Хъарӕг 3 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Уӕ, додойаг куыд фӕдӕн! Йӕ мастисӕн лӕдзӕгӕй мӕ фӕсырдта Дунедарӕг!

² Уӕ, саудалынгмӕ мӕ куы ’ркодта!

³ Ӕрвылбон мӕ куы ’фхӕры,

⁴ куы мӕ ’ргӕвды, куы мын ныззыгуым кодта ме стджытӕ!

⁵ Куы ’ртыхст мӕ алыварс, уӕ, удхарӕй мӕ мары!

⁶ Куы мӕ ныппӕрста талынгмӕ ӕнусмӕ, цыма ингӕны дӕн мардау!

⁷ Мӕ алыварс куы самадта быру, — нӕй рацӕуӕн, рӕхыстӕй мӕ куы сбаста!

⁸ Ӕз хъӕр кӕнын ӕмӕ дзыназын: мӕ куывд Ӕй фехъусын нӕ фӕнды.

⁹ Уӕ, дуртӕ мын куы самадта мӕ размӕ, ныссуйтӕ мын кодта мӕ фӕндӕгтӕ!

¹⁰ Тӕссаг у, цыма арс, йе та домбай йӕ амӕттаджы хъахъхъӕны!

¹¹ Уӕ, дунетыл Йӕ фӕндонӕй куы хӕтын, куы сдзӕгъӕл кодта, иунӕгӕй мӕ куы ныууагъта!

¹² Нылвӕста Йе ’рдын, сарӕзта мӕ мил,

¹³ Йӕ фӕттӕ мын куы ныссагъта мӕ уыргты!

¹⁴ Мӕ адӕмӕн ӕз хъазинаг куы сдӕн, куы кӕнынц алы бон мӕ фыдгой!

¹⁵ Уӕ, мастӕй мӕ куы бафсӕста, куы мӕ бафсӕста скъӕлдзойӕ!

¹⁶ Куы мын фӕхӕрын кодта дуртӕ, мӕ дзых мын байдзаг кодта рыгӕй!

¹⁷ Уӕ, амонд байстай Ды мӕ цардӕй, ӕз ферох кодтон циндзинад!

¹⁸ Уӕд загътон ӕз: «О, фесӕфти мӕ хъару, мӕ зӕрдӕдарӕн Дунедарӕг нал у!»

¹⁹ О, ӕркӕс мӕ саубонмӕ, куыд рафт-бафт кӕнын, уымӕ! Мӕ фӕндӕгтӕ ныссуйтӕ сты, ӕркӕс мӕм! Куы байдзаг дӕн скъӕлдзо ӕмӕ мастӕй!

²⁰ Мӕ хъизӕмар мӕ удӕй рох нӕма у,

²¹ фӕлӕ мын ис зӕрдӕдарӕн, ӕмӕ мӕхицӕн раттын дзуапп:

²² «Дунедарӕгӕн Йӕ хӕрзаудӕн нӕ сысы, Йӕ хорзӕх нӕ сӕфы —

²³ ӕрвылбон ногӕй суадзынц талатӕ».

²⁴ Дунедарӕг — мӕ исбон, мӕ зӕрдӕ Йыл дардзынӕн.

^25-26 Дунедарӕг кӕмӕн у йӕ ныфс, кӕй йӕ фервӕзын кӕндзӕн, ууыл ӕмырӕй чи дары йӕ зӕрдӕ, Йӕ хорзӕхӕй схайджын кӕндзӕн уый!

²⁷ Ӕвзонджы бонтӕй чи хӕссы йӕ уаргъ, уый Дунедарӕгӕн Йӕ хорзӕх айсдзӕн.

²⁸ Ӕдзӕмӕй бады иунӕгӕй: йӕ уаргъ ыл Дунедарӕг сӕвӕрдта.

²⁹ Ныддӕлгом ис зӕххыл: «Кӕд ис нырма, мыййаг, зӕрдӕ дарӕн?»

³⁰ Йӕ ныццӕвӕгмӕ бадардта йӕ рус. О, худинаджы бын куы фӕци!

³¹ Дунедарӕг Йе ’ргом ӕнусмӕ нӕ аздӕхта!

³² Хъизӕмар нын бавзарын кодта, фӕлӕ та ныббардзӕнис: ӕгӕрон у Йӕ хорзӕх!

³³ Ӕвӕндонӕй Уый адӕймаджы бафхӕры, фӕриссын ын кӕны йӕ зӕрдӕ.

³⁴ Уацайрӕгты къӕхты бын куы бассӕндынц,

³⁵ Иууылбӕрзонды раз раст тӕрхон куынӕуал фӕкӕнынц,

³⁶ тӕрхондоны куы асайынц лӕджы, уӕд Дунедарӕг уыдӕттӕ нӕ зоны?

³⁷ Кӕй бон ма у ӕрмӕст зӕгъын, цӕмӕй Йӕ ныхас сӕххӕст уа? Йӕ бар нӕ цӕуы алцӕуыл?

³⁸ Фарн дӕр ӕмӕ бӕллӕх дӕр Стыр Хуыцауы ныхасӕй не ’рцӕуынц?

³⁹ Сӕ тӕригъӕд куы бафидынц ӕфхӕрдӕй, уӕд ма куыд хъуамӕ рахъаст кӕной адӕм?!

⁴⁰ Фӕндаг ссарӕм, Дунедарӕгмӕ раздӕхӕм,

⁴¹ нӕ къухтӕ ӕмӕ нӕ зӕрдӕтӕ уӕларвы Хуыцаумӕ сивазӕм!

⁴² Тӕригъӕдтӕ фӕкодтам, нӕ Дӕм хъуыстам, — Ды нын нӕ ныббарстай!

⁴³ Дӕ маст ссыгъд, ӕмӕ нӕ сурыс, ӕгъатырӕй нӕ сафыс!

⁴⁴ Ӕврӕгъты сӕрмӕ бамбӕхстӕ, нӕ нын хъусыс нӕ куывд!

⁴⁵ Ныр адӕмты ’хсӕн — чъизи ӕмӕ ’лгъаг,

⁴⁶ ныххӕлиу кодтой не знӕгтӕ сӕ дзыхтӕ, цӕмӕй нӕ аскъуыдтӕ кӕной!

⁴⁷ Хъоргъ ӕмӕ ӕвирхъау тас — нӕ хал. О, сӕфт, бӕллӕх!

⁴⁸ Мӕ цӕссыг ранхъӕвзы донау — мӕ адӕмы чызг сӕфы!

⁴⁹ Кӕлы мӕ цӕстысыг, о, нӕй йын байсысӕн,

⁵⁰ куы не ’ркӕса уӕларвӕй Дунедарӕг, мӕ хъизӕмар мын цалынмӕ нӕ фена!

⁵¹ Мӕ зӕрдӕ фыр рыстӕй фӕцӕйтоны, куы бакӕсын мӕ сахары чызджытӕм!

⁵² Ӕнаххос маргъы фӕдыл зилӕгау мӕ фӕдыл зилы знаг!

⁵³ Удӕгасӕй мӕ дзыхъмӕ ныппӕрстой, йӕ сӕр ын дурӕй сӕхгӕдтой!

⁵⁴ Цӕугӕдӕттӕ мӕ сӕрмӕ схӕццӕ сты, ныцъцъӕхахст кодтон: «Уӕ, ӕрцыди ме сӕфт!»

⁵⁵ О Дунедарӕг, арф дзыхъхъӕй Дӕм кувын!

⁵⁶ Мӕ хъӕлӕс мын куы хъусыс, о, фехъус мын мӕ куывд ӕмӕ мӕ хъӕрзын!

⁵⁷ О, дзуапп куы раттис ды мӕнӕн, куы зӕгъис: «Ма тӕрс!»

⁵⁸ О Дунедарӕг, раст тӕрхон мын рахӕсс! О, фервӕзын мӕ кӕн!

⁵⁹ О Дунедарӕг, ме ’фхӕрд мын куы уыныс! Тӕрхонгӕнӕг мын у!

⁶⁰ Ды уыныс, куыд саузӕрдӕ сты ме знӕгтӕ, зоныс сын сӕ сау фӕндтӕ.

⁶¹ Дунедарӕг, хынджылӕг мӕ куыд кӕнынц, уый куы хъусыс, сӕ фыдвӕндтӕ сын зоныс.

⁶² Сӕхи мыл худӕгӕй хӕссынц, кӕнынц мӕ фыдгой алы бон.

⁶³ Ӕркӕс-ма: бадгӕ кӕной ӕви сыстой — мӕныл худынц ӕдзухдӕр!

⁶⁴ О Дунедарӕг! Стӕрхон сын кӕн, курын, сӕ хъуыддӕгтӕм гӕсгӕ сӕ бафхӕр!

⁶⁵ О, сӕрра уӕнт, ӕлгъыстаг сӕ фӕкӕн!

⁶⁶ О Дунедарӕг, зил сӕ фӕдыл, бынысӕфт сӕ фӕкӕн! Сӕ кой дӕр мауал уӕд Дӕ арвы бын!