Иовы чиныг 11 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Цофары фыццаг ныхас

¹ Ӕмӕ йын дзуапп радта Цофар, наамайаг:

² «Дӕргъвӕтин ныхасӕн дзуапп нӕй, ӕнхъӕлыс? Бирӕ чи дзуры, дӕумӕ гӕсгӕ, раст уый вӕййы?

³ Дӕ дзӕгъӕлдзырдмӕ дын хъуамӕ хъусӕй лӕууӕм, куы нӕ хъазай, уӕд дын макӕ мачи зӕгъа?

⁴ Афтӕ дӕм кӕсы, цыма рӕстытӕ дзурыс ӕмӕ Хуыцауы раз сыгъдӕг дӕ.

⁵ Фӕлӕ ныр, тӕхуды, Хуыцау исты куы сдзурид ӕмӕ дын дзуапп куы раттид,

⁶ Уӕлзонды сусӕгтӕ — уӕлзонд бирӕвӕрсыг у — дын куы раргом кӕнид, уӕд базонис, дӕ тӕригъӕдтӕ дын Хуыцау ӕгӕр хорз дӕр ма кӕй бары, уый.

⁷ Хуыцауы ды куыд хъуамӕ раиртасай, Ӕппӕтхъомысы ӕххӕстӕй куыд хъуамӕ бамбарай?

⁸ Уый арвӕй уӕлдӕр у. Куыд ӕм сӕххӕсдзынӕ? Мӕрдтыбӕстӕй арфдӕр у. Куыд ӕй базондзынӕ?

⁹ Зӕххӕй ӕгӕрондӕр, фурдӕй фӕтӕндӕр у Уый.

¹⁰ Кӕмӕ фӕкомкоммӕ уа ӕмӕ ахӕстоны кӕй бакӕна, уымӕн цы йӕ бон у?

¹¹ Уый зоны мӕнгӕрдты; тӕригъӕд куы фена, уӕд ӕй афтӕ куыд ныббардзӕн?

¹² Адӕймаг йе ’нӕзондӕй зондджын ныхӕстыл схӕцы, афтӕмӕй хъӕддаг хӕрӕгӕй уӕлдай ницы ӕмбары.

¹³ Дӕхи куы ӕрӕмбарай ӕмӕ Йӕм, лӕгъстӕгӕнгӕ, дӕ цӕнгтӕ куы ивазай,

¹⁴ дӕ тӕригъӕдтӕй куы фервӕзай, дӕ цатырты аипджынӕй куы ницыуал ныууадзай,

¹⁵ уӕд ӕнӕкъӕмдзӕстыгӕй равдисдзынӕ дӕ цӕсгом, фидар лӕудзынӕ дӕ къӕхтыл, ӕмӕ дӕ ницы тас уыдзӕни.

¹⁶ Ферох дӕ уыдзысты уӕд дӕ хъизӕмӕрттӕ, чи акалди, уыцы донау нал ӕрлӕудзысты дӕ зӕрдыл.

¹⁷ Бонрӕфтау ныййирд уыдзӕни дӕ цард, сӕуӕхсидау срухс уыдзӕни дӕ цӕсгом.

¹⁸ Ӕрсабыр уыдзынӕ, ныфс дӕ бацӕудзӕни, тас дын ницӕмӕй уыдзӕн, ӕмӕ ӕнӕмӕтӕй бафынӕй кӕндзынӕ.

¹⁹ Дӕхицӕн ӕнцад хуысдзынӕ, ӕмӕ дын тас никӕмӕйуал уыдзӕн, бирӕтӕ дӕ зӕрдӕ балхӕныныл архайдзысты.

²⁰ Ӕнаккӕгтӕн та сӕ цӕстыты рухс ахуысдзӕн, сӕ сӕр кӕм бафснайой, уый сын нӕ уыдзӕн, сӕ зӕрдӕдарӕн фесӕфдзӕн».