Иовы чиныг 14 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Сылгоймаг кӕй ныййардта, уыцы адӕймагӕн йӕ цард цыбыр у, йӕ маст та — бирӕ.

² Дидинӕгау райхӕлы ӕмӕ бахус вӕййы, ӕндӕргау фӕзыны ӕмӕ фӕцыдӕр вӕййы.

³ Ӕмӕ Дӕ цӕстытӕ уымӕй нӕ исыс, тӕрхондонмӕ уый кӕныс?

⁴ Чъизи цы у, уырдыгӕй исчи сыгъдӕгӕй исты райсдзӕни? Ничи.

⁵ Кӕд адӕймагӕн йӕ царды бонтӕ нымад сты, кӕд Дын йӕ мӕйтӕ дӕр барст сты, ӕмӕ йын уыцы арӕны сӕрты ахизӕн нӕй,

⁶ уӕд ӕй иу чысыл сулӕфын бауадз, ӕххуырст кусӕг йӕ куысты фӕстӕ куыд баулӕфы, афтӕ.

⁷ Бӕласы дӕр ма йӕ фидӕнӕй ныфс и: акалӕнт ӕй — йӕ бындзӕфхад ногӕй ӕвзар суадздзӕн.

⁸ Йӕ уидӕгтӕ зӕххы бын куы базӕронд уой, йӕ мард къодах зӕххы бын куы фӕуа,

⁹ уӕд дӕр, доны хъӕстӕ фӕци, зӕгъгӕ, ногӕй ӕвзартӕ суадздзӕн ӕмӕ ӕвзонг талайау рӕзынмӕ фӕуыдзӕн.

¹⁰ Лӕг та амӕлы ӕмӕ бартхутӕг вӕййы. Йӕ уд сисы ӕмӕ нал фӕзыны.

¹¹ Цады дон байсысы, цӕугӕдон бахус вӕййы, хуыскъ адаг фесты.

¹² Афтӕ адӕймаг дӕр: ӕруатон вӕййы ӕмӕ нал сысты, ӕмӕ, цалынмӕ арв йӕ бынаты уа, уӕдмӕ уый йӕ мӕрдон фынӕйӕ нӕ райхъал уыдзӕн.

¹³ Тӕхуды, мӕрдтыбӕсты мӕ куы бамбӕхсис, цалынмӕ Дӕ маст ӕрцӕуа ӕмӕ афтӕмӕй бӕлвырд ӕмгъуыды фӕстӕ Дӕ зӕрдыл ӕрлӕууон, уӕдмӕ!

¹⁴ Фӕлӕ ма амӕлӕг куыд райгас уыдзӕни? Цалынмӕ мӕ рӕстӕг ахицӕн уа, уӕдмӕ ӕнхъӕлмӕ кӕсдзынӕн фервӕзынмӕ.

¹⁵ Басиддзынӕ мӕм, ӕмӕ Дын ӕз дзуапп ратдзынӕн: Ды ме Скӕнӕг дӕ ӕмӕ мӕ ӕрымысдзынӕ.

¹⁶ Мӕ алы къахдзӕф дӕр мын нымайыс ныр, фӕлӕ мӕм уӕд тӕригъӕд кӕд нал агурис,

¹⁷ мӕ тӕригъӕдтӕ мын мыхуырӕвӕрд скӕнис, мӕ аххӕстӕ мын бамбӕхсис.

¹⁸ Фӕлӕ хох куы рафӕлдӕхы, уӕд базгъӕлӕнтӕ вӕййы, къӕдзӕх йӕ бынатӕй феггуырсы;

¹⁹ дон дуртӕ баууилы, зӕххы уӕлцъар йӕ уӕлныхты айсы. Афтӕ Ды дӕр адӕймаджы ныфс амарыс!

²⁰ Куы йӕ ’рцӕвай — ӕрбайсӕфдзӕни ӕнустӕм, йӕ цӕсгомы хуыз ын аивдзынӕ ӕмӕ йӕ арвитдзынӕ.

²¹ Йӕ зӕнӕг рӕгъмӕ рацыдысты ӕви нӕ, уый нӕ зондзӕн; исчи сӕ ӕфхӕры ӕви нӕ, уый нӕ фендзӕн.

²² Ӕрмӕст йӕхи буары рыстӕй риссы, ӕрмӕст йӕхи удыл марой кӕны».