Иовы чиныг 5 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Ныхъхъӕр кӕн — чи дын ратдзӕн дзуапп? Ӕппындӕр ничи, иу сыгъдӕг дӕр — нӕ!

² Ӕдылыйы бабын кӕны йӕ маст, ӕнӕзонд йӕ мӕстыгӕрӕй фесӕфы.

³ Ӕз федтон: ӕдылы йӕ уидӕгтӕ арф нӕма ауагъта, афтӕ ӕвиппайды йӕ хӕдзар ӕрбайхӕлди, ӕлгъыстау.

⁴ Йе ’намонд цотӕн феххуысгӕнӕг нӕ уыдзӕн, кулдуары раз сӕ исчи куы мара, уӕд дӕр.

⁵ Ӕххормаг лӕг ын бахӕрдзӕн йӕ тыллӕг — какон сындз дӕр ӕй нӕ бауромдзӕн, цыбӕлгӕнӕг ын бацахсдзӕн йӕ исбон.

⁶ Уымӕн ӕмӕ фыдбылыз сыджытӕй нӕ равзӕры, ӕмӕ бӕллӕх быдыры не ’рзайы.

⁷ Уый адӕймаг райгуыры хъизӕмарӕн, цӕмӕй зынджы стъӕлфӕнау арвмӕ стӕха.

⁸ Фӕлӕ мӕнӕн Хуыцаумӕ у ме ’ргом, ӕмӕ мӕ хъаст Уымӕ хӕссын.

⁹ Уымӕн Йӕ хъуыддӕгтӕ сты ӕгӕрон, зонд сӕ нӕ ахсы, Йӕ диссӕгтӕн кӕрон дӕр нӕй.

¹⁰ Зӕххы цӕсгом ӕхсы къӕвдайӕ, донхорыг кӕны быдыртӕ.

¹¹ Ӕгады бынаты чи уыди, уый сбӕрзонд кӕны, кӕуинаг чи фӕци, уый фервӕзын кӕны.

¹² Мӕнгӕрдты фӕндтӕ ӕрбайхалы, сӕ къухтӕ сын фӕцыбыр кӕны.

¹³ Ӕгӕр зондджынтӕн сӕ хинтӕ сӕхи ныхмӕ саразы, хинӕйдзӕгтӕн сӕ фӕндтӕ фехалы.

¹⁴ Боныгон сыл саудалынг ӕртыхсы, бон-сихорафон, цыма ӕхсӕв у, уыйау, куырмӕджы цӕуӕгау, цӕуынц.

¹⁵ Мӕгуыр лӕджы Уый бахизы сӕ кардӕй, сӕ дзыхӕй, сӕ хъомысджын къухӕй.

¹⁶ Уымӕн нӕу мӕгуыр лӕг ӕнӕныфс, уымӕн ӕрцӕуы ӕхгӕд мӕнгард ком.

¹⁷ Тӕхудиаг у, Хуыцау зонды къахыл кӕй ӕвӕры, уый, уымӕ гӕсгӕ Ӕппӕтхъомысы ’фхӕрдыл дӕхи ма тигъ кӕн.

¹⁸ Уый цӕвгӕ дӕр Йӕхӕдӕг ныккӕны, ӕмӕ цӕфтӕ дӕр Йӕхӕдӕг бабӕтты, ныццӕвӕг дӕр ӕмӕ сдзӕбӕхгӕнӕг дӕр Уый Йӕхӕдӕг у.

¹⁹ Ӕхсӕз бӕллӕхӕй дӕ бахиздзӕн, ӕвдӕм дӕм хӕстӕг не ’рбацӕудзӕн.

²⁰ Ӕххормаг заман дӕ мӕлын нӕ бауадздзӕн, хӕсты быдыры дӕ карды комӕй бахиздзӕн.

²¹ Фыдӕвзаг дӕм нӕ баххӕсдзӕн, гӕныстонӕй дын тас нӕ уыдзӕн.

²² Гӕныстон ӕмӕ дӕм стонджы кой худӕг дӕр ма кӕсдзӕн, хъӕддаг сырдтӕй нӕ фӕтӕрсдзынӕ.

²³ Быдираг дуртӕ дын цӕдисонтӕ суыдзысты, хъӕддаг сырдтимӕ хӕларӕй цӕрдзынӕ.

²⁴ Базондзынӕ, дӕ цатырӕн ницы тас у, ӕркӕсдзынӕ дӕ бынӕттӕм — алцӕмӕй дӕр нывыл сты.

²⁵ Дӕ цӕстӕй фендзынӕ дӕ бирӕ цоты, Быдыры кӕрдӕгау ӕнӕнымӕц уыдзысты дӕ байзӕддаг.

²⁶ Карджынӕй бацӕудзынӕ ингӕнмӕ, йӕ афоныл кӕй банай кодтой, йӕ афоныл найгонд ӕфсирау.

²⁷ Уый афтӕ кӕй у, уый мах лыстӕг равзӕрстам. Ӕрбайхъус ӕмӕ йӕ бахынц».