Иовы чиныг 26 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Иовы дзуапп Билдадӕн

¹ Ӕмӕ дзуапп радта Иов:

² «О, мӕнӕ куыд феххуыс дӕ ӕнӕбонӕн! Йӕ лӕмӕгъ цонгӕн ын цы ’нцой разындтӕ?

³ Цыбырзондӕн цы бауынаффӕ кодтай? Уӕззаузондӕй йын цы бацамыдтай?

⁴ Уыцы ныхӕстыл дӕ чи сахуыр кодта, дӕ комы дын сӕ цавӕр мон бавӕрдта?

⁵ Стъӕлфынц рефаимтӕ дӕлдзӕхы, стъӕлфынц дӕттӕ ӕд цӕрӕгойтӕ.

⁶ Мӕрдтыбӕсты дуар гом у Йӕ разы, Аваддонӕн Дзы бамбӕхсӕн нӕй.

⁷ Уый айтыгъта цӕгат афтид тыгъдады сӕрмӕ, ницӕуыл ӕрцауыгъта зӕхх.

⁸ Уый Йӕ мигъты гуыдырӕвӕрд бакӕны дон, ӕмӕ йӕ уӕзӕй ӕврӕгътӕ нӕ аскъуыйынц.

⁹ Уый сӕвӕрдта Йӕ паддзахы бадӕн, Йӕ мигъӕй йӕ ӕрӕмбӕрзта.

¹⁰ Дӕтты сӕрмӕ зиллакк скодта — рухс ӕмӕ тары астӕу.

¹¹ Уӕларвы цӕджындзтӕ ризынц, Йӕ нӕрынӕй ныккӕрзынц.

¹² Уый Йӕ хъаруйӕ сызмӕнты денджызы уылӕнтӕ, Йӕ зонды фӕрцы басӕтты Рахавы.

¹³ Йӕ комулӕфтӕй раирд вӕййы арв, Йӕ къух ӕрцӕвы цъыгъгъуытгӕнӕг калмы.

¹⁴ Уый ӕрмӕст — Йӕ хъуыддӕгты чысыл хай, куыд гыццыл фехъуыстам Уый тыххӕй! Уӕдӕ Йын Йӕ хъомысы нӕрын та кӕй зонд ӕрцахсдзӕн?»