Хъарӕг 5 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ О Дунедарӕг! Ӕрымыс нӕ, ӕркӕс нӕм, нӕ худинаг нын фен!

² Нӕ исбон не знӕгтӕм куы ’рхауди, нӕ хӕдзӕрттӕ — ӕцӕгӕлӕттӕм!

³ Куы баззадыстӕм сидзӕртӕй, ӕнӕ фыдӕй, нӕ мадӕлтӕ идӕдзтӕ систы!

⁴ Куы ’лхӕнӕм доны хъуыртт ӕхцайӕ, нӕхи сугӕн куы фидӕм!

⁵ Хӕстӕг у не знаг, басаста нын нӕ хъару. О, сулӕфын куынӕуал у нӕ бон!

⁶ Мысырӕгтӕй, ассириӕгтӕй ӕххуыс куы агурӕм, цӕмӕй къӕбӕрӕй бафсӕдӕм!

⁷ Нӕ фыдӕлтӕ тӕригъӕдтӕ фӕкодтой, ныр уыдон нал сты, фӕлӕ сӕ фидӕм мах!

⁸ Цагъайрӕгтӕ нын хицӕуттӕ куы систы, фервӕзын сӕ куынӕуал у нӕ бон!

⁹ Нӕ цардыл н’ ауӕрдгӕйӕ, агурӕм къӕбӕр: ӕдзӕрӕг быдыры нӕ фӕдыл зилы кард!

¹⁰ Цыма нӕ ’фсӕйнаг пецы басыгъдӕуыд, уыйау ӕххормагӕй нӕ царм ныссау ис!

¹¹ Сионы худинаг кӕнынц нӕ устыты, иудейаг сахарты — нӕ чызджыты!

¹² Фыдгултӕ нын ӕрцауыгътой нӕ фӕтӕгты, сӕгад сты нӕ хистӕртӕ!

¹³ Нӕ тырынтӕ куыройы фыдтӕ зилынц, фӕкӕлынц сугты бын нӕ лӕппутӕ!

¹⁴ Кулдуары раз нал бадынц нӕ зӕрӕдтӕ, нӕ зарынц лӕппутӕ!

¹⁵ Нӕ зӕрдӕты куы амард цин, нӕ кафт куы раивта кӕуынӕй!

¹⁶ Нӕ кады худтӕ куы ’рхаудысты нӕ сӕртӕй! О, додойаг куы фестӕм мах нӕ тӕригъӕды аххосӕй!

¹⁷ Нӕ зӕрдӕтӕ фӕйнӕрдӕм тонынц, нӕ цӕстыты рухс бамынӕг.

¹⁸ О, сафтид ис Сионы хох, хъӕддаг куыйтӕ йыл зилынц!

¹⁹ О Дунедарӕг! Ды паддзахиуӕг кӕныс ӕнусмӕ! Дӕ паддзахы бадӕн — мыггагӕй мыггагмӕ!

²⁰ Цӕмӕн нӕ ныууагътай уый бӕрц рӕстӕгмӕ? Цӕуылнӕ нӕ ӕрымысыдтӕ ныронг?

²¹ О Дунедарӕг! Раздах нӕ Дӕхимӕ, ӕмӕ уӕд раздӕхдзыстӕм. О, ратт нын ногӕй рагзаманты цард!

²² Ау, бынтон нӕ аппӕрстай Дӕхицӕй? Дӕ мастӕн нӕй кӕрон?