Иоанн 21 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Йесо раргом ис Йӕ авд ахуыргӕнинагмӕ

¹ Уый фӕстӕ та Йесо ногӕй фӕзынди Йӕ ахуыргӕнинӕгтӕм. Уый уыди Тивериадӕйы денджызы был. Хабар уыди афтӕ.

² Симон Петр, фӕсномыгӕй Фаззон кӕй хуыдтой, уыцы Фома, галилейаг Канӕйӕ чи уыди, уыцы Нафанаил, Зеведейы фырттӕ ӕмӕ ма ноджы Йесойы дыууӕ ӕндӕр ахуыргӕнинаджы уыдысты иумӕ.

³ Уӕд сӕм Симон Петр дзуры: «Ӕз кӕсаг ахсынмӕ цӕуын». Уыдон ын загътой: «Мах дӕр демӕ цӕуӕм». Ацыдысты ӕмӕ бӕлӕгъы сбадтысты, фӕлӕ уыцы ӕхсӕв ницы ӕрцахстой.

⁴ Боныцъӕхтыл Йесо лӕууыди денджызы былгӕрон, фӕлӕ ахуыргӕнинӕгтӕ Йесойы нӕ базыдтой.

⁵ Йесо сӕ бафарста: «Исты ӕрцахстат, мӕ хӕлӕрттӕ?» Уыдон Ын дзуапп радтой: «Ницы».

⁶ Уый сын загъта: «Хыз баппарут бӕлӕгъӕн йӕ рахизфарс ӕмӕ ӕрцахсдзыстут». Уыдон хыз баппӕрстой, ӕмӕ сын уый бӕрц кӕсӕгтӕ ӕрцахста, ӕмӕ йӕ сӕ бон раласын нӕ уыд.

⁷ Йесойы уарзон ахуыргӕнинаг загъта Петрӕн: «Ай Бардарӕг у». Симон Петр, Бардарӕг у, зӕгъгӕ, куы фехъуыста, уӕд йӕ пӕлӕз ронӕй ӕрбалвӕста (ӕндӕр ыл ницы уыд) ӕмӕ йӕхи денджызмӕ фехста.

⁸ Иннӕ ахуыргӕнинӕгтӕ та кӕсӕгтӕй йедзаг хыз сӕ фӕдыл ластой, афтӕмӕй бӕлӕгъы ӕрбаздӕхтысты; былмӕ сӕ бирӕ нӕ хъуыди — дыууӕсӕдӕ ӕлмӕрины бӕрц.

⁹ Былмӕ куы рахызтысты, уӕд кӕсынц, ӕмӕ арт цӕхӕрӕй судзы, зынджыты уӕлӕ — кӕсаг, йӕ фарсмӕ та — дзул.

¹⁰ Йесо сын загъта: «Уӕ ногахст кӕсӕгтӕй дӕр ма иу цалдӕр рахӕссут».

¹¹ Симон Петр бӕлӕгъмӕ бахызти ӕмӕ хыз былмӕ раласта. Хыз йедзаг уыди стыр кӕсӕгтӕй — ӕдӕппӕтӕй уыдысты сӕдӕ фӕндзай ӕртӕ, фӕлӕ уый бӕрц кӕсӕгты уӕзӕй хыз нӕ аскъуыд.

¹² Йесо сын загъта: «Рацӕут ӕмӕ аходӕн бахӕрут». Ахуыргӕнинӕгтӕй Йӕм йӕ ныфс, Чи дӕ, зӕгъгӕ, бафӕрсынмӕ ничи бахаста. Уыдон базыдтой, Бардарӕг кӕй у, уый.

¹³ Йесо бацыди, райста дзул ӕмӕ сӕм ӕй радта, стӕй кӕсаг дӕр.

¹⁴ Мӕрдтӕй райгасы фӕстӕ Йесо ныр ӕртыккаг хатт фӕзынди Йӕ ахуыргӕнинӕгтӕм.

Йесойы фӕдзӕхст Петрӕн

¹⁵ Аходӕн куы бахордтой, уӕд Йесо Симон Петры фӕрсы: «Иоанны фырт Симон, адон Мӕ цас уарзынц, ды Мӕ уымӕй фылдӕр уарзыс?» Петр Ын дзуапп радта: «О Бардарӕг! Ды зоныс, ӕз Дӕ кӕй уарзын, уый». Йесо Йын загъта: «Хиз Мӕ уӕрыччыты».

¹⁶ Дыккаг хатт дӕр та йӕ бафарста: «Иоанны фырт Симон, уарзыс Мӕ?» Петр Ын дзуапп радта: «О Бардарӕг! Ды зоныс, ӕз Дӕ кӕй уарзын, уый». Йесо йын загъта: «Фыййау у Мӕ фыстӕн».

¹⁷ Ӕртыккаг хатт ӕй бафарста: «Иоанны фырт Симон, уарзыс Мӕ?» Ӕмӕ йӕ ӕртыккаг хатт, уарзыс Мӕ, зӕгъгӕ, кӕй бафарста, уый тыххӕй Петр фенкъард ис ӕмӕ Йын дзуапп радта: «Бардарӕг, Ды алцыдӕр зоныс. Ды зоныс, ӕз Дӕ кӕй уарзын, уый». Йесо йын загъта: «Хиз Мын Мӕ фысты.

¹⁸ Ӕцӕг цы у, уый дын зӕгъын: ды ӕрыгон куы уыдтӕ, уӕд-иу дӕ рон дӕ астӕуыл дӕхӕдӕг ӕрбабастай ӕмӕ дӕ кӕдӕм фӕндыди, уырдӕм-иу ацыдтӕ. Фӕлӕ куы базӕронд уай, уӕд дӕ къухтӕ размӕ радардзынӕ, ӕндӕр исчи дын дӕ астӕуыл дӕ рон ӕрбабӕтдзӕн ӕмӕ дӕ акӕндзӕни, кӕдӕм дӕ нӕ фӕнда, уырдӕм».

¹⁹ Уыцы ныхӕстӕй Йесо фӕсномыгӕй бамбарын кодта, Петр Хуыцауы цавӕр мӕлӕтӕй скадджын кӕндзӕни, уый. Ӕмӕ йын уый фӕстӕ загъта: «Мӕ фӕдыл цу».

Йесо ӕмӕ Йӕ уарзон ахуыргӕнинаг

²⁰ Петр фӕстӕмӕ фӕкасти ӕмӕ Йесойы уарзон ахуыргӕнинаджы федта сӕ фӕдыл цӕугӕ. Уый уыди уыцы ахуыргӕнинаг, ӕхсӕвӕры рӕстӕг Йесомӕ йӕхи чи бакъул кодта ӕмӕ Йӕ афтӕ чи бафарста: «Хицау, гадзрахатӕй Дыл чи рацӕудзӕн?»

²¹ Петр ӕй куы федта, уӕд Йесойы бафарста: «Хицау, ӕмӕ уый та цы фӕуыдзӕн?»

²² Йесо йын загъта: «Кӕд ӕмӕ Мӕн афтӕ фӕнды, цӕмӕй уый Ме ’рцыдмӕ удӕгас уа, уӕд та? Ды цу Мӕ фӕдыл».

²³ Ӕмӕ айхъуысти ӕфсымӕртыл, уыцы ахуыргӕнинаг нӕ амӕлдзӕни, зӕгъгӕ. Йесо та, нӕ амӕлдзӕни, зӕгъгӕ, нӕ загъта, фӕлӕ: «Кӕд Мӕн афтӕ фӕнды, ӕмӕ Ме ’рцыдмӕ удӕгас уа, уӕд та?»

Фӕсныхас

²⁴ Уыцы ахуыргӕнинаг ӕвдисӕн у ӕппӕт уыдӕттӕн, ӕмӕ сӕ фысгӕ дӕр уый ныккодта. Ӕмӕ мах зонӕм, йӕ ныхас ӕцӕг кӕй у, уый.

²⁵ Йесо ма ноджы бирӕ ӕндӕр хъуыддӕгтӕ сарӕзта, фӕлӕ се ’ппӕты тыххӕй бӕстон ныффысс, зӕгъгӕ, уӕд уыцы чингуытӕ, мӕнмӕ гӕсгӕ, ӕгас дунейы дӕр нӕ бацӕуиккой.