Исайа 60 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Йерусалимы сахарӕн йӕ фидӕны кад

¹ Дунедарӕг зӕгъы: «Сыст, сӕрттив, Йерусалим, — ссыгъди дӕ рухс, дӕ сӕрмӕ тӕмӕнтӕ калы Дунедарӕджы кад!

² Ӕппӕт дуне нытталынг уыдзӕн. Сау мылазон тары бын фӕуыдзысты алы адӕмтӕ. Ӕрмӕст дӕ сӕрмӕ рухс тӕмӕн скалдзӕни Дунедарӕджы кад.

³ Адӕмтӕ ӕрӕмбырд уыдзысты дӕ рухсмӕ, сӕ паддзӕхты ӕрфӕнддзӕн дӕ тӕмӕнкалгӕ рухс фенын.

⁴ Афӕлгӕс-ма алырдӕм! Адӕмтӕ се ’ппӕт дӕр ӕмбырдтӕ кӕнынц, ӕрбацӕуынц дӕм. Дӕ фырттӕ дӕм ӕрбацӕуынц дардӕй, сӕ хъӕбысы ӕрбахӕссынц дӕ чызджыты.

⁵ Куы сӕ фенай, уӕд дӕ цӕсгом барухс уыдзӕн. Фыр цинӕй дӕ зӕрдӕ нырриздзӕни, арвыл абаддзӕн. Адӕмты хъӕздыг фӕллӕйттӕ дӕ къухы бафтдзысты, денджызы сӕрты дӕм ӕрбахӕццӕ уыдзысты.

⁶ Теуаты чырӕты бын фӕуыдзынӕ. Ӕрбатӕрдзысты дын сӕ Мидиан ӕмӕ Ефӕйы бӕстӕтӕй. Савайы бӕстӕй дын ӕрбаласдзысты сыгъзӕрин ӕмӕ буд ӕмӕ кад кӕндзысты Дунедарӕгӕн.

⁷ Ӕрбатӕрдзысты дӕм Кедары бӕстӕй лыстӕг фос, дӕу уыдзысты Невайоты фырытӕ. Мӕ зӕрдӕмӕ сӕ чи фӕцӕуа, уыдоны Мын ӕвӕрдзыстут Мӕ нывондхӕссӕныл, ӕмӕ Ӕз Мӕ Кувӕндон скадджын кӕндзынӕн.

⁸ Уый цы ’рбатӕхы ӕврӕгътау, сӕ бынӕттӕм здӕхӕг бӕлӕттау?

⁹ Уый денджызы сакъадӕхты цӕрджытӕн Ӕз сдӕн сӕ зӕрдӕдарӕн, се ’нхъӕлцау, ӕмӕ дын Таршишы наутӕ дардӕй ӕрбаласынц дӕ фыртты. Ноджы ма ӕрбаласынц ӕвзист, сыгъзӕрин, цӕмӕй Йӕ ном ссарой Дунедарӕгӕн — дӕ Хуыцауӕн, Израилы Стыр Хуыцауӕн, уымӕн ӕмӕ дӕ Уый скадджын кодта.

¹⁰ Ӕндӕрбӕстӕгтӕ дын ног самайдзысты дӕ систӕ, сӕ паддзӕхтӕ дын кӕндзысты лӕггад. Куы-иу Мӕ смӕсты кодтай, уӕд дӕ кодтон Мӕ фыдӕхы амӕттаг, фӕлӕ дын ныр ныххатыр кӕндзынӕн, фӕфӕлмӕн дӕм уыдзынӕн.

¹¹ Нырӕй фӕстӕмӕ дӕ кулдуӕрттӕ никуыуал рахгӕндзынӕ, ӕхсӕв дӕр ӕмӕ бон дӕр уыдзысты гом, цӕмӕй дӕм ӕнӕсцухӕй ласой адӕмты хъӕздыг фӕллӕйттӕ, уыдоны разӕй та дӕм цӕуой сӕ паддзӕхтӕ.

¹² Дӕуӕн лӕггад кӕнын цы адӕмты ӕмӕ цы паддзахӕдты нӕ бафӕнда, уыдон быныскъуыд фӕуыдзысты.

¹³ Ливанӕй дын ӕрбаласдзысты диссаджы хорз хъӕдӕрмӕг: кипарис, тӕгӕр ӕмӕ кедр, цӕмӕй Мын рӕсугъд сфӕлындой Мӕ Кувӕндон — Мӕ къахӕвӕрӕн.

¹⁴ Ӕфхӕргӕ дӕ чи кодта ӕмӕ дӕ чи ницӕмӕ дардта, уыдоны фырттӕ дӕм ӕрбацӕудзысты ӕмӕ дӕ разы сӕ зонгуытыл ӕрхаудзысты. Схондзысты дӕ Дунедарӕджы, Израилы Стыр Хуыцауы сахар — Сион.

¹⁵ Нырӕй фӕстӕмӕ нал уыдзынӕ, дзӕгъӕлӕй чи баззад ӕмӕ фыдгулы цӕстӕй кӕмӕ кастысты, йӕ иувӕрсты кӕмӕн цыдысты, ахӕм сахар. Ӕз дӕ скадджын кӕндзынӕн мыггагмӕ, цин дыл кӕндзысты фидӕны фӕлтӕртӕ.

¹⁶ Адӕмтӕ ӕмӕ дыл паддзӕхтӕ ауддзысты, мад йӕ дзидзидай сабийы йӕ риуы ’хсырӕй куыд фӕхӕссы, уыйау. Ӕмӕ уӕд базондзынӕ, Ӕз Дунедарӕг кӕй дӕн, дӕ Ирвӕзынгӕнӕг ӕмӕ дӕ Сӕрибаргӕнӕг, Йаковы хъомысджын Хуыцау.

¹⁷ Ӕрхуыйы бӕсты дӕ ифтонг кӕндзынӕн сыгъзӕринӕй, ӕфсӕйнаджы бӕсты — ӕвзистӕй, хъӕдӕрмӕджы бӕсты — ӕрхуыйӕ, дурты бӕсты та — ӕфсӕйнагӕй, дӕ хицау суыдзӕни рӕстад.

¹⁸ Дӕ зӕхх никуыуал бавзардзӕн тыхми, гӕныстон ӕмӕ заууатмӕ никуыуал ӕрцӕудзӕн. Дӕ систӕ дын суыдзысты ирвӕзынгӕнӕг, дӕ кулдуӕрттӕ та — кад хӕссӕг.

¹⁹ Хур ӕмӕ мӕй нал уыдзысты дӕ рухсгӕнджытӕ, фӕлӕ дын Дунедарӕг Хуыцау уыдзӕни мыггагмӕйы рухс ӕмӕ кад.

²⁰ Дӕ рухс никуыуал ахуысдзӕн, хур ӕмӕ мӕйы аныгуылды фӕстӕ куыд вӕййы, уыйау, уымӕн ӕмӕ дын Дунедарӕг уыдзӕни мыггагмӕйы рухс, ӕмӕ дӕ саударӕн бонтӕн ӕрцӕудзӕн кӕрон.

²¹ Дӕ адӕм уыдзысты рӕстгӕнджытӕ, ӕмӕ, цы зӕхх сфӕлдыстон, дыргъдонау кӕй сарӕзтон, уый мыггагмӕ уыдзӕни сӕ исбон. Ӕмӕ Мӕ кады ном айхъуысдзӕн адӕмтыл.

²² Чысыл къордӕй рантысын кӕндзынӕн минтӕ, цауд адӕмы скӕндзынӕн хъомысджын. Афон куы ’рцӕуа, уӕд Ӕз, Дунедарӕг, уыцы хъуыддаг сараздзынӕн уадидӕгӕн».