Иовы чиныг 9 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Иовы дзуапп Билдадӕн

¹ Ӕмӕ дзуапп радта Иов:

² «Бӕргӕ зонын, афтӕ кӕй у, уый, фӕлӕ Хуыцауы раз адӕймаг йӕхи куыд сраст кӕндзӕн?

³ Йӕ ныхмӕ чи бахъаст кӕндзӕн ӕмӕ Йын Йӕ мин фарстӕй иуӕн дӕр дзуапп чи ратдзӕн?

⁴ Иууылкуырыхон ӕмӕ иууылхъаруджын дӕр Йӕ ныхмӕ куыд фӕлӕудзӕн?

⁵ Хӕхтӕ йӕ зонгӕ дӕр нӕ бакӕнынц, афтӕмӕй сӕ ӕваст иуварс куыд ассоны, мӕстыйӕ сӕ куыд фӕфӕлдахы, уый ничи зоны.

⁶ Зӕхх йӕ бындзарӕй нынкъуысын кӕны, йӕ бынатӕй йӕ фӕиртасы, йӕ бындуртӕ йын нырризын кӕны.

⁷ Уый куынӕ зӕгъа, уӕд хур не скӕсдзӕн, стъалытӕ гуыдырӕвӕрдӕй баззайдзысты.

⁸ Уый райтындзы уӕлӕрвтӕ, денджызты рӕгътыл лӕгӕрды.

⁹ Уый сфӕлдыста Аш, Кесил ӕмӕ Хима, стӕй хуссайраг стъалыгуппартӕ.

¹⁰ Уымӕн Йӕ хъуыддӕгтӕ адӕймаджы зонд нӕ ахсы, Йӕ диссӕгтӕн кӕрон нӕй!

¹¹ Мӕ рӕзты рацӕуа — нӕ Йӕ фендзынӕн, Йӕ къахуынӕр Ын нӕ фехъусдзынӕн.

¹² Исты куы иса — Йӕ ныхмӕ чи фӕлӕудзӕн? Чи фӕхъӕр кӕндзӕн: „Уый цы ми кӕныс?“

¹³ Хуыцау куы смӕсты уа — нӕй Йын бауромӕн, Рахавы лӕггадгӕнджытӕ Йӕ разы сӕ зонгуытыл ӕрхаудзысты.

¹⁴ Уӕд Ын ӕз та цы дзуапп хъуамӕ раттон, цавӕр ныхӕстӕ Йын хъуамӕ ссарон?

¹⁵ Раст куы уон, уӕд дӕр лӕгъстӕйӕ дарддӕр ницы зӕгъдзынӕн мӕ Тӕрхонгӕнӕгӕн.

¹⁶ Куы Йӕм ныхъхъӕр кӕнин, ӕмӕ мын дзуапп куы раттид, уӕд дӕр мӕ нӕ бауырнид, кӕй мӕм байхъусдзӕн, уый.

¹⁷ Уаддымгӕйау мыл Йӕхи ныццавта, ӕнаххосӕй мӕ хойы ӕмӕ хойы.

¹⁸ Сулӕфын дӕр мӕ нӕ уадзы, мастӕй мӕ скодта мӕ хъуырмӕ.

¹⁹ Тыхыл куы дзурӕм — тых Уымӕ ис, Тӕрхоныл куы дзурӕм — тӕрхоны раз Ӕй чи ӕрлӕууын кӕндзӕн?

²⁰ Раст куы уон, уӕд дӕр мӕ дзых мӕхи ныхмӕ рацӕудзӕн; азымджын куынӕ уон, уӕд дӕр мӕ фӕзылынджын кӕндзӕн.

²¹ Сыгъдӕг дӕн, фӕлӕ уый цы хъауджыдӕр у, мӕ цард мын куы сӕнад ис, уӕд?

²² Ӕз афтӕ зӕгъын, ӕмӕ уӕлдай нӕу: ӕмхуызон сафы Уый ӕназымы ӕмӕ ӕнаккаджы.

²³ Ӕнӕнхъӕлӕджы бӕллӕх мӕлӕтхӕссӕг у, Уымӕ та рӕстаджы ныфссаст худӕг кӕсы.

²⁴ Фыдгӕнджыты къухы ис зӕхх, ӕмӕ тӕрхоны лӕгты цӕстытӕ кӕд Уый нӕ бакуырм кӕны, уӕд чи?

²⁵ Фӕдисонау згъорынц мӕ бонтӕ, уайынц, фӕлӕ сӕм хорзӕй ницы зыны.

²⁶ Цъӕнут бӕлӕгътау тындзынц, цӕргӕс йӕ амӕттагмӕ куыд тындза, афтӕ.

²⁷ Бӕргӕ фӕзӕгъын, ныууадзон мӕ сагъӕс, тарӕрфыг ма уон, мӕхиуыл схӕцон,

²⁸ фӕлӕ тӕрсын мӕ сомбонӕй, зонын: ӕназым мӕ нӕ рахондзынӕ.

²⁹ Ӕмӕ кӕд азымджынӕй баззайдзынӕн, уӕд ма цы у мӕ фыдӕбон дӕр?

³⁰ Митдоны мӕхи куы цынайон, мӕ къухтӕ фӕныкдонӕй куы цӕхсон,

³¹ уӕд дӕр мӕ Ды цъыфы сӕвдулдзынӕ, ӕмӕ мыл мӕ дарӕс дӕр ӕлгъ кӕндзӕн.

³² Уый адӕймаг нӕу мӕнау, цӕмӕй Йемӕ быцӕу кӕнон ӕмӕ Йемӕ тӕрхондонмӕ ацӕуон.

³³ Не ’хсӕн чи балӕууа, нӕ дыууӕйыл дӕр ӕмхуызон йӕ арм чи ӕрхӕсса, уый нӕй.

³⁴ Йӕ лӕдзӕг мӕ куы аиуварс кӕнид, стыр тасы мӕ куынӕ ӕфтауид,

³⁵ уӕд ӕдӕрсгӕ сдзурин Йӕ разы, фӕлӕ хъуыддаг афтӕ нӕу — бынтон иунӕг дӕн ӕз.