Иовы чиныг 16 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Иовы дзуапп Елифазӕн

¹ Ӕмӕ дзуапп радта Иов:

² «Ахӕм ныхӕстӕ ӕз бирӕ фехъуыстон, уӕ ныфсӕвӕрӕн ныхӕстӕй масты ӕфтаут ӕрмӕстдӕр.

³ Цымӕ ацы дзӕгъӕлдзырдӕн кӕрон кӕд уыдзӕн? Уый бӕрц дӕ удхарӕй цы мары, цӕмӕй ахӕм дзуапп раттай?

⁴ Сымах мӕ бынаты куы уаиккат, уӕд ӕз дӕр ахӕм ныхӕстӕ кӕнин; дзурин уӕ ныхмӕ, мӕ сӕр-иу, уайдзӕфгӕнгӕ, банкъусин.

⁵ Дзӕгъӕлдзырдӕй уын ныфсытӕ ’вӕрин, былты змӕлдӕй уӕ сабыр кӕнин.

⁶ Дзургӕйӕ дӕр не ’нцайы мӕ рыст, ӕдзӕмӕй дӕр мын нӕу ӕнцондӕр.

⁷ Мӕ тых мын басаста бынтондӕр, мӕ бинонты мын бабын кодта.

⁸ Фӕлӕбурдта мӕм, мӕ ныхмӕ Йӕхӕдӕг ӕвдисӕн ныллӕууыд, мӕ азымыл мӕ лӕмӕгъдзинад дӕр дзуры.

⁹ Фыр мӕстӕй мӕ ’ргӕвды, Йӕ дӕндӕгты къӕс-къӕс мӕм цӕуы; ныккастысты мӕм ме знӕгтӕ.

¹⁰ Сӕ дзыхтӕ мӕм ныххӕлиу кодтой, мӕстӕй мӕ марынц, мӕ рустӕ мын цӕвынц.

¹¹ Ӕнӕхуыцӕутты амӕттаг мӕ бакодта Хуыцау, ӕнаккӕгты къухтӕм мӕ радта.

¹² Ӕвӕлмон уыдтӕн, фӕлӕ мын Уый мӕ бӕрзӕймӕ фӕлӕбурдта, тугӕрхӕмттӕ мӕ фӕкодта, Йӕхицӕн мӕ мысанӕн сӕвӕрдта.

¹³ Ихуарӕгау мыл Йӕ фӕттӕ ныккалдта, уыргӕфтыд ӕмӕ тугомынты мӕ фӕкодта.

¹⁴ Мӕ буар Йӕ цӕфтӕй нал зыны, нӕрӕмон хӕстонау мыл Йӕхи ныццавта.

¹⁵ Мӕ буар сӕхъис дарӕсӕй ӕрбамбӕрзтон, мӕ кад фӕнычы баныгӕдтон.

¹⁶ Фыр куыдӕй судзы мӕ цӕсгом, саудалынг мын сӕхгӕдта мӕ цӕстытӕ.

¹⁷ Афтӕмӕй мӕ зӕрдӕмӕ ницы хӕссын, сыгъдӕгзӕрдӕйӕ цӕуы мӕ куывд.

¹⁸ О зӕхх! Мӕ туг мын ма басусӕг кӕн — мӕ фӕдисхъӕр мын дӕ хуылфы ма бамбӕхс!

¹⁹ Уӕлӕрвты мын ис Ӕвдисӕн, бӕрзӕндты мын ис Сӕрылхӕцӕг.

²⁰ Мӕ хӕлӕрттӕ мыл худынц, фӕлӕ мӕ цӕссыг Хуыцауы раз калын.

²¹ Хуыцауы ӕмӕ адӕймаджы ӕхсӕн тӕрхонгӕнӕг чи ныллӕудзӕн, дыууӕ лӕджы быцӕу куыд аскъуыддзаг кӕнынц, уыйау.

²² Уымӕн ӕмӕ нымад сты мӕ царды бонтӕ, ӕмӕ ӕз фӕцӕудзынӕн, раздӕхӕн кӕцӕй нӕй, уырдӕм.