Иовы чиныг 33 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Хъус, уӕдӕ, Иов, мӕ ныхӕстӕм, иунӕг дӕр дзы ма ауадз!

² Мӕнӕ ӕз байгом кодтон мӕ дзых, ӕмӕ ме ’взаг дзурынмондагӕй сӕфы.

³ Мӕ ныхӕстӕ мӕ сыгъдӕг зӕрдӕйӕ цӕуынц, ӕмӕ мӕ дзыхӕй рӕстдзинад йеддӕмӕ ницы схаудзӕн.

⁴ Мӕн сфӕлдыста Хуыцауы Уд, царды комулӕфт мӕ бауагъта Ӕппӕтхъомыс.

⁵ Кӕд дӕ бон у, уӕд мын дзуапп ратт, кӕд дӕ ныфс хӕссыс, уӕд мӕ ныхмӕ ралӕуу.

⁶ Ӕппӕтхъомысы раз ӕз ӕмӕ ды иухуызон стӕм, ӕз дӕр дӕуау ӕлыгӕй конд дӕн.

⁷ Уымӕ гӕсгӕ дӕ ӕз тасы нӕ бафтаудзынӕн, мӕ къухы уӕз мын нӕ бамбардзынӕ.

⁸ Мӕхи хъустӕй фехъуыстон дӕ ныхас, мӕ хъустыл уайы ныр дӕр ма:

⁹ Сыгъдӕг, дам, дӕн ӕз, ӕнӕкъӕм, ницы азым мӕм ис, сыгъдӕг дӕн.

¹⁰ Афтӕмӕй мӕ Хуыцау аххосджын кӕны, знаг мӕ фестын кодта Йӕхицӕн.

¹¹ Мӕ къӕхтыл мын сахсӕнтӕ бакодта, мӕ алы къахдзӕфмӕ дӕр кӕсы.

¹² Ӕз та дын уый зӕгъын, ӕмӕ раст нӕ дӕ: ӕнӕмӕнг, Хуыцау адӕймагӕй уӕлдӕр у!

¹³ Цы быцӕу кӕныс Йемӕ, мӕ фарстӕн мын дзуапп нӕ дӕтты, зӕгъгӕ?

¹⁴ Ӕцӕгдӕр, Хуыцау иу кӕнӕ иннӕ хуызы фӕзӕгъы, фӕлӕ Йӕ не ’мбарынц.

¹⁵ Фыны, ӕхсӕвыгон тарф фынӕй куы бавӕййы адӕймаг йӕ хуыссӕны,

¹⁶ уӕд ын Хуыцау йӕ хъус байгом кӕны ӕмӕ йын Йӕ зондамынд фӕзӕгъы,

¹⁷ цӕмӕй адӕймаджы бахиза исты ’взӕрдзинад саразынӕй, сӕрыстыр уӕвынӕй.

¹⁸ Цӕмӕй адӕймаг былӕй ма ахауа, цӕмӕй карды комыл ӕфтыд ма фӕуа.

¹⁹ Науӕд та адӕймагӕн низы фӕрцы бамбарын кӕны, бабӕтты йӕ хуыссӕнмӕ, йе стджыты рыст нал фӕуромы,

²⁰ ӕмӕ уӕд хойрагыл йӕхи атигъ кӕны, цы хуыздӕр хӕринӕгтӕ нал фӕмысы.

²¹ Йӕ буар рафты, царм ӕмӕ стджытӕ фесты.

²² Мӕлӕты къахыл ныллӕууы, удхӕссӕг ӕм ӕрбахӕстӕг вӕййы.

²³ Фӕлӕ Йын мин Хъахъхъӕнӕг зӕдӕй иу йӕ рӕстдзинады тыххӕй куы бакой кӕна,

²⁴ куы йын батӕригъӕд кӕна ӕмӕ куы зӕгъа, ингӕнмӕ йӕ ма ауадз, ӕз ын ахӕстаргъ ссардтон, зӕгъгӕ,

²⁵ уӕд та фӕстӕмӕ райтынг уыдзӕн йӕ буар, ӕрыгонӕй куыд уыдис, афтӕ, раздӕхдзӕн та йӕм йе ’взонджы бонты хъару.

²⁶ Хуыцау ын йӕ куывд айсдзӕн, Йе ’ргом ӕм раздахдзӕн, йӕ рӕстдзинады тыххӕй йын Йӕ хорзӕхӕй схайджын кӕндзӕн.

²⁷ Ӕмӕ уӕд адӕмы раз зӕгъдзӕн: „Ӕз тӕригъӕды бацыдтӕн, рӕстдзинад сзыгъуыммӕ кодтон, фӕлӕ мын Хуыцау мӕ хъуыддӕгтӕм гӕсгӕ нӕ бафыста,

²⁸ мӕлӕтӕй мӕ фервӕзын кодта, ӕмӕ та рухс уынын“.

²⁹ Хуыцау адӕймагӕн ӕппӕт уыдӕттӕ бавзарын кӕны, стӕй ма ноджы дыууӕ-ӕртӕ хатты фыддӕртӕ,

³⁰ цӕмӕй йӕ ингӕнӕй бахиза, цӕмӕй йыл царды хур ракӕса.

³¹ Байхъус мӕм, Иов, лӕмбынӕг, ды дӕ дзыхыл хӕц, ӕмӕ дын ӕз дзурон,

³² фӕлӕ дӕм кӕд исты зӕгъинаг ис, уӕд мын дзуапп ратт: раст кӕй дӕ, ууыл мӕ баууӕндын фӕндид.

³³ Кӕд, цы зӕгъай, уый дын нӕй, уӕд мӕнмӕ байхъус. Ды дӕ дзыхыл хӕц, ӕмӕ дын ӕз зонд бацамонон».