Ионӕ 2 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Ионӕ кувы

¹ Уӕд Дунедарӕг бардзырд радта стыр кӕсагӕн, цӕмӕй Ионӕйы аныхъуыра. Ӕртӕ боны ӕмӕ ӕртӕ ’хсӕвы Ионӕ фӕци кӕсаджы гуыбыны.

² Стӕй уӕд Ионӕ кӕсаджы гуыбынӕй Дунедарӕгмӕ, йӕ Хуыцаумӕ, скуывта:

³ «Мӕ тыхст сахаты ӕз ӕрхатыдтӕн Хуыцаумӕ, мӕрдтыбӕстӕй — кӕсаджы хуылфӕй Дӕм нырдиаг кодтон, ӕмӕ мын фехъуыстай мӕ хъӕлӕс.

⁴ Сӕрсӕфӕнмӕ, денджызы арфмӕ мӕ нывзылдтай, мӕ алыварс дон фестади, Дӕ дӕттӕ ӕмӕ Дӕ уылӕнтӕ ивылдысты мӕ сӕрты.

⁵ Ӕз хинымӕр загътон: Дӕ цӕстыты разӕй тард ӕрцыдтӕн, фӕлӕ та ногӕй Дӕ сыгъдӕг Кувӕндон фендзынӕн.

⁶ Дӕттӕ ӕртыхстысты мӕ удыл, сӕрсӕфӕны февзӕрдтӕн, денджызы зайӕгойтӕ баныхӕстысты мӕ сӕрыл.

⁷ Хӕхтӕн сӕ бындурмӕ ныххӕццӕ дӕн, зӕхх мыл йе ’вдузӕнтӕ сӕхгӕдта мыггагмӕ, фӕлӕ мын Ды, Дунедарӕг, мӕ Хуыцау, мӕ уд ракӕндзынӕ зындонӕй.

⁸ Мӕ уд куы сфӕлмӕцыд мӕ мидӕг, уӕд ӕз ӕрхъуыды кодтон Хуыцауы, ӕмӕ мӕ куывд фехъуысти Дӕумӕ, Дӕ сыгъдӕг Кувӕндонмӕ.

⁹ Ницӕйаг мӕнг хуыцӕуттӕн кад чи кӕны, уыдон ӕнӕхай фесты хорзӕхӕй, сӕ бон райсын кӕй уыди, уымӕй.

¹⁰ Ӕз та Дын кады зарӕгӕй нывонд ӕрхӕсдзынӕн, цы загътон, уый сӕххӕст кӕндзынӕн. Ирвӕзындзинад Дунедарӕгмӕ ис!»

¹¹ Уӕд Дунедарӕг кӕсагӕн бардзырд радта, ӕмӕ уый Ионӕйы сурмӕ раппӕрста йӕ дзыхӕй.