Левит 3 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Фидыды нывӕндтӕ

¹ Исчи фидыды нывонд стурвосӕй куы хӕсса, гал кӕнӕ хъуг, уӕд Дунедарӕджы размӕ ӕрбакӕнӕд ӕнӕсахъат кусӕрттаг.

² Йӕ къух ын йӕ сӕрыл ӕрӕвӕрӕд ӕмӕ йӕ Фембӕлды Цатыры къӕсӕры цур аргӕвдӕд. Аароны байзӕддӕгтӕ, сауджынтӕ та йын йӕ туг нывондхӕссӕныл алырдыгӕй бапырх кӕнӕнт.

³ Фидыды нывондӕн йӕ хуылфыдзаумӕтты фиу иууылдӕр Дунедарӕгӕн ӕрхӕссӕд арты нывондӕн,

⁴ стӕй уыргтӕ дӕр, ӕгъдтыл цы фиу ис, уыимӕ. Уыргтимӕ рахицӕн кӕнын хъӕуы игӕры ӕфтуанхай дӕр.

⁵ Аароны байзӕддӕгтӕ уыдон иууылдӕр нывондхӕссӕныл басудзӕнт, сугты сӕрыл цы иууылсудзинаг ӕвӕрд ис, уыимӕ, — уый у арты нывонд, Дунедарӕгӕн ӕхцон хӕрздӕф.

⁶ Дунедарӕгӕн фидыды нывонд чи хӕсса лыстӕг фосӕй — мадӕл кӕнӕ нӕл, уый-иу ӕрбакӕнӕд ӕнӕсахъат кусӕрттаг.

⁷ Фыс куы хӕсса нывондӕн, уӕд ӕй ӕрбакӕнӕд Дунедарӕджы размӕ.

⁸ Йӕ къух ын йӕ сӕрыл ӕрӕвӕрӕд ӕмӕ йӕ Фембӕлды Цатыры цур аргӕвдӕд, стӕй йын Аароны байзӕддӕгтӕ йӕ туг нывондхӕссӕныл алырдыгӕй бапырх кӕнӕнт.

⁹ Фидыды нывондӕн йӕ фиу иууылдӕр Дунедарӕгӕн арты нывондӕн ӕрхӕссӕд: кусарты дымӕг ӕнӕхъӕнӕй (йӕ тӕккӕ рӕбыныл ӕй рагъыстӕгӕй фӕхицӕн кӕнӕд, афтӕмӕй), хуылфыдзаумӕтты фиу,

¹⁰ уыргтӕ ӕд фиу, ӕгъдтыл цы фиу ис, уый, стӕй игӕры ӕфтуанхай.

¹¹ Сауджын сӕ нывондхӕссӕныл басудзӕд. Уыдон арты хойраг сты — Дунедарӕгӕн хаст нывонд.

¹² Сӕгъ нывондӕн чи хӕсса, уый йӕ Дунедарӕджы размӕ ӕрбакӕнӕд.

¹³ Йӕ къух ын йӕ сӕрыл ӕрӕвӕрӕд ӕмӕ йӕ Фембӕлды цатыры цур аргӕвдӕд, стӕй йын Аароны байзӕддӕгтӕ йӕ туг нывондхӕссӕныл алырдыгӕй бапырх кӕнӕнт.

¹⁴ Хуылфыдзаумӕтты фиу иууылдӕр Дунедарӕгӕн арты нывондӕн ӕрхӕссӕд,

¹⁵ стӕй уыргтӕ, ӕгъдтыл цы фиу ис, уыимӕ, ӕмӕ игӕры ӕфтуанхай.

¹⁶ Сауджын сӕ нывондхӕссӕныл басудзӕд. Уыдон сты арты хойраг — Дунедарӕгӕн ӕхцон хӕрздӕфӕн. Фиутӕ иууылдӕр Дунедарӕджы хай сты.

¹⁷ Уый уын — мыггагмӕйы уагӕвӕрд, фӕлтӕрӕй-фӕлтӕрмӕ: кӕмдӕриддӕр цӕрат, кусарты фиутӕ ӕмӕ тугӕй уӕхи макуы фӕхъӕстӕ кӕнут».