Иоанн 9 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Ӕрдзӕй куырм цӕстӕй ракаст

¹ Йесо фӕцӕйцыд ӕмӕ федта, ӕрдзӕй куырм чи уыди, ахӕм адӕймаджы.

² Йӕ ахуыргӕнинӕгтӕ Йӕ бафарстой: «Равви, куырмӕй цӕмӕн райгуырд? Йӕхӕдӕг у тӕригъӕдджын ӕви йӕ ныййарджытӕ?»

³ Йесо сын дзуапп радта: «Нӕдӕр йӕхӕдӕг тӕригъӕд ракодта, нӕдӕр йӕ ныййарджытӕ, фӕлӕ куырм у Хуыцауы хъару йыл равдисыны тыххӕй.

⁴ Цалынмӕ бон у, уӕдмӕ хъуамӕ аразон, Чи Мӕ рарвыста, Уый хъуыддӕгтӕ. Тагъд ралӕудзӕн ӕхсӕв, ӕмӕ уӕд ничиуал ницы сараздзӕн.

⁵ Цалынмӕ Ӕз дунейы дӕн, уӕдмӕ Ӕз дунейӕн дӕн рухс».

⁶ Афтӕ зӕгъыны фӕстӕ ӕрту кодта зӕхмӕ, сыджыт йӕ сӕтимӕ азмӕста, куырмы цӕстытӕ дзы айсӕрста

⁷ ӕмӕ йын загъта: «Ацу ӕмӕ дӕ цӕсгом Силоамы найӕны цӕхс». («Силоам» нысан кӕны «ӕрвыст».) Уый ацыд, йӕхи цӕхсадта ӕмӕ фӕстӕмӕ, йӕ цӕстӕй ракаст, афтӕмӕй ӕрбаздӕхти.

⁸ Йӕ сыхӕгтӕ, стӕй йӕ раздӕр мӕгуыргурӕй чи уыдта, уыдон дзырдтой: «Ам-иу чи бадти, уыцы мӕгуыргур нӕу, ӕви?»

⁹ Иннӕтӕ дзырдтой: «Уый у». Аннӕтӕ та: «Нӕу, фӕлӕ уый хуызӕн у». Йӕхӕдӕг та-иу загъта: «Уый ӕз дӕн».

¹⁰ Уӕд ӕй фарстой: «Цӕстӕй куыд ракастӕ?»

¹¹ Уый сын дзуапп лӕвӕрдта: «Йесо Кӕй хонынц, Уый сыджыт сӕтимӕ сызмӕста, мӕ цӕстытӕ мын дзы байсӕрста ӕмӕ мын загъта: „Ацу Силоамы найӕнмӕ ӕмӕ дӕхи цӕхс“. Ӕз ацыдтӕн, мӕхи цӕхсадтон ӕмӕ цӕстӕй ракастӕн».

¹² Бафарстой йӕ: «Кӕм ис уыцы Адӕймаг?» Уый сын дзуапп радта: «Нӕ зонын».

Фарисейты нӕ уырны, ӕрдзӕй куырм кӕй сдзӕбӕх ис, уый

¹³ Уӕд раздӕры куырмы фарисейтӕм акодтой.

¹⁴ Йесо сыджыт куы сызмӕста ӕмӕ йӕ цӕстӕй куы ракӕсын кодта, уӕд уыди сабат.

¹⁵ Цӕстӕй куыд ракасти, уымӕй йӕ фарисейтӕ дӕр бафарстой. Уый сын загъта: «Уыцы Адӕймаг мын сыджыты змӕст ӕрӕвӕрдта мӕ цӕстытыл, ӕз мӕхи цӕхсадтон ӕмӕ уынын райдыдтон».

¹⁶ Уӕд фарисейтӕй иутӕ загътой: «Уыцы Адӕймаг Хуыцауӕй нӕу, уымӕн ӕмӕ сабаты ӕгъдау халы». Иннӕтӕ та дзырдтой: «Тӕригъӕдджын адӕймагӕн йӕ бон куыд у ахӕм диссӕгтӕ аразын?» Ӕмӕ сӕм иу хъуыды нал уыд.

¹⁷ Уӕд та ногӕй фӕрсынц куырмы: «Ды та уыцы Адӕймаджы тыххӕй цы зӕгъдзынӕ? Цӕстӕй дӕ куы ракӕсын кодта». Уый сын дзуапп радта: «Пехуымпар у».

¹⁸ Фӕлӕ куырм кӕй уыд ӕмӕ цӕстӕй кӕй ракаст, уый уӕддӕр иудейӕгты нӕ уырныдта. Йӕ ныййарджытӕм ын фӕсидтысты

¹⁹ ӕмӕ сӕ бафарстой: «Ай уӕ фырт у? Афтӕ зӕгъут, куырмӕй райгуырд? Ӕмӕ уӕдӕ ныр цӕстӕй куыд ракаст?»

²⁰ Уыдон сын дзуапп радтой: «Нӕ фырт кӕй у ӕмӕ ӕрдзӕй куырм кӕй рахаста, уый зонӕм.

