Иовы чиныг 35 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Ӕмӕ дзырдта Елигу дарддӕр:

² «Афтӕ дӕм кӕсы, ӕмӕ рӕстдзинад де ’рдыгӕй ис? Ды загътай: „Ӕз Хуыцауӕй растдӕр дӕн ӕви?“

³ Ды зӕгъыс: „Цы уӕлдай мын у, растӕй цӕрон ӕви тӕригъӕды цӕуон?“

⁴ Ӕз дӕуӕн ӕмӕ дӕ хӕлӕрттӕн дзуапп ратдзынӕн уый фӕдыл:

⁵ арвмӕ скӕс ӕмӕ фен — мигътӕ дӕуӕй цас бӕрзонддӕр сты!

⁶ Тӕригъӕды куы бацӕуай, уӕд Уымӕн цы у? Дӕ фыдракӕндтӕ куы сбирӕ кӕнай, уӕд Уымӕн цы уыдзӕн?

⁷ Рӕстӕй куы цӕрай, уӕд дзы Уымӕн цы пайда ис? Дӕ бон ын раттын цы у?

⁸ Ды дӕ тӕригъӕдӕй дӕхи хуызӕттӕн хӕссыс зиан, дӕ рӕстдзинад адӕмы цӕсты ахады ӕрмӕстдӕр.

⁹ Ссӕст адӕм сӕ уӕзы бын хъӕрзынц, се ’фхӕрджыты къухы бын дзыназынц,

¹⁰ фӕлӕ иу афтӕ зӕгъӕг нӕй: „Кӕм ис Хуыцау, ме Скӕнӕг, сау бон зарынӕй Чи раивы,

¹¹ фосӕй уӕлдай нын зонд Чи радта, тӕхаг мӕргътӕй хъауджыдӕр нӕ ӕмбаргӕ Чи скодта?“

¹² Фӕлӕ вӕййы, дзыназынц Ӕм ӕххуысӕнхъӕл, ӕмӕ сын Уый ӕнаккӕгты сӕрыстырдзинады аххосӕй дзуапп нӕ ратты.

¹³ Хуыцау тутт ныхӕстӕм нӕ хъусы, Ӕппӕтхъомыс уыдӕттӕ ницӕмӕ дары.

¹⁴ Ды дзурыс, нӕ Йӕ уыныс, зӕгъгӕ, фӕлӕ дын Уый дӕ хъуыддаг ӕвзары, ӕмӕ ӕнхъӕлмӕ кӕс.

¹⁵ Дӕумӕ гӕсгӕ, Йӕ маст ӕгӕр уромы, адӕмӕн сӕ тӕригъӕдтӕ нӕ уыны?

¹⁶ Уӕдӕмӕ дзӕгъӕлдзырд кӕны Иов, ӕмбаргӕ ницы кӕны, афтӕмӕй бирӕ дзуры».