Исайа 28 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Додой сӕ къона расыггӕнаг ефремонтӕн!

¹ Додой йӕ къона расыггӕнаг ефремонты рӕсугъд бӕстӕн, йӕ аив фӕлысты чи баруади, уыцы дидинӕгӕн, дзаджджын уӕлвӕзӕн — фыднозты рын сыстади йӕ цӕрджытыл!

² Мӕнӕ сын Дунедарӕг сӕ ныхмӕ рарвитдзӕни тыхджын ӕфсад ӕмӕ сӕ уыдон бабын кӕндзысты тыгъдызӕй, ихуард ӕмӕ сӕфты тымыгъау, доны хъаймӕтау;

³ расыггӕнаг ефремонты алӕмӕты бӕстӕ сӕ къӕхты бын банай кӕндзысты.

⁴ Йӕ аив фӕлысты баруайгӕ дидинӕгӕн, дзаджджын уӕлвӕзӕн йӕ хъысмӕт уыдзӕни, афонӕй раздӕр цы легъуи сцӕттӕ вӕййы, уый йе ’ртонӕг куыд аныхъуыры, уый хуызӕн.

⁵ Уыцы бон, Йӕ адӕмӕй ма удӕгасӕй чи баззайа, уыдонӕн Уӕларвӕфсады Бардарӕг суыдзӕни сӕ аив дидинхуд, сӕ алӕмӕты рӕсугъд фӕлыст.

⁶ Тӕрхоны лӕгтӕн Уый суыдзӕни раст тӕрхоны Уд, адӕмы раздзӕуджытӕн — ныфс, цӕмӕй сӕ фыдгулты сӕ сахарты кулдуӕрттӕй сӕ уӕлныхты айсой.

Додой сӕ къона расыггӕнаг сауджынтӕ ӕмӕ пехуымпартӕн!

⁷ Сауджынтӕ ӕмӕ пехуымпартӕ ныррасыг сты сӕнӕй ӕмӕ цудтытӕ кӕнынц; карз нозт бануазынц ӕмӕ сӕ развӕндаг дӕр нал фӕуынынц; сӕ зонд фӕцыди карз нозтӕй, сӕ цӕстылуайӕнтӕ раст не сты, уынаффӕ хӕсгӕйӕ, рӕдийынц.

⁸ Сӕ фынгтӕ ӕлгъаг омдзӕджы бын фесты — сыгъдӕг бынат нал баззад.

⁹ Афтӕмӕй та дзурынц мӕнӕй: «Кӕй ахуыр кӕны уый? Йӕ пехуымпар ныхӕстӕй нын зонд амоныныл цы схӕцыд, цыма дзидзидай сабиты, хӕрз ӕрӕджы риуӕй кӕй фӕиртӕстой, уыдоны ахуыр кӕны, уыйау?

¹⁰ Йӕ иугӕндзон дыгъал-дыгъул, йӕ ӕдзӕлгъӕд бӕр-бӕр куы иу ранӕй райхъуысы, куы иннӕ ранӕй».

¹¹ Уый тыххӕй Дунедарӕг ацы адӕмимӕ ӕндӕр ӕвзӕгтыл, ӕцӕгӕлӕтты ӕвзӕгтыл дзурдзӕни.

¹² Уый сын раздӕр дзырдта: «Ацы ран уӕм ӕнхъӕлмӕ кӕсы ӕнцой, уадз ӕмӕ фӕллад адӕм баулӕфой. Ацы ран у ӕнцойы бынат». Фӕлӕ Йӕм уыдон нӕ байхъуыстой.

¹³ Дунедарӕджы ныхас сын сси дзӕгъӕл дзӕнгӕда, иугӕндзон дыгъал-дыгъул, ӕдзӕлгъӕд бӕр-бӕр. Уымӕ гӕсгӕ сӕ фӕндагыл цӕудзысты ӕмӕ уӕлгоммӕ ахаудзысты; уӕнгсаст фӕуыдзысты ӕмӕ къӕппӕджы бахаудзысты, ахст ӕрцӕудзысты.

Мӕнг уӕлахизы ныхмӕ

¹⁴ Дунедарӕджы ныхасмӕ ӕрбайхъусут, Йерусалимы цӕрджыты ӕнӕввӕрсон барджынтӕ!

¹⁵ Сымах уӕхицӕй дзурут, мӕлӕтимӕ ӕмдзӕхдон систӕм, мӕрдтыбӕстимӕ бафидыдтам, зӕгъгӕ. Афтӕ ӕнхъӕл стут, ӕмӕ бӕллӕх уӕ иувӕрсты ацӕудзӕн, мӕнгдзинад ӕмӕ фӕлывды дӕлбазыр кӕй балӕууыдыстут, уый фӕрцы.

