Марк 7 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Сыгъдӕгдзинады тыххӕй

¹ Фарисейтӕ, стӕй цалдӕр динамонӕджы Йерусалимӕй Йесомӕ ӕрбацыдысты.

² Йӕ ахуыргӕнинӕгтӕй Йын кӕйдӕрты федтой ӕнӕсыгъдӕг, ома ӕнӕхсад, къухтӕй хӕргӕ.

³ Фарисейтӕ та, ӕппӕт иудейӕгтау, фыдӕлты ӕгъдауыл хӕст сты ӕмӕ, цалынмӕ бӕлвырд фӕткмӕ гӕсгӕ сӕ къухтӕ цӕхсой, уӕдмӕ нӕ хӕрынц.

⁴ Базарӕй ӕрбацӕугӕйӕ дӕр, цалынмӕ ӕгъдаумӕ гӕсгӕ сӕхиуыл дон ӕркалой, уӕдмӕ нӕ бахӕрынц. Уымӕй уӕлдай ма сын ахсджиаг сты бирӕ ӕндӕр уагӕвӕрдтӕ: ӕхсынц къустӕ, дурынтӕ ӕмӕ ӕрхуы мигӕнӕнтӕ.

⁵ Фарисейтӕ ӕмӕ динамонджытӕ Йесойы бафарстой: «Дӕ ахуыргӕнинӕгтӕ фыдӕлты ӕгъдау цӕмӕн халынц, ӕнӕсыгъдӕг къухтӕй цӕмӕн хӕрынц?»

⁶ Йесо сын дзуапп радта: «Дыдзӕсгӕмттӕ, сымах тыххӕй пехуымпар Исайа хорз загъта. Йӕ чиныджы фыст ис: „Ацы адӕм Мын кад кӕнынц дзыхӕй, сӕ зӕрдӕ та дард у Мӕнӕй.

⁷ Дзӕгъӕлы Мӕм кувынц, уымӕн ӕмӕ, цы амонынц, уыдон адӕймаджы ӕрымысгӕ ӕгъдӕуттӕ сты“.

⁸ Сымах ныууагътат Хуыцауы фӕдзӕхст, адӕймаджы ӕрхъуыдыгонд ӕгъдӕуттыл та фидар хӕцут».

⁹ Ноджы ма сын загъта: «Уӕхи ӕгъдау ӕххӕст кӕныны тыххӕй Хуыцауы фӕдзӕхст аивынмӕ дӕсны стут.

¹⁰ Уымӕн ӕмӕ Моисей загъта: „Нымай дӕ фыд ӕмӕ дӕ мады“; ноджы ма: „Йӕ фыды кӕнӕ йӕ мады ӕфхӕрӕг амӕлӕд“.

¹¹ Сымах та дзурут, зӕгъгӕ, йӕ фыд кӕнӕ йӕ мадӕн афтӕ чи зӕгъа: „Мӕнӕй дӕм цы хауы, уый корбан (ома Хуыцауы номыл мысайнаг) у“,

¹² уымӕн бар дӕттут йӕ фыд кӕнӕ йӕ мадӕн хорзӕй мацы ракӕнын.

¹³ Афтӕмӕй Хуыцауы ныхас ивут уӕхи ӕвӕрд ӕгъдауӕй ӕмӕ ма ноджы бирӕ ӕндӕр ахӕм митӕ кӕнут».

¹⁴ Йесо ногӕй фӕсидти адӕммӕ ӕмӕ сын загъта: «Байхъусут Мӕм иууылдӕр ӕмӕ бамбарут!

¹⁵ Адӕймагӕн йӕ хуылфмӕ ӕддейӕ цы бацӕуы, уый йӕ нӕ фӕчъизи кӕны, фӕлӕ дзы ӕддӕмӕ цы рацӕуы, уый.

¹⁶ [Хъустӕ кӕуыл ис, уый хъусӕд!]»

¹⁷ Йесо адӕмы куы ныууагъта ӕмӕ хӕдзармӕ куы бацыди, уӕд Ӕй Йӕ ахуыргӕнинӕгтӕ бафарстой, уыцы фӕсномыг ныхас цы амоны, зӕгъгӕ.

¹⁸ Уый сын бауайдзӕф кодта: «Ау, сымах дӕр афтӕ ӕнӕмбаргӕ стут? Ӕви йӕ нӕ зонут, адӕймаджы хуылфмӕ ӕддейӕ цы бафты, уый йӕ кӕй нӕ фӕчъизи кӕны?

¹⁹ Уымӕн ӕмӕ бацӕуы йӕ зӕрдӕмӕ нӕ, фӕлӕ йӕ гуыбынмӕ, ӕмӕ стӕй рацӕуы ӕддӕмӕ». Уыцы ныхӕстӕй Йесо бамбарын кодта, алы хӕринаг дӕр сыгъдӕг кӕй у, уый.

²⁰ Ноджы ма загъта: «Зӕрдӕйӕ цы рацӕуы, уый фӕчъизи кӕны адӕймаджы.

²¹ Уымӕн ӕмӕ адӕймагӕн йӕ зӕрдӕйӕ цӕуынц фыдвӕндтӕ — давын, марын,

²² бинойнагыл сайдӕй цӕуын; кӕрӕф, фыдӕх, мӕнгарддзинад, хъахбайдзинад, хахуыр, хирвӕссондзинад, ӕдылы митӕ.

²³ Уыцы ӕвзӕрдзинӕдтӕ иууылдӕр зӕрдӕйӕ рацӕуынц ӕмӕ уыдон фӕчъизи кӕнынц адӕймаджы».

Муртаттаг сылгоймаджы чызг сдзӕбӕх

²⁴ Йесо уырдыгӕй ацыди Тиры зӕхмӕ. Уым иу хӕдзармӕ бацыд; фӕндыди Йӕ, уым ис, уый куы ничи базыдтаид, фӕлӕ уӕддӕр нӕ басусӕг ис.

²⁵ Йесойы ӕрбацыды кой уайтагъд фехъуыста, йӕ чызг хӕйрӕджы ахӕсты кӕмӕн уыд, иу ахӕм сылгоймаг. Уый ӕрбацыд ӕмӕ Йӕ къӕхтӕм ӕрӕппӕрста йӕхи.

²⁶ Уыцы сылгоймаг уыди Сириаг Финикийӕ, муртаттаг. Ӕмӕ Йесойӕн лӕгъстӕ кодта, мӕ чызджы мын дӕлимоны ахӕстӕй суӕгъд кӕн, зӕгъгӕ.

²⁷ Фӕлӕ йын Йесо загъта: «Раздӕр уал хъуамӕ сывӕллӕттӕ бафсӕдой. Сывӕллӕтты разӕй къӕбӕр райс ӕмӕ йӕ куыйтӕн аппар, уый хорз нӕу».

²⁸ Сылгоймаг Ын дзуапп радта: «О, Хицау, фӕлӕ куыйтӕ дӕр, сывӕллӕттӕй цы муртӕ ӕрхауы, уыдон фынджы бын ахӕрынц».

²⁹ Уӕд ын Йесо загъта: «Ахӕм дзуаппы фӕстӕ цу, дӕлимон рацыди дӕ чызгӕй».

³⁰ Сылгоймаг йӕ хӕдзармӕ куы ӕрбацыд, уӕд йӕ хъӕбулы баййӕфта хуыссӕны хуысгӕйӕ, дӕлимон ӕй ныууагъта.

Къӕзӕнӕг къуырма сдзӕбӕх

³¹ Тирӕй фӕстӕмӕ здӕхгӕйӕ, Йесо йӕ фӕндаг акодта Сидоныл ӕмӕ Дӕссахары уылты рахызти Галилейаг денджызы былмӕ.

³² Ӕрбакодтой Йӕм къӕзӕнӕг къуырма лӕджы ӕмӕ Дзы куырдтой, цӕмӕй йыл Йӕ къух авӕра.

³³ Йесо йӕ иуварс акодта адӕмӕй, Йе ’нгуылдзтӕ къуырмайы хъусты бавӕрдта, ӕрту кодта ӕмӕ йын бавнӕлдта йе ’взагмӕ.

³⁴ Уый фӕстӕ арвмӕ скасти, арф ныуулӕфыд ӕмӕ загъта: «Эффата», ома: «Байгом у».

³⁵ Уыйадыл къуырмайы хъустӕ байгом сты, йе ’взаг феуӕгъд ис, ӕмӕ райдыдта сыгъдӕг дзурын.

³⁶ Уӕд сын Йесо бафӕдзӕхста, цӕмӕй уыцы хабар макӕмӕн радзурой. Фӕлӕ сын цас тынгдӕр фӕдзӕхста, уыйас ӕй тынгдӕр айхъуысын кодтой.

³⁷ Адӕмы дисӕн кӕрон нал уыд, ӕмӕ дзырдтой: «Хорз кӕны алцы дӕр: къуырматӕн дӕр байгом кӕны сӕ хъустӕ, къуыттыты дӕр сдзурын кӕны».