Иовы чиныг 13 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Ӕппӕт уыдӕттӕ ӕз мӕхи цӕстӕй федтон, алцы ӕз мӕхи хъусӕй фехъуыстон ӕмӕ алцыдӕр бамбӕрстон.

² Ӕз дӕр сымахӕй къаддӕр нӕ зонын, сымахӕй дӕлдӕр ницӕмӕй дӕн.

³ Фӕлӕ мӕн фӕнды Ӕппӕтхъомысимӕ дзурын, мӕн фӕнды Хуыцауимӕ быцӕу кӕнын!

⁴ Сымах та мӕ дзӕбӕх кӕнут мӕнгдзинадӕй, уе ’ппӕт дӕр стут ницӕйаг хосгӕнджытӕ!

⁵ Фӕлтау куы ныхъхъус уаиккат, уӕд уый уӕ зондыл дзурӕг уаид.

⁶ Ӕрбайхъусут, цы уын зӕгъын, уымӕ ӕмӕ ахъуыды кӕнут мӕ ныхӕстыл.

⁷ Уӕ сайӕн ныхӕстӕ Хуыцауы кӕм хъӕуынц, ау, Уый сӕраппонд сайгӕ кӕндзыстут?

⁸ Йӕ сӕрвӕлтау фӕливгӕ кӕнут, Йӕ сӕрыл хӕцын сымахмӕ кӕсы?

⁹ Куы уӕ бафӕлвара, уӕд та цы фӕуыдзыстут? Адӕймаджы куыд асайут, афтӕ Йӕ афӕливдзыстут?

¹⁰ Цурон митӕ Йын куы кӕнат, уӕд дӕр уӕ Йӕ азар нӕ фӕивгъуыйдзӕн.

¹¹ Ау, Йе стырадӕй не стъӕлфут, Йӕ азарӕй Йын нӕ тӕрсут?

¹² Уӕ ныхӕстӕ рыгӕй уӕлдай не сты, ӕлыгӕй конд уартыл уӕ зӕрдӕ ма дарут.

¹³ Ныхъхъус ут уӕдӕ, дзырды бар мын раттут.

¹⁴ Мӕхимӕ дӕндагӕй лӕбурын, мӕ къухы дарын мӕ уд.

¹⁵ Мары мӕ — уӕддӕр Ыл мӕ зӕрдӕ дардзынӕн, мӕ рӕстдзинадыл дзурдзынӕн Йӕ разы,

¹⁶ ӕмӕ уый фӕрцы фервӕздзынӕн. Ӕнӕхуыцау та Йӕм хӕстӕг бацӕуын дӕр нӕ бауӕнддзӕн!

¹⁷ Лӕмбынӕг-ма ӕрбайхъусут, цы уын дзурын, уымӕ.

¹⁸ Ӕз мӕ сӕрыл мӕхӕдӕг рахӕцдзынӕн, уымӕн ӕмӕ, раст дӕн, уый зонын.

¹⁹ Мӕ ныхмӕ дзурын кӕд ӕмӕ искӕй бон суа, уӕд ӕз банцайдзынӕн ӕмӕ мӕ уд сисдзынӕн.

²⁰ Дыууӕ хъуыддагӕй мӕ бахиз ӕрмӕст, ӕмӕ Дӕ мӕхи нал ӕмбӕхсдзынӕн:

²¹ Дӕ къух мӕм мауал ис ӕмӕ мын мӕ уд мауал лас Де стыр тасӕй!

²² Уӕд-иу мӕм фӕсид, ӕмӕ Дын дзуапп ратдзынӕн, кӕнӕ мын ратт ныхасы бар, ӕмӕ мын дзуапп дӕтт Дӕхӕдӕг.

²³ Мӕ тӕригъӕдтӕ, мӕ фыдракӕндтӕ бирӕ сты? Бацамон мын мӕ тӕригъӕдтӕ ӕмӕ мӕ рӕдыдтытӕ.

²⁴ Цӕмӕн мӕ ӕмбӕхсыс Дӕ цӕсгом, Дӕхицӕн мӕ знагыл цӕмӕн нымайыс?

²⁵ Бӕласӕй цы сыф ӕрхауди, ууыл Дӕ тых фӕлварыс? Хус тихалӕг Дӕ уӕлныхты цы сисыс?

²⁶ Кӕуинаг хъысмӕт мын сныв кодтай, мӕ рагбонты рӕдыдтытӕ мын бафидын кодтай карзӕй.

²⁷ Мӕ къӕхтыл мын хъадамантӕ бакодтай, гакк мыл сӕвӕрдтай, мӕ алы къахдзӕф дӕр Дын нысангонд у.

²⁸ Ӕмӕ бартхутӕг дӕн бутъройау, рӕмпӕгдзӕф дарӕсау мӕхимидӕг згъӕлын.