Иовы чиныг 40 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Уӕд Хуыцау Иовмӕ уадтымыгъӕй радзырдта:

² «Дӕхи ӕрцӕттӕ кӕн дзуапп дӕттынмӕ лӕгау, Ӕз дӕ фӕрсын, ды та мын-иу дзуапп ратт:

³ Ау, ды Мӕ тӕрхоныл дӕхи атигъ кӕндзынӕ, цӕмӕй дӕхи сраст кӕнай, уый тыххӕй Мӕн азымджын кӕндзынӕ?

⁴ Ӕви дӕумӕ дӕр Хуыцауы хъомыс ис, дӕуӕн дӕр Уыйау дӕ хъӕлӕс арвгӕрӕтты уырауы?

⁵ Уӕд дӕхи хъомысӕй сфӕлынд, тӕмӕнкалгӕ кады ӕрбатух дӕхи,

⁶ ныккал дӕ маст, ӕркӕс сӕрыстырмӕ ӕмӕ йӕ ’рцахуыр кӕн,

⁷ хирвӕссонмӕ ’ркӕс ӕмӕ йӕ басӕтт, ӕнаккӕгты та уыцы тӕккӕ уысм ныссӕнд.

⁸ Иууылдӕр иумӕ сӕ дӕлдзӕхы баныгӕн, ныккӕнды дуӕрттӕ сыл сӕхгӕн.

⁹ Уӕд Ӕз Мӕхӕдӕг дӕр баууӕнддзынӕн, дӕ рахиз къух дӕ кӕй фервӕзын кӕндзӕн, ууыл.

¹⁰ Бакӕс-ма бегемотмӕ: уый дӕр дӕу хуызӕн сфӕлдыстон, галау кӕрдӕгыл хизы.

¹¹ Бакӕс-ма йын йӕ сӕвджын синтӕм, йӕ гуыбыны хъӕддых нуӕрттӕм!

¹² Йӕ къӕдзил кедры зӕнгау — фидар, йӕ синты нуӕрттӕ стыхстысты кӕрӕдзиуыл.

¹³ Йе стджытӕ — ӕрхуы хӕтӕлтау, йӕ къӕхтӕ — ӕфсӕн лӕдзджытау.

¹⁴ Уымӕй диссагдӕр нӕй, Хуыцау цы сфӕлдыста, уыдонӕй, ӕрмӕст ыл йе Сфӕлдисӕг фӕтых уыдзӕн!

¹⁵ Хизы хӕхты, хъӕддаг сырдты хӕтӕнты.

¹⁶ Дондидинты ӕхсӕн йӕ фӕллад уадзы, цъымарайы цъӕнуты фембӕхсы.

¹⁷ Дондидинтӕ йӕм аууон дарынц, донхӕристӕ йӕ бакӕнынц сӕ астӕу.

¹⁸ Донивылдӕй дӕр нӕ фӕтӕрсдзӕн, Иордан йӕ дзыхмӕ куы багуылф кӕна, уӕд дӕр нӕ сызнӕт уыдзӕн.

¹⁹ Йӕ сӕрӕй йӕ чи ’рцахсдзӕн, йӕ фындзмӕ йын чи фӕлӕбурдзӕн?

²⁰ Уӕдӕ Левиафаны ӕнгуырӕй ӕрцахсдзынӕ, йе ’взаг ын бӕндӕнӕй нылвасдзынӕ?

²¹ Йӕ фындзы йын къӕцӕл атъысдзынӕ, йе ’фсӕры йын къӕпсыр ныссадздзынӕ?

²² Уынгӕг хъӕлӕсӕй дӕм сдзыназдзӕн, лӕгъстӕ кӕнынмӕ дын фӕуыдзӕн?

²³ Демӕ баныхас кӕндзӕн, ӕнустӕм дын цагъарӕй ныллӕудзӕн?

²⁴ Лӕппын цъиуӕй хъазӕгау дзы хъаздзынӕ, чысыл чызджыты ирхӕфсынӕн ӕй истӕуыл абӕтдзынӕ?

²⁵ Кӕсагахсджыты бар ӕй бакӕндзынӕ, цӕмӕй йӕ ханаанӕгтӕн хайгай ауӕй кӕной?

²⁶ Йӕ царм ын арцӕй фӕхуынкъ кӕндзынӕ, йӕ сӕр ын кӕсагахсӕджы сагойӕ ныппырх кӕндзынӕ?

²⁷ Дӕ арм ыл ӕрӕвӕр, ӕмӕ тох кӕнын дӕ хъуыдыйы дӕр никуыуал ӕрцӕудзӕн.