¹⁶ Уымӕ гӕсгӕ Дунедарӕг Хуыцау афтӕ зӕгъы: «Ӕз Сионы хохыл сӕрӕвӕрӕнӕн фӕлтӕрд ӕмӕ зынаргъ дур сӕвӕрдзынӕн, ӕмӕ, йӕ уырнындзинад фидар кӕмӕн у, уый нӕ фӕтасдзӕн.

¹⁷ Уым Мӕ раст тӕрхон ӕрӕвӕрдзынӕн барӕн синагау, Мӕ рӕстдзинад та — ауыгъд здыйау». Уе ’мбӕхсӕн — мӕнгдзинад, фӕлӕ йӕ ихуард ныххафдзӕн, доны бын фӕуыдзӕн.

¹⁸ Уӕд, мӕлӕтимӕ цы цӕдис скодтат, уый хӕлд ӕрцӕудзӕн, мӕрдтыбӕстимӕ цы бадзырд сарӕзтат, уый нӕ фӕлӕудзӕн. Сау бӕллӕх уыл йӕхи ныццӕвдзӕни фурды уылӕнтау ӕмӕ уӕ бабын кӕндзӕн.

¹⁹ Куыддӕр уыл уыцы бӕллӕх сӕмбӕла, афтӕ йӕ амӕттаг бауыдзыстут; цӕудзӕни уӕм ӕрвылрайсом, ӕхсӕв дӕр ӕнцой нӕ зондзыстут, фыр тӕссӕй риздзыстут йӕ койӕ дӕр.

²⁰ Уӕ хуыссӕн ӕгӕр цыбыр уыдзӕн, цӕмӕй уӕ къӕхтӕ адаргъ кӕнат, уӕ хъӕццул та — ӕгӕр нарӕг, цӕмӕй уӕхи ӕрбануӕрдат.

²¹ Дунедарӕг уыл Йӕ бӕллӕх ӕруадздзӕн, кӕддӕр Перацимы хохыл кӕнӕ Гивоны уӕлвӕзыл Йӕ адӕмы знӕгтӕн куыд бакодта, афтӕ, цӕмӕй ӕмбисонды хъуыддӕгтӕ сараза.

²² Уӕдӕ дзӕгъӕлдзырд мауал кӕнут, науӕд уӕ рӕхыстӕ ноджы уӕззаудӕр суыдзысты. Дунедарӕгӕй, Уӕларвӕфсады Бардарӕгӕй, фехъуыстон, ӕгас зӕххӕн йе сӕфт нысангонд кӕй у, уый.

Хуымгӕнӕджы ӕмбисонд

²³ Лӕмбынӕг ӕрбайхъусут, цы уын зӕгъдзынӕн, уымӕ!

²⁴ Зӕхкусӕг йӕ хуым байтауинаг куы вӕййы, уӕд ӕй, мыййаг, ӕрвылбон ногӕй бахуым кӕны, ӕрвылбон ыл ауӕдзтӕ скӕны ӕмӕ йӕ похци бакӕны?

²⁵ Нӕ! Йӕ хуым похци куы бакӕны, уӕд дзы иу хайы байтауы хъонтхора, иннӕ хайы байзӕры тмин, ӕртыккаг хайы рӕнхъытӕй ныссадзы мӕнӕу, цыппӕрӕмы — хъӕбӕрхор. Уыдонӕн сӕ алыварс — хуымы кӕрӕтты — байтауы нӕлмӕнӕу.

²⁶ Уыцы зонд зӕхкусӕгӕн Хуыцауӕй лӕвӕрд у, Уый йын амоны хуым кӕныны фӕтк.

²⁷ Хъонтхора дӕндагджын тулӕнӕй нӕ най кӕнынц, тминыл нӕ ауадзынц чъеурийы цӕлхытӕ — дзӕккортӕй сӕ ныххойынц.

²⁸ Хортӕ та, куыннӕ ныцъцъӕл, куыннӕ ныммур уой, афтӕ сӕ банай кӕнынц, чъеурийы цӕлхытыл бӕхтӕ баифтындзынц, афтӕмӕй.

²⁹ Уыцы зонд зӕхкусӕгӕн Уӕларвӕфсады Бардарӕгӕй лӕвӕрд у. Уымӕн та Йӕ фӕндтӕ, Йӕ уынаффӕтӕ ӕмбисонды диссаг сты, Йӕ уӕлзондӕн ӕмбал нӕй.