Иовы чиныг 6 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Иовы дзуапп Елифазӕн

¹ Ӕмӕ дзуапп радта Иов:

² «Тӕхуды, мӕ рисӕн сбарӕн куы уаид, мӕ мастӕн — тӕрӕзтыл ӕрӕвӕрӕн!

³ Уӕд денджызы змисӕй уӕззаудӕр уаид, мӕ дзыхы дӕр ныхас уымӕн нӕ бады.

⁴ Ӕппӕтхъомысы фӕттӕ мӕ ахызтысты, марг дарынц мӕ удӕн, фыртас мыл бафтыдта Хуыцау.

⁵ Искуыдӕр ма хъӕддаг хӕрӕг хизгӕ-хизын фӕуасы? Искуыдӕр ма гал йӕ кӕвдӕсы раз богътӕ фӕкӕны?

⁶ Ӕдзӕхх хойраг адӕн кӕмӕн у? Айчы урсы цӕй ад ис?

⁷ Ахӕм хойрагыл бандзӕвон, уый дӕр мын ӕнад у, ныр ме ’намонд сси мӕ хойраг.

⁸ Тӕхуды, куы сӕххӕст уаид мӕ курдиат, куы нӕ мын фӕсаид ме ’нхъӕлц Хуыцау!

⁹ Тӕхуды, Хуыцауы мӕ ныцъцъист кӕнын куы бафӕндид ӕмӕ мын мӕлӕтдзаг цӕф куы ныккӕнид!

¹⁰ Мӕ зӕрдӕ фӕлӕууид уӕд, ӕмӕ раин мӕ хъизӕмӕртты, уымӕн ӕмӕ никуы атигъ кодтон мӕхи Уаз Хуыцауы ныхӕстыл!

¹¹ Цы ныфсӕй фӕразон, хъару мӕм куынӕуал ис? Цы уыдзӕн мӕ кӕрон? Цы ма у мӕ цард?!

¹² Исты мын дуры фидар ис? Исты ӕфсӕйнагӕй конд дӕн?

¹³ Мӕхицӕн ӕххуыс мӕхимидӕг агурон, цавӕр ӕнцой мын ис?

¹⁴ Дӕ тыхст хӕларӕн батӕригъӕд кӕн, Хуыцауы тас ӕм куынӕуал уа, уӕддӕр.

¹⁵ Фӕлӕ мӕныл ме ’фсымӕртӕ тагъд донау сӕ зӕрдӕ сивтой, уалдзыгон донвӕдау раив-баив кӕнынц.

¹⁶ Уыдон — ихы бын сау ӕрсдонау, йӕ мидӕг миты фӕзгъӕртӕ кӕмӕн ленк кӕны.

¹⁷ Ӕнтӕфы айсысынц, ӕмӕ сӕ донвӕд сурӕй аззайы.

¹⁸ Уыдоны аххосӕй чырӕласджытӕ фӕдзӕгъӕл вӕййынц, ӕдзӕрӕг быдыры сӕ мӕлӕт ссарынц.

¹⁹ Дзӕгъӕлы сӕ фӕагурынц темайаг чырӕтӕ, сӕ зӕрдӕ сыл дарынц савайаг фӕндаггӕттӕ;

²⁰ сӕ зӕрдӕдарӕн мӕнг разындзӕн, фыдӕнхъӕл фӕуыдзысты, хуыскъ ададжы цурмӕ куы бахӕццӕ уой, уӕд.

²¹ Сымах дӕр уыдоны хуызӕн — мӕ дудгӕбон мын федтат ӕмӕ фӕтарстыстут.

²² Куы ницы уӕ агуырдтон, уӕ мулкӕй уын мӕ тӕрхонгӕнӕгӕн гӕртам куы нӕ домдтон!

²³ Куы нӕ уын загътон: „Ме знӕгтӕй мӕ фервӕзын кӕнут, ме ’фхӕрджытӕн мын ахӕстаргъ бафидут!“

²⁴ Зонд мын бацамонут, ӕмӕ мӕ дзых сӕхгӕнон, цы фӕрӕдыдтӕн, уый мын бамбарын кӕнут.

²⁵ Ӕргом ныхас зын уромӕн у, фӕлӕ уӕ уайдзӕфтӕ куы ницы марынц!

²⁶ Мӕ ныхӕстӕм мын фау ӕрхӕссынмӕ хъавут? Ӕмӕ сӕ дымгӕйы хай куы бакодтат?

²⁷ Сымах сидзӕры тыххӕй хӕлттӕ ӕппарут, уӕ хӕларӕн дзыхъхъ къахут.

²⁸ Ӕрбакӕсут-ма мӕм, уӕхи раз уӕ нӕ асайдзынӕн!

²⁹ Уӕхи ӕрӕмбарут, фыддзинад ма ’руадзут, ӕрбайхъусут, ме ’рдыгӕй ис рӕстдзинад!

³⁰ Ау, ме ’взаг сайгӕ кӕны, ау, мӕ ком мӕнгдзинады ад нал иртасы?!