Иовы чиныг 39 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Ды сычъитӕн сӕ зайыны афон зоныс? Сӕгуыттӕн сӕ зайыны ӕмгъуыд фӕхатыс,

² сӕ гуырдз сӕ гуыбыны цал мӕйы хӕсгӕ у, уый? Сӕ зӕйц кӕд рантысдзӕн, уый зоныс?

³ Утӕхсӕнгӕнгӕ ракалынц сӕ цӕуӕт, сӕ уаргъӕй суӕгъд кӕнынц сӕхи,

⁴ цӕмӕй сӕ зӕйц сӕрибарӕй хъомыл кӕной, сӕ тыхы бацӕуой ӕмӕ сӕ стӕй ныууадзой, макуыуал сӕм раздӕхой?

⁵ Хъӕддаг хӕрӕджы сӕрибарӕй чи ауагъта, хайуанӕн йӕ сахсӕнтӕ чи райхӕлдта?

⁶ Ӕз ӕй ӕдзӕрӕг быдыры ӕрцӕрын кодтон, цӕххӕргом зӕххытӕ йын цӕрӕнбынатӕн радтон.

⁷ Сахары дзолгъо-молгъо уымӕ худӕгау кӕсы, бӕхтӕрӕджы хъӕр зонгӕ дӕр нӕ кӕны.

⁸ Къуылдымтыл хизы йӕхицӕн, тихалӕг дӕр дзы нӕ ирвӕзы.

⁹ Хъӕддаг гал дын лӕггад кӕнын бакомдзӕн? Дӕ кӕвдӕсы цур бахсӕвиуат кӕндзӕн?

¹⁰ Йӕхи дын дзывырыл бабӕттын бауадздзӕн, дӕ фӕдыл зӕхх куыд бахуым кӕна, афтӕ?

¹¹ Йе стыр хъаруйӕ дӕхицӕн ныфс бавӕрдзынӕ ӕмӕ йын дӕ куыст йӕ бар бакӕндзынӕ?

¹² Дӕ хор дын ӕрӕмбырд кӕндзӕни ӕмӕ йӕ мусы бафснайдзӕни, ууыл баууӕнддзынӕн?

¹³ Страус йӕ базыртӕ фыр цинӕй тилы, къаннӕг сты йӕ базыртӕ, фӕлӕ сӕ систӕ куыд диссаг сты!

¹⁴ Змисы ӕрӕфтауы ӕйчытӕ, схъарм ын вӕййынц уым,

¹⁵ исчи сыл къахӕй ныллӕудзӕн, хъӕддаг сырдтӕ сӕ бассӕнддзысты, уый мӕт ӕй нӕй.

¹⁶ Йӕ лӕппынтӕ йын ӕцӕгӕлӕттау сты, йӕ фыдӕбӕттӕ дзӕгъӕлы кӕй фӕуыдзысты, уымӕй нӕ тӕрсы.

¹⁷ Уымӕн ӕмӕ хъуыды нӕ кӕны, Хуыцау ын зонд нӕ радта.

¹⁸ Фӕлӕ йӕ базыртӕ куы айтынг кӕны, уӕд ӕм барӕг дӕр худӕг фӕкӕсы — фӕсте йӕ фӕуадзы.

¹⁹ Бӕхӕн хъару исты ды радтай, йӕ хъуыр ын ды сфӕлыстай барцӕй?

²⁰ Мӕтыхау ӕй размӕ згъорын ды сахуыр кодтай? Йӕ хуыррыттӕй алчи зӕрдӕдзӕф куы кӕны!

²¹ Цингӕнгӕ йӕ сӕфтджытӕй зӕхх хойы ӕмӕ тохмӕ бырсы риуӕмбӕрцӕй;

²² худӕг ӕм кӕсы тас, кард дӕр ӕй нӕ уромы;

²³ Сагъадахъ дзыгъал-мыгъул кӕны йӕ сӕрмӕ, ферттивынц ӕрцытӕ;

²⁴ йӕ къӕхты бын зӕхх нынкъуысы, сыкъауадындзы уастмӕ размӕ куы фӕцагайы, уӕд.

²⁵ Сыкъауадындзы уастмӕ ныммыр-мыр кӕны, дардмӕ дӕр хӕсты уынӕр хъусы.

²⁶ Дӕ фӕндӕй тӕхы уари, хуссайраг дымгӕмӕ йӕ базыртӕ куы айтындзы, уӕд?

²⁷ Дӕ ныхасӕй фехсы йӕхи хӕрдмӕ ӕмӕ бӕрзонд ӕрцаразы йӕ ахстон?

²⁸ Къӕдзӕхыл ис уымӕн йӕ цӕрӕн, ӕгӕндӕг айнӕджы тигъ у йӕ фидар.

²⁹ Уырдыгӕй хъахъхъӕны йӕ амӕттаджы, йӕ цӕстытӕ дардмӕ уынынц.

³⁰ Йӕ лӕппынты хӕссы тугӕй, мард кӕм уа, уым февзӕры».

³¹ Ӕмӕ ма загъта ноджы Иовӕн Хуыцау:

³² «Ацы быцӕугӕнӕг Ӕппӕтхъомысӕн зонд амоны? Хуыцауы азымджын чи кӕны, уый-ма дзуапп раттӕд!»

³³ Ӕмӕ дзуапп радта Хуыцауӕн Иов:

³⁴ «Ӕз та цы дӕн? Цавӕр дзуапп Дын хъуамӕ раттон? Мӕ армытъӕпӕнӕй мӕ былтӕ ӕхгӕнын.

³⁵ Иу хатт загътон ӕмӕ дарддӕр ницыуал дзурын. Дыууӕ хатты загътон, фӕлӕ ныр ныхъхъус уыдзынӕн».