²¹ Цӕстӕй куыд ракаст ӕмӕ йын йӕ цӕстытӕ чи байгом кодта, уый та нӕ зонӕм. Йӕхи йын бафӕрсут, сывӕллон нал у, йӕхӕдӕг зӕгъӕд йӕхи тыххӕй».

²² Йӕ ныййарджытӕ иудейӕгтӕй тарстысты ӕмӕ ахӕм дзуапп уымӕн радтой, уымӕн ӕмӕ иудейӕгты уынаффӕмӕ гӕсгӕ, Йесойы ӕргомӕй Чырыстийыл чи банымайа, уый хъуамӕ синагогӕйӕ тард ӕрцыдаид.

²³ Гъе уымӕ гӕсгӕ загътой йӕ ныййарджытӕ: «Сывӕллон нал у, йӕхи йын бафӕрсут».

²⁴ Ӕмӕ та уӕд дыккаг хатт фӕдзырдтой раздӕры куырммӕ ӕмӕ дзы домдтой: «Раст зӕгъ Хуыцауы раз. Мах зонӕм, уыцы Адӕймаг тӕригъӕдджын кӕй у, уый».

²⁵ Уый сын загъта: «Тӕригъӕдджын у ӕви нӕ, уымӕн ӕз ницы зонын. Ӕз иу хъуыддаг зонын — уыдтӕн куырм, ныр та уынын».

²⁶ Ногӕй та йӕ бафарстой: «Уыцы Адӕймаг дын цы бакодта? Цӕстӕй дӕ цы амалӕй ракӕсын кодта?»

²⁷ Дзуапп сын радта: «Ӕз уын ӕй загътон, фӕлӕ мӕм сымах нӕ хъуыстат. Уымӕ ма уӕ дыккаг хатт хъусын цӕй тыххӕй фӕнды? Ӕви сымах дӕр Йӕ ахуыргӕнинӕгтӕ суӕвынмӕ хъавут?»

²⁸ Уыдон ӕй ӕфхӕрын райдыдтой ӕмӕ йын загътой: «Уый ды дӕ Йӕ ахуыргӕнинаг, мах та Моисейы ахуыргӕнинӕгтӕ стӕм.

²⁹ Моисеимӕ Хуыцау кӕй ныхас кодта, уый мах зонӕм, фӕлӕ Ай кӕцӕй у, уымӕн ницы зонӕм».

³⁰ Уыцы лӕг та сын загъта: «Диссаг дӕр уый у, ӕмӕ кӕцӕй у, уый нӕ зонут, афтӕмӕй мӕн та цӕстӕй ракӕсын кодта.

³¹ Фӕлӕ мах зонӕм, Хуыцау тӕригъӕдджынтӕм кӕй нӕ хъусы, уый. Чи Йӕ нымайы ӕмӕ Йын Йӕ фӕндон чи ӕххӕст кӕны, Хуыцау уымӕ хъусы.

³² Незамантӕй нырмӕ, ӕрдзӕй куырмы исчи цӕстӕй ракӕсын кодта, зӕгъгӕ, ахӕм диссаг ничима фехъуыста.

³³ Уый Хуыцауӕй куы нӕ уаид, уӕд Ын ницы ӕнтысид».

³⁴ Уыдон ын загътой: «Сӕрӕй къӕхтӕм тӕригъӕдджынӕй куы райгуырдтӕ, уӕд ды мах ахуыр кӕныс?» Ӕмӕ йӕ ратардтой.

³⁵ Кӕй йӕ ратардтой, уый Йесо куы фехъуыста, уӕд ӕй ссардта ӕмӕ йын загъта: «Хуыцауы Фыртыл ӕууӕндыс?»

³⁶ Уый дзуапп радта: «Уый та чи у, Хицау? Зӕгъ мын ӕй, ӕмӕ Йыл баууӕндон».

³⁷ Йесо йын загъта: «Уынгӕ дӕр Ӕй фӕкодтай, ӕмӕ ныхас дӕр Уый кӕны демӕ».

³⁸ Уӕд уый загъта: «Ӕууӕндын, Хицау!» — ӕмӕ Йӕ разы йӕ зонгуытыл ӕрхауди.

³⁹ Йесо йын загъта: «Ӕз ацы дунемӕ тӕрхон кӕнынмӕ ӕрцыдтӕн, цӕмӕй куырмытӕ цӕстӕй ракӕсой, цӕстджынтӕ та бакуырм уой».

⁴⁰ Фарисейтӕй уым Йӕ разы чи уыди, уыдон уыцы ныхӕстӕ куы фехъуыстой, уӕд Ӕй бафарстой: «Ау, мах дӕр куырмытӕ стӕм?»

⁴¹ Йесо сын загъта: «Куырм куы уаиккат, уӕд уыл тӕригъӕд нӕ уаид. Фӕлӕ уӕхи цӕстджынтыл кӕй нымайут, уымӕ гӕсгӕ сымахыл нырма дӕр ис тӕригъӕд».