.

²⁷ Сар уӕ сӕр, динамонджытӕ ӕмӕ фарисейтӕ, дыдзӕсгӕмттӕ! Сымах чъырӕйцагъд зӕппӕдзты хуызӕн стут — уыдон ӕддейӕ рӕсугъд зынынц, мидӕгӕй та йедзаг сты мӕрдты стджытӕ ӕмӕ алы чъизитӕй.

²⁸ Афтӕ сымах дӕр: уе ’ддаг бакастӕй адӕммӕ рӕстгӕнджытӕ зынут, мидӕгӕй та цӕстмӕми ӕмӕ тӕригъӕдӕй йедзаг стут.

²⁹ Сар уӕ сӕр, динамонджытӕ ӕмӕ фарисейтӕ, дыдзӕсгӕмттӕ! Пехуымпартӕн аразут зӕппӕдзтӕ, сфӕлындут рӕстгӕнджыты цыртытӕ

³⁰ ӕмӕ фӕзӕгъут: „Нӕ фыдӕлты заманы куы цардаиккам, уӕд мах пехуымпарты тугныккалды аххосджын нӕ уыдаиккам“.

³¹ Афтӕмӕй уӕхи ныхмӕ ӕвдисӕн лӕуут — пехуымпарты чи мардта, уыдонӕн сӕ байзӕддӕгтӕ кӕй стут.

³² Уӕдӕ бафтаут уӕ фыдӕлты азымыл.

³³ Кӕлмытӕ ӕмӕ калмы цот! Тӕрхон ӕмӕ зындонӕй куыд фервӕзынмӕ хъавут?

³⁴ Ӕрбайхъусут-ма! Мӕнӕ уӕм Ӕз ӕрвитын пехуымпарты, куырыхон адӕймӕгты ӕмӕ динамонджыты, ӕмӕ дзы сымах иуты амардзыстут ӕмӕ байтындздзыстут, иннӕты уӕ синагогӕты ехсӕй нӕмдзыстут ӕмӕ сӕ иу сахарӕй иннӕмӕ тӕрдзыстут.

³⁵ Уымӕ гӕсгӕ, зӕххыл цы раст адӕмы туг фӕкалди, уый уын иууылдӕр фидинаг фӕуыдзӕн: рӕстгӕнӕг Авелы тугӕй, суанг Кувӕндонӕй нывондхӕссӕны ӕхсӕн кӕй амардтат, уыцы Варахийы фырт Захариайы туджы онг.

³⁶ Ӕцӕг цы у, уый уын зӕгъын, ӕппӕт уыцы фыдракӕндты тыххӕй ацы фӕлтӕр баййафдзӕн ӕфхӕрд.

Йесойы хъарӕг Йерусалимыл

³⁷ Йерусалим, Йерусалим, пехуымпарты цӕгъдӕг ӕмӕ, кӕй йӕм ӕрвитынц, уыдоны дуртӕй марӕг! Цал хатты хъавыдтӕн, маргъ йӕ лӕппынты йӕ базырты бын куыд бакӕны, афтӕ дын дӕ хъӕбулты ӕрбамбырд кӕнын, фӕлӕ сымах нӕ бафӕндыди!

³⁸ Ныр уӕ хӕдзар ӕнӕхицау ӕмӕ афтидӕй зайы.

³⁹ Дзурын уын, цалынмӕ афтӕ зӕгъат: „Арфӕгонд уӕд Хуыцауы номӕй Ӕрцӕуӕг!“, уӕдмӕ Мӕ нал фендзыстут».