Иовы чиныг 15 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Елифазы дыккаг ныхас

¹ Ӕмӕ йын дзуапп радта Елифаз, теманаг:

² «Куырыхон лӕг уӕлӕнгай ныхас нӕ кӕны, скӕсӕйнаг фыддымгӕйӕ йӕхи нӕ ныддымсы.

³ Сӕнттӕ цӕгъдын дын не ’мбӕлди, быцӕугӕнгӕйӕ: куырыхон лӕг ахӕм ӕнӕуаг дзыхӕй нӕ дзуры.

⁴ Хуыцауы тас дӕхицӕй аиуварс кодтай ӕмӕ иннӕты куывд къуылымпы кӕныс.

⁵ Дӕ тӕригъӕд дӕ ардауы афтӕ дзурыныл, ӕмӕ мӕнгард ныхас кӕныс.

⁶ Ӕз нӕ — дӕхи ’взаг дӕ кӕны азымджын, дӕхи ныхӕстӕ дыл цӕуынц комдзог.

⁷ Исты ӕппӕт адӕмы разӕй ды райгуырдтӕ, къуылдымтӕй дӕр раздӕр ды равзӕрдтӕ?

⁸ Ӕви Хуыцауы ӕмбырды уыдтӕ ӕмӕ ӕппӕт уӕлзонд дӕр дӕхи бакодтай?

⁹ Уагӕры ды, мах цы нӕ зонӕм, ахӕмӕй цы зоныс? Махӕн ӕнӕмбӕрст цы у, ахӕмӕй цы бамбӕрстай,

¹⁰ не ’хсӕн урссӕр зӕрӕдтӕ дӕр куы ис, дӕ фыдӕй дӕр зӕронддӕртӕ?

¹¹ Ау, Хуыцауы зӕрдӕвӕрд дын фаг нӕу? Ау, хӕларзӕрдӕ ныхӕстӕ чысыл фехъуыстай ды?

¹² Дӕ зӕрдӕйы фӕдыл кӕдӕм цӕуыс, уыцы сӕрхызтӕй дӕ ных кӕдӕм сарӕзтай,

¹³ Хуыцауӕн Йӕ ныхмӕ куы сдӕ ӕмӕ ахӕм ныхӕстӕ куы кӕныс, уӕд?

¹⁴ Цы у адӕймаг, цӕмӕй сыгъдӕг уа? Сылгоймаг кӕй ныййардта, уымӕн рӕстуд уӕвӕн куыд ис,

¹⁵ кӕд ӕмӕ Хуыцау Йӕ сыгъдӕджытыл дӕр не ’ууӕнды, арв дӕр сыгъдӕгыл нӕ нымайы?

¹⁶ Адӕймаг та бынтон ӕлгъаг ӕмӕ хӕлд у, тӕригъӕды бацӕуын уымӕн дон нуазынау у.

¹⁷ Ӕрбайхъус-ма, ӕмӕ дын радзурон, мӕхи цӕстӕй цы федтон,

¹⁸ куырыхонтӕ фыдӕлтӕй цы фехъуыстой ӕмӕ цы нӕ басусӕг кодтой, уый.

¹⁹ Ӕрмӕстдӕр уыдонӕн лӕвӕрд ӕрцыди зӕхх, ӕмӕ ӕндӕр искӕмӕн се ’хсӕн бынат нӕй.

²⁰ Ӕнаккаг йӕ бонтӕ хъизӕмаримӕ ’рвиты, нымад сты йӕ азтӕ фыдгӕнӕгӕн.

²¹ Удаист хъӕр йӕ хъусты зӕлы, ӕнӕнхъӕлӕджы йӕм ӕрбалӕууы йӕ сафӕг.

²² Саудалынгӕй фервӕзыны ӕнхъӕл нал у, марӕн цыргъаг ӕм ӕппынӕдзух дардӕуы.

²³ Рахау-бахау кӕны сынтыты холыйау, зоны: йӕ сӕфты бон ӕм цӕттӕйӕ лӕууы.

²⁴ Зындзинӕдтӕ ӕмӕ йӕ бӕллӕхтӕ тасы ӕфтауынц, сӕ быны йӕ скодтой тыхагур паддзахау,

²⁵ уымӕн ӕмӕ Хуыцаумӕ йӕ къух систа, Ӕппӕтхъомысы ныхмӕ растади,

²⁶ сӕрхызтӕй-иу Йӕ размӕ уӕззау уартимӕ ралӕууыд;

²⁷ уымӕн ӕмӕ фыр нӕрдӕй йӕ цӕстытӕ дӕр нал зынынц, йӕ фӕрстӕ ӕрзӕбултӕ сты.

²⁸ Ӕрцӕрдзӕни гӕныстон сахарты, ӕркӕлынӕввонг ӕдзӕрӕг хӕдзӕртты.

²⁹ Цард ыл не ’рхӕцдзӕн, бын не скӕндзӕн, зӕххыл не ’рбынӕттон уыдзӕн.

³⁰ Сау бон ыл акӕндзӕн, йӕ талатӕ арты бавзалы уыдзысты, Хуыцауы комытӕфӕй ӕрбайсӕфдзӕн.

³¹ Тутт ныфсытӕ ма ’вӕрӕд йӕхицӕн: уыдон ын ницы пайда ӕрхӕсдзысты.

³² Йӕ афонмӕ нӕ ахӕццӕ уыдзӕн, йӕ къалиутӕ быгъдӕгӕй аззайдзысты.

³³ Сӕнӕфсирау йӕ гага цъӕхӕй азгъӕлдзӕн, оливӕйау йӕ дидин ӕрызгъӕлдзӕни зӕхмӕ.

³⁴ Уымӕн ӕмӕ ӕнӕхуыцауы къона ӕвӕстаг у, уӕййаг лӕджы цатыр зынджы хай кӕны.

³⁵ Ахӕм адӕймаг йӕ зӕрдӕйы бын фыдбылыз хӕссы, аргӕ бӕллӕх кӕны, йӕ мидӕг ӕрмӕстдӕр мӕнгарддзинад ӕвзӕры».