Иовы чиныг 17 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Мӕ уд хъизӕмар кӕны, мӕ царды бонтӕ фӕфӕуынц, ингӕн мӕ цӕстытыл уайы.

² Мӕ сӕр адӕмӕн хъазинаг фӕци, хынджылӕгӕн та зын у фӕразын.

³ Дӕхӕдӕг рахӕц мӕ сӕрыл, науӕд ӕндӕр чи бацӕудзӕн мӕ бӕрны?

⁴ Ды сын нытталынг кодтай сӕ зонд ӕмӕ сӕ бӕрзонд бынаты нӕ сӕвӕрдзынӕ.

⁵ Йӕ хӕлӕртты кӕйдӕр амӕттаг чи бакӕна — йӕ хъӕбултӕн сӕ цӕстыты рухс ахуысдзӕн.

⁶ Хуыцау мӕ адӕмы дзыхы бафтыдта, ӕмӕ мын мӕ цӕсгомыл тутӕ кӕнынц.

⁷ Саугуырм бадӕн мастӕй, царм ӕмӕ стджытӕ ма мӕ баззади.

⁸ Уымӕ кӕсгӕйӕ, раст адӕймаг ныккӕрзы, ӕнаххостӕ мӕсты кӕнынц ӕнӕхуыцӕуттӕм.

⁹ Раст лӕг йӕ фӕндагыл фидар хӕцы, йӕ къухтӕ сыгъдӕг кӕмӕн сты, уымӕн йӕ тыхыл фылдӕрӕй-фылдӕр ӕфтдзӕн.

¹⁰ Сымах та ма иу хатт бафӕлварут, рацӕут ардӕм ӕмӕ мӕ ныхмӕ сдзурут — ӕз уе ’хсӕн иу куырыхоны дӕр не ссардзынӕн.

¹¹ Аивгъуыдтой мӕ царды бонтӕ. Мӕ бӕллицтӕй — мӕ зӕрдӕйы фӕндиӕгтӕй — фыдӕнхъӕл фӕдӕн.

¹² Уыдон та ӕхсӕв бон хонынц, тагъд, дам, срухс уыдзӕн, фӕлӕ мӕ алыварс — тар.

¹³ Хи уӕзӕгау мысын мӕрдтыбӕстӕ, уат кӕнын талынджы мӕхицӕн.

¹⁴ Марды чырын хонын мӕ фыд, уаллоны — мӕ мад, мӕ хо.

¹⁵ Цӕуыл ма дарон мӕ зӕрдӕ? Чи мын фендзӕн мӕ ныфс?

¹⁶ Мемӕ мӕрдтыбӕстӕм ныххиздзӕни уый, сыджыты ’рхуысдзӕни мемӕ».