Иовы чиныг 28 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Куырыхон зонд, кӕм дӕ?

¹ Ӕвзистӕн ис ӕрзӕткъахӕн, сыгъзӕринӕн — куынцгом.

² Зӕххӕй самал кӕнынц ӕфсӕн, ӕрзӕтӕй рауадзынц ӕрхуы.

³ Адӕймаг срухс кӕны тар, ӕрзӕт агурӕг зӕххы арфы, мӕрдон сӕудары балӕууы.

⁴ Ӕрзӕткъахӕн скӕнынц, адӕймаджы къах кӕм не ’рлӕууыди, ахӕм рӕтты, фӕндаггӕттӕй — рох, ӕрцауындзӕг вӕййынц, дзедзырой кӕнынц, адӕмӕй дард сты.

⁵ Хор цы зӕххыл ӕрзайы, уымӕн цыма йӕ арф арты батайын кодтой.

⁶ Йӕ къуыбӕртты ӕмбӕхсынц сапфиртӕ, йӕ сыджыты — сыгъзӕрины муртӕ.

⁷ Тугдзых маргъ сӕм фӕндаг нӕ зоны, уарийы цӕст сыл никуы ӕрхӕцыд.

⁸ Сырдты хъалдӕр йӕ фӕндаг ууылты никуы ракодта, домбай йӕ дзӕмбы уыцы ран никуы ӕрӕвӕрдта.

⁹ Адӕймаг та айнӕгыл йӕ тых ӕвзары, хӕхты уидӕгтӕ фӕйлауы.

¹⁰ Дуры хуылфы фӕндаг айгӕрды ӕмӕ дзы хӕзнайӕ цы ис, уыдон басгары.

¹¹ Донгуырӕнтыл гуыдыр сӕвӕры, арф сусӕгтӕ рахӕссы рухсмӕ.

¹² Фӕлӕ уӕлзонд кӕм ссардӕуа, зондагур кӕдӕм фӕцыдӕуа?

¹³ Адӕймаг ын аргъ нӕ кӕны, цӕрдудтӕ цы зӕххыл цӕрынц, уым ын ссарӕн нӕй.

¹⁴ Фурды хуыдым дзуры: „Мӕнмӕ нӕй“. Денджыз фӕзӕгъы: „Мӕнмӕ дӕр нӕй“.

¹⁵ Сыгъдӕг сыгъзӕринӕй йӕ нӕ балхӕндзынӕ, ӕвзистӕй йӕ нӕ самал кӕндзынӕ.

¹⁶ Офираг зӕринӕй йын саргъгӕнӕн нӕй, зынаргъ дуртӕ сапфир ӕмӕ ониксӕй йӕ нӕ балхӕндзынӕ.

¹⁷ Сыгъзӕрин ӕмӕ авгӕй йын аргъ не скӕндзынӕ, сыгъдӕг сыгъзӕринӕй конд мигӕнӕнтыл ӕй нӕ баивдзынӕ.

¹⁸ Дзӕнхъа ӕмӕ кораллӕн сӕ кой дӕр ма скӕн, куырыхон зонд лалӕй зындӕр амалгӕнӕн у.

¹⁹ Эфиопаг топазтӕй йын нӕ саргъ кӕндзынӕ, сыгъдӕг сыгъзӕрин ын не сбардзынӕ йӕ ныхмӕ.

²⁰ Уӕдӕ кӕцӕй ӕрцӕуы уӕлзонд? Зонд кӕм ис ссарӕн?

²¹ Цыдӕриддӕр удгоймаг ис — се ’ппӕтӕй дӕр ӕмбӕхст у, тӕхаг мӕргътӕ дӕр ын ницы зонынц.

²² Аваддон ӕмӕ мӕлӕт зӕгъдзысты: „Йӕ кой йын хъусӕм ӕрмӕст“.

²³ Фӕндаг ӕм зоны ӕрмӕст Хуыцау, ӕрмӕстдӕр Уымӕн у зындгонд, цы ран ис, уый.

²⁴ Уымӕн Йӕ цӕст арвгӕронӕй дарддӕр ӕххӕссы, Уый арвы бын алцыдӕр уыны.

²⁵ Дымгӕтӕн хъару куы лӕвӕрдта, дӕттӕн сӕ бӕрц куы снысан кодта,

²⁶ къӕвдатӕн — кӕм уаргӕ сын у, уый, арвӕрттывдӕн фӕндаг куы амыдта,

²⁷ уӕд Уый федта уӕлзонд, сфӕлтӕрдта ӕмӕ йӕ сфидар кодта.

²⁸ Ӕмӕ загъта адӕймагӕн: „Хуыцауы тас — уый мидӕг ис уӕлзонд, фыддзинадӕй хи хизын — зонды ӕвдисӕн уый у“».