Иовы чиныг 34 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Ӕмӕ дзырдта Елигу дарддӕр:

² «Ӕрбайхъусут мӕм, куырыхонтӕ, уӕ хъус мӕм ӕрбадарут, зондджынтӕ!

³ Уымӕн ӕмӕ хъус ныхас ӕвзары, ком та ад зоны.

⁴ Равзарӕм-ма уӕдӕ мах, раст цы у, уый ӕмӕ, хорз цы у, уый раст раиртасӕм!

⁵ Мӕнӕ Иов загъта, ӕз, дам, раст дӕн, Хуыцау та мын мӕ хъуыддаг не ’взары.

⁶ Раст, дам, дӕн, афтӕмӕй мӕ сайӕгойыл банымадтой. Азымджын нӕ дӕн, фӕлӕ мӕ хъӕдгӕмттӕн сдзӕбӕхгӕнӕн нӕй.

⁷ Искуы ма Иовы хуызӕн адӕймаг ис, хынджылӕг ӕмӕ джидзӕг кӕнын дон нуазынӕй уӕлдай кӕмӕн нӕу?

⁸ Ӕнӕхуыцӕуттимӕ ӕмзонд у уый, фыдгӕнӕгау галиу фӕндагыл цӕуы.

⁹ Уымӕн ӕмӕ зӕгъы, Хуыцауы зӕрдӕ ’лхӕнынӕй адӕймагӕн цы пайда ис, зӕгъгӕ.

¹⁰ Уӕдӕ мӕм ӕрбайхъусут, куырыхонтӕ: Хуыцаумӕ ницы ис ӕнӕрастӕй, Ӕппӕтхъомыс галиу тӕрхон нӕ рахӕсдзӕн.

¹¹ Адӕймагӕн йӕ хъуыддӕгтӕм гӕсгӕ бафиды, чи цы аккаг у, уый айсы.

¹² Ӕцӕг, Хуыцаумӕ ницы ис ӕнӕрастӕй, Ӕппӕтхъомыс раст тӕрхон не сзыгъуыммӕ кӕны.

¹³ Чи Йӕ сӕвӕрдта хицауӕй зӕххы цъарӕн? Чи Йын радта Йӕ къухтӕм ӕнӕхъӕн дуне?

¹⁴ Уый Йӕ зӕрдӕ куы сӕхгӕнид, Йӕ комулӕфт, Йӕ царды комулӕфт фӕстӕмӕ куы райсид,

¹⁵ уӕд алы цардуд дӕр ӕрбамӕлид, уӕд адӕймаг фӕстӕмӕ сыджыт фестид.

¹⁶ Йӕ сӕры зонд кӕмӕн ис, уый ӕрбайхъусӕд, лӕмбынӕг байхъусӕд мӕ ныхӕстӕм!

¹⁷ Рӕстдзинад йӕ цӕстысындз кӕмӕн у, уый хицауиуӕг куыд хъуамӕ кӕна? Раст ӕмӕ Хъомысджыны ды аххосджын куыд хъуамӕ кӕнай?

¹⁸ Исчи ма паддзахӕн, цъаммар, зӕгъгӕ, дзуры, исчи ма уӕздӕттӕн, ӕнаккӕгтӕ, зӕгъгӕ, фӕзӕгъы?

¹⁹ Фӕлӕ Уый бардартӕн цурон митӕ нӕ кӕны, Уый хъӕздыг лӕджы мӕгуырӕй уӕлдӕр не ’вӕры, уымӕн ӕмӕ се ’ппӕтӕн дӕр се Скӕнӕг у Уый.

²⁰ Ӕваст ӕрбамӕлынц адӕм ӕхсӕвы тары, зӕрдӕнкъусӕг цӕфӕй сӕ кӕрон ӕрцӕуы; кӕйдӕр къухӕй нӕ бабын вӕййы хъомысджын.

²¹ Уымӕн ӕмӕ Хуыцау Йӕ цӕст дары адӕмы фӕндӕгтӕм, сӕ алы къахдзӕф дӕр сын уыны.

²² Зӕххыл ахӕм саудалынг, ахӕм мӕрдон тар нӕй, фыдгӕнджытӕ Уымӕй сӕхи кӕм бааууон кӕной.

²³ Хуыцау адӕймагмӕ бӕлвырд рӕстӕджы тӕрхонмӕ нӕ сиды.

²⁴ Ӕнӕ рафӕрс-бафӕрсӕй ныддӕрӕн кӕны тыхджынты ӕмӕ сын сӕ бынаты ӕндӕрты сӕвӕры.

²⁵ Сӕ хъуыддӕгтӕ сын хорз зоны ӕмӕ сӕ иу ӕхсӕвмӕ фесафы.

²⁶ Фыдгӕнджытау сӕ адӕмы раз бафхӕры;

²⁷ сӕхи Йыл кӕй атигъ кодтой, Йӕ фӕндӕгтӕ сӕ хъуыдыйы дӕр кӕй нӕ уыдысты, уый тыххӕй.

²⁸ Сыхъуысти Йӕм мӕгуырты ӕрдиаг, Уый фехъуыста ӕфхӕрд адӕмы уынӕргъын.

²⁹ Хъусӕй куы лӕууа, уӕд ӕй азымы чи бадардзӕн? Йӕ цӕсгом куы бамбӕхса, уӕд Ӕй фенын кӕй бон суыдзӕн? Уый ӕппӕт адӕммӕ дӕр ӕмӕ иу адӕймагмӕ дӕр хауы,

³⁰ цӕмӕй паддзахиуӕг ма кӕна ӕнӕхуыцау ӕмӕ адӕмӕн ахсӕн хыз ма феста.

³¹ Фӕлтау зӕгъ Хуыцауӕн: „Бафхӕрдтай мӕ — ныр мӕхи тӕригъӕдӕй хиздзынӕн.

³² Ӕнӕбары кӕд истӕмӕй фӕрӕдыдтӕн, уӕд та мын ӕй бацамон, цӕмӕй амӕй фӕстӕмӕ мауал рӕдийон“.

³³ Дӕ рӕдыдыл дӕр куы нӕ сӕттыс, уӕд цы хорзмӕ ’нхъӕлмӕ кӕсыс? Равзарын мӕнмӕ нӕ, фӕлӕ дӕумӕ хауы, кӕд исты зоныс, уӕд дзургӕ кӕн.

³⁴ Ӕмбаргӕ адӕмӕй мӕм чи хъусы, уыдон, стӕй куырыхонтӕ зӕгъдзысты:

³⁵ „Иов йӕхӕдӕг дӕр, цы дзуры, уый нӕ зоны, ӕнӕсӕрфат сты йӕ ныхӕстӕ“.

³⁶ О, ноджы тынгдӕр ӕфхӕрд куы баййӕфтаид Иов — ӕнӕхуыцӕутты ’взагӕй дзуры!

³⁷ Йӕ тӕригъӕдтӕй уӕлдай ма ноджы змӕнтӕг дӕр у, йӕ къухтӕ ныл сцӕгъды ӕмӕ Хуыцауы ныхмӕ дзурынӕй не ’нцайы».