Марк 5 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Хӕйрӕджджын сдзӕбӕх

¹ Бахӕццӕ сты денджызы иннӕ фарсмӕ, Герасины бӕстӕм.

² Йесо куыддӕр бӕлӕгъӕй рахызт, афтӕ уӕлмӕрдтӕй Йӕ размӕ рацыди хӕйрӕджджын лӕг.

³ Уый царди зӕппӕдзты, ӕмӕ йӕ суанг рӕхыстӕй сбӕттын дӕр ничи фӕрӕзта,

⁴ уымӕн ӕмӕ-иу ыл бирӕ хӕттыты хъадамантӕ бакодтой ӕмӕ-иу ӕй рӕхыстӕй сбастой, фӕлӕ-иу уый арӕдывта йӕ рӕхыстӕ ӕмӕ-иу йӕ хъадамантӕ ныссаста. Йӕ басӕттыны хъару никӕмӕ уыди.

⁵ Иудадзыг, ӕхсӕвӕй-бонӕй, йӕ хъӕрахст цыди зӕппӕдзтӕ ӕмӕ хӕхтӕй, йӕхи дуртыл хоста.

⁶ Йесойы дардмӕ куы ауыдта, уӕд Ӕм ӕрбазгъордта, Йӕ разы ныддӕлгом ис зӕххыл

⁷ ӕмӕ ныхъхъӕр кодта: «Цы Дӕ хъӕуы мӕнӕй, Йесо, Иууылбӕрзонд Хуыцауы Фырт? Хуыцауы хатырӕй, хъизӕмарӕй мӕ ма мар!»

⁸ Афтӕ та уымӕн дзырдта, ӕмӕ йын Йесо загъта: «Ӕнӕзӕгъинаг, ныууадз ацы лӕджы».

⁹ Йесо йӕ бафарста: «Дӕ ном куыд у?» Уый Йын загъта: «Мӕ ном — легион, уымӕн ӕмӕ мах бирӕ стӕм».

¹⁰ Ӕмӕ лӕгъстӕ кодта Йесойӕн, цӕмӕй сӕ уыцы бӕстӕй ма фӕсура.

¹¹ Уым къуылдымыл хызти хуыты стыр дзуг,

¹² ӕмӕ дӕлимонтӕ Йесойӕн лӕгъстӕ кодтой, хуытӕм нӕ барвит ӕмӕ сӕ мидӕг бацӕуӕм, зӕгъгӕ.

¹³ Йесо сын бар радта. Ӕнӕзӕгъинӕгтӕ фӕуагътой лӕджы ӕмӕ хуыты фӕмидӕг сты. Уыйадыл дзуг (уыдаид дзы иу-дыууӕ мины бӕрц) къардиуӕй денджызмӕ йӕхи фехста ӕмӕ фӕдӕлдон ис.

¹⁴ Хуыгӕстӕ азгъордтой ӕмӕ хабар сахар ӕмӕ йӕ алфамбылай хъӕутыл айхъуысын кодтой. Ӕмӕ адӕм, цы ӕрцыди, уый фенынмӕ рацыдысты.

¹⁵ Йесойы размӕ куы бахӕццӕ сты, уӕд кӕсынц, ӕмӕ, дӕлимонты легион кӕй мидӕг уыди, уыцы лӕг бады, йӕ дарӕс — йӕ уӕлӕ, йӕ зонд — йӕхимӕ, афтӕмӕй. Ӕмӕ старстысты.

¹⁶ Хъуыддаг йӕхи цӕстӕй чи федта, уыдон сын хӕйрӕджджын ӕмӕ хуыты хабар ракодтой.

¹⁷ Уӕд ӕрхатыдысты Йесомӕ, цӕмӕй сӕ зӕххӕй ацӕуа.

¹⁸ Йесо бӕлӕгъмӕ куы бацӕйхызт, уӕд Ӕм, дӕлимонты ахӕстӕй кӕй фервӕзын кодта, уыцы лӕг ныххатыди, Демӕ мӕ ауадз, зӕгъгӕ.

¹⁹ Фӕлӕ Йесо не сразы ис ӕмӕ йын загъта: «Ацу хӕдзармӕ, дӕ бинонтӕм. Радзур сын, Дунедарӕг дын цы сарӕзта ӕмӕ дын куыд батӕригъӕд кодта, уый».

²⁰ Уый ацыд ӕмӕ Дӕссахарыл айхъуысын кодта, Йесо йын цы сарӕзта, уый. Ӕмӕ иууылдӕр стыр дисы бафтыдысты.

Чызг райгас, сылгоймаг адзӕбӕх

²¹ Йесо бӕлӕгъы фӕстӕмӕ денджызы иннӕ фарсмӕ куы ӕрбаздӕхт, уӕд Йӕ алыварс ӕрбамбырд ис бирӕ адӕм. Денджызы был ма уыди,

²² афтӕ Йӕм ӕрбацыди синагогӕйы хицӕуттӕй иу, Иаир, зӕгъгӕ. Йесойы куы федта, уӕд Ын Йӕ къӕхтӕм йӕхи ӕрӕппӕрста

²³ ӕмӕ Йын балӕгъстӕ кодта: «Мӕ чызг мӕлгӕ кӕны; ӕрцу ӕмӕ йыл Дӕ къухтӕ авӕр, цӕмӕй сдзӕбӕх уа ӕмӕ цӕра».

²⁴ Йесо араст ис йемӕ. Йӕ фӕдыл цыди бирӕ адӕм ӕмӕ Йӕ алырдыгӕй уынгӕг кодтой.

²⁵ Иу сылгоймагӕн дыууадӕс азы йӕ туг цӕуынӕй не ’нцади.

²⁶ Бирӕ дохтыртӕ йын бирӕ хъизӕмар бавзарын кодтой, цыдӕриддӕр ӕм уыди, уый бахардз кодта, фӕлӕ, фыддӕр уавӕрмӕ цы ӕрцыд, уый йеддӕмӕ йын ӕххуыс ницы фесты.

²⁷ Йесойы кой куы фехъуыста, уӕд Ӕм адӕмы ӕхсӕнты фӕстӕрдыгӕй бацыд ӕмӕ Йын Йӕ дарӕсыл андзӕвыд,

²⁸ уымӕн ӕмӕ хинымӕр дзырдта: «Ӕрмӕст Йӕ дарӕсыл Ын куы андзӕвон, уӕд дӕр сдзӕбӕх уыдзынӕн».

²⁹ Туг уайтагъд йӕ цӕуынӕй банцад, ӕмӕ сылгоймаг банкъардта, йӕ низӕй кӕй фервӕзти, уый.

³⁰ Уыцы уысм Йесо, тых Дзы кӕй рацыди, уый банкъардта, адӕммӕ разылд ӕмӕ бафарста: «Чи Мын андзӕвыд Мӕ дарӕсыл?»

³¹ Йӕ ахуыргӕнинӕгтӕ Йын дзуапп радтой: «Адӕм Дӕ алырдыгӕй куыд ӕлхъивынц, уый уыныс, уӕддӕр ма фӕрсыс, чи Мыл андзӕвыди, зӕгъгӕ».

³² Фӕлӕ Йесо, чи Йыл андзӕвыд, уыцы сылгоймаджы адӕмы ’хсӕн цӕстӕй агуырдта.

³³ Сылгоймаг, цы йыл ӕрцыди, уый зонгӕйӕ, тӕрсгӕ-ризгӕйӕ бацыди Йесомӕ, Йӕ къӕхты бынмӕ ӕрхауди ӕмӕ Йын алцы дӕр, куыд уыди, афтӕ радзырдта.

³⁴ Уӕд ын Йесо загъта: «Мӕ чызг, дӕ уырнындзинад дӕ фервӕзын кодта. Цу фарнимӕ ӕмӕ ӕнӕниз у».

³⁵ Йесо Йӕ ныхас нӕма фӕци, афтӕ синагогӕйы хицаумӕ ӕрбацыдысты йӕ хӕдзарӕй ӕмӕ йын загътой: «Дӕ чызг амард. Ахуыргӕнӕджы ма цы фӕлмӕцын кӕныс?»

³⁶ Фӕлӕ Йесо уыцы ныхӕстӕ куы фехъуыста, уӕд синагогӕйы хицауӕн загъта: «Ма тӕрс, ӕрмӕст ӕууӕнд».

³⁷ Ӕмӕ Йемӕ ацӕуын никӕй бауагъта, Петр, Йаков ӕмӕ Йаковы ӕфсымӕр Иоанны йеддӕмӕ.

³⁸ Синагогӕйы хицауы хӕдзармӕ бацыдысты. Йесо дзы баййӕфта бирӕ адӕмы, кӕугӕ ӕмӕ дзыназгӕйӕ.

³⁹ Бацыди ӕмӕ сын загъта: «Цы маст кӕнут, цӕуыл кӕут? Сывӕллон мард нӕу, фынӕй кӕны».

⁴⁰ Ӕмӕ Йыл худтысты. Фӕлӕ Йесо се ’ппӕты дӕр ӕддӕмӕ рарвыста, Йӕхӕдӕг чызджы фыд, мад ӕмӕ Йе ’мбӕлццӕттимӕ сывӕллоны уатмӕ бацыди.

⁴¹ Йӕ къухыл ын ныххӕцыд ӕмӕ йын загъта: «Талита, кум», ома: «Чызг, дӕумӕ дзурын, сыст».

⁴² Ӕмӕ чызг — цыдаид ыл иу дыууадӕс азы — уайтагъд фестад ӕмӕ йӕ къӕхтыл алӕууыд. Ӕмӕ се ’ппӕт дӕр стыр дисы бафтыдысты.

⁴³ Йесо сын тынг ныффӕдзӕхста, ацы хабар мачи базонӕд, зӕгъгӕ. Стӕй ма сын загъта, цӕмӕй чызгӕн исты бахӕрын кӕной.