Иоанн 20 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Йесо райгас ис

¹ Къуырийӕн йӕ фыццаг бон, нӕма ӕрбабон ис, афтӕмӕй магдалӕйаг Мариа ӕрбацыди зӕппадзмӕ ӕмӕ бацӕуӕны дур иуварс фӕлдӕхтӕй баййӕфта.

² Уыйадыл азгъордта, бацыди Симон Петрмӕ, стӕй Йесойы уарзон ахуыргӕнинагмӕ ӕмӕ сын загъта: «Хицауы ахастой зӕппадзӕй, ӕмӕ Йӕ кӕм бавӕрдтой, уый нӕ зонӕм».

³ Петр ӕмӕ иннӕ ахуыргӕнинаг уайтагъд ацыдысты зӕппадзмӕ.

⁴ Дыууӕйӕ дӕр згъоргӕ кодтой, фӕлӕ иннӕ ахуыргӕнинаг Петрӕй тагъддӕр згъордта ӕмӕ зӕппадзмӕ раздӕр бахӕццӕ ис.

⁵ Ӕргуыбыр кодта ӕмӕ мӕрддзӕгтӕ федта, