Марк 4 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Хортауӕджы ӕмбисонд

¹ Ӕмӕ та Йесо денджызы был ногӕй адӕмы райдыдта ахуыр кӕнын. Тынг бирӕ адӕм ӕрбамбырд ис йӕ алыварс. Уӕд Йесо бӕлӕгъмӕ бахызт ӕмӕ уым ӕрбадти, адӕм та иууылдӕр былгӕрон уыдысты.

² Ӕмӕ сын фӕсномыгӕй бирӕ фӕцамыдта, ахуыр сӕ кодта:

³ «Ӕрбайхъусут-ма: мӕнӕ хортауӕг тауынмӕ рацыд.

⁴ Таугӕ-тауын нӕмгуытӕй иутӕ ӕрхаудысты фӕндаггӕрон, ӕртахтысты мӕргътӕ ӕмӕ сӕ рауыгътой.

⁵ Ӕрхауди дзы, сыджыт фаг кӕм нӕ уыдис, ахӕм дурджын ран дӕр, ӕмӕ уайтагъд сӕвзӕрдысты, уымӕн ӕмӕ зӕхх арф нӕ уыди.

⁶ Фӕлӕ хур куы скасти, уӕд сӕ асыгъта, ӕмӕ бахус сты, уымӕн ӕмӕ сӕ уидаг фидар нӕ уыд.

⁷ Цасдӕр дзы ӕрхауди сындзыты ӕхсӕн; сындзытӕ сырӕзтысты ӕмӕ сӕ фӕбынӕй кодтой, ӕмӕ нӕмгуытӕ тыллӕг нӕ радтой.

⁸ Иннӕтӕ та ӕрхаудысты бӕзнаг мӕрыл. Сӕхиуыл куы схӕцыдысты ӕмӕ рӕз куы схастой, уӕд тыллӕг радтой: иутӕ — дӕс ӕмӕ ссӕдз хатты, иннӕтӕ — ӕртиссӕдз хатты, аннӕтӕ та — фондзыссӕдз хатты фылдӕр».

⁹ Ӕмӕ ма сын ноджы загъта: «Хъустӕ кӕуыл ис, уый хъусӕд!»

¹⁰ Адӕм куы ацыдысты, уӕд Ӕй дыууадӕс ахуыргӕнинаджы ӕмӕ ма уым семӕ чи баззади, уыдон бафарстой, фӕсномыгӕй цӕмӕн дзурыс, зӕгъгӕ.

¹¹ Йесо сын загъта: «Сымахӕн лӕвӕрд у Хуыцауы Паддзахады сусӕгдзинад зонын, уыдонӕн та, ӕддагӕттӕн, ӕппӕт дӕр фӕсномыгӕй амындӕуы,

¹² уымӕн ӕмӕ „сӕ цӕстӕй кӕсынц, фӕлӕ нӕ уынынц, хъусӕй хъусынц, фӕлӕ не ’мбарынц. Хуыцаумӕ се ’ргом куы раздахиккой, уӕд сын барст ӕрцӕуиккой сӕ тӕригъӕдтӕ“».

¹³ Загъта ма сын: «Кӕд ацы фӕсномыг ныхас не ’мбарут, уӕд иннӕ ӕмбисӕндтӕ та куыд бамбардзыстут?

¹⁴ Тауӕг ныхас тауы.

¹⁵ Фӕндаггӕрон цы нӕмгуытӕ ӕрхауди, уыдоны ӕнгӕс сты ахӕм адӕймӕгтӕ: куыддӕр ныхас фехъусынц, афтӕ сайтан сӕ уӕлхъус алӕууы ӕмӕ сын ӕй аскъӕфы сӕ зӕрдӕйӕ.

¹⁶ Дурджын ран кӕй байтыдӕуыд, уыдоны ӕнгӕс та сты ахӕм адӕймӕгтӕ: куыддӕр ныхас фехъусынц, афтӕ йӕ, цингӕнгӕ, сӕ зӕрдӕмӕ айсынц,

¹⁷ фӕлӕ ӕнӕуидаг сты, ӕмӕ сын бирӕ нӕ ахӕссы. Тыхст рӕстӕг куы ралӕууы, кӕнӕ Хуыцауы ныхасы тыххӕй ӕфхӕрын куы райдайынц, уӕд уайтагъд ныууадзынц сӕ уырнындзинад.

¹⁸ Сындзыты ӕхсӕн цы нӕмгуытӕ байтыдӕуыд, уыдон та сты ахӕм адӕймӕгтӕ: фехъусынц ныхас,

¹⁹ фӕлӕ сын ӕй зӕххон царды мӕт, мулчы бӕллиц ӕмӕ ӕндӕр ахӕм монцтӕ сӕ быны фӕкӕнынц, ӕмӕ пайда нӕ ратты.

²⁰ Бӕзнаг мӕрыл цы нӕмгуытӕ байтыдӕуыд, уыдон та сты, ныхас чи фехъусы, йӕ зӕрдӕмӕ чи айсы, ахӕм адӕймӕгтӕ: сӕ иу пайда ратты дӕс ӕмӕ ссӕдз хатты, иннӕ — ӕртиссӕдз хатты, аннӕ та — фондзыссӕдз хатты фылдӕр».

Фӕсномыг ныхас цырагъы тыххӕй

²¹ Йесо сын загъта: «Цырагъ агъуыстмӕ, мыййаг, уый тыххӕй бахӕссынц, цӕмӕй йӕ дурыны кӕнӕ сынтӕджы бын бавӕрой? Цырагъдарӕныл ӕй нӕ сӕвӕрынц?

²² Ахӕм сусӕгдзинад нӕй, ӕмӕ ма рахъӕр уа; афтӕ бамбӕхсӕн ницы ис, ӕмӕ ма раргом уа.

²³ Хъустӕ кӕуыл ис, уый хъусӕд!»

²⁴ Ӕмӕ сын бафӕдзӕхста: «Цы хъусут, ууыл-иу ахъуыды кӕнут. Цы барӕнӕй барут, уыцы барӕнӕй сбардзысты сымахӕн дӕр ӕмӕ ма уын ыл ноджыдӕр бафтаудзысты.

²⁵ Уымӕн ӕмӕ, кӕмӕ ис, уымӕн рардӕуыдзӕн, кӕмӕ нӕй, уымӕй та, цы йӕм ис, уый дӕр ист ӕрцӕудзӕни».

Фӕсномыг ныхас тауинаг ӕмӕ ӕвзарты тыххӕй

²⁶ Йесо загъта: «Уӕларвон Паддзахад, адӕймаг зӕххы хоры нӕмыг куыд байтауы, уый ӕнгӕс у.

²⁷ Ӕхсӕвыгон кӕны фынӕй, бонӕй та сысты; уӕдмӕ мыггаг суадзы ӕвзар ӕмӕ рӕзы — куыд, уый та адӕймаг зонгӕ дӕр нӕ кӕны.

²⁸ Уымӕн ӕмӕ зӕхх тыллӕг йӕхӕдӕг ратты: раздӕр ссӕуы ӕвзар, уый фӕстӕ фӕзыны ӕфсир, стӕй ӕфсиры нӕмыг ныннӕрсы.

²⁹ Хор куы сцӕттӕ вӕййы, уӕд ыл адӕймаг ӕвӕстиатӕй рауадзы ӕхсырф, уымӕн ӕмӕ хуымгӕрдӕн афон ралӕууыд».

Фӕсномыг ныхас хъыцъыйы нӕмыджы тыххӕй

³⁰ Йесо дзырдта дарддӕр: «Цӕимӕ абарӕм Хуыцауы Паддзахад, цавӕр фӕсномыг ныхасӕй йӕ равдисӕм?

³¹ Уый у хъыцъыйы нӕмыгау. Тауинӕгты ӕхсӕн йӕ гагайӕ къаддӕр нӕй.

³² Куы йӕ байтауынц ӕмӕ куы сзайы, уӕд та цӕхӕрадоны зайӕгойтӕн се ’ппӕты сӕрты акӕсы, йе стыр къабузты аууоны уӕларвон мӕргътӕн сӕ бон вӕййы ахстӕттӕ скӕнын».

³³ Ахӕм ӕмбисӕндтӕй сын Йесо, сӕ бон бамбарын цас уыди, уыйас амыдта.

³⁴ Ӕнӕ фӕсномыг ныхасӕй сын ницы дзырдта, Йӕ ахуыргӕнинӕгтӕн та алцыдӕр хибарӕй ӕмбарын кодта.

Уад ӕмӕ денджыз Йесойы коммӕ кӕсынц

³⁵ Уыцы бон изӕрӕй Йесо Йӕ ахуыргӕнинӕгтӕн загъта: «Ахизӕм денджызы фаллаг фарсмӕ».

³⁶ Ахуыргӕнинӕгтӕ ауагътой адӕмы, Йесоимӕ бӕлӕгъы сбадтысты ӕмӕ араст сты. Адӕм дӕр бӕлӕгъты рацыдысты Йӕ фӕдыл. Уым ма уыди ӕндӕр бӕлӕгътӕ дӕр.

³⁷ Ӕвиппайды уаддымгӕ сыстад. Уылӕнтӕ бӕлӕгъыл сӕхи цавтой, ӕмӕ бӕлӕгъ донӕй дзаг кӕнын райдыдта.

³⁸ Йесо та бӕлӕгъы кӕрон фынӕй кодта, Йӕ сӕр бӕлӕгъы базыл сӕвӕрдта, афтӕмӕй. Райхъал Ӕй кодтой ӕмӕ Йын загътой: «Ахуыргӕнӕг, сӕфгӕ куы кӕнӕм, уӕд ныл Ды цӕуылнӕ мӕт кӕныс?»

³⁹ Йесо сыстади, уад басабыр кодта ӕмӕ денджызӕн загъта: «Ӕрӕнцай, ныссабыр у!» Уад банцад, ӕмӕ бӕстӕ ныссабыр ис.

⁴⁰ Йесо Йӕ ахуыргӕнинӕгтӕн загъта: «Ахӕм тӕппуд цӕмӕн стут? Ныр дӕр ма уӕ нӕ уырны?»

⁴¹ Уыдон стыр тасы бацыдысты ӕмӕ кӕрӕдзийӕн дзырдтой: «Уый Чи уа, уад ӕмӕ денджыз Кӕй коммӕ кӕсынц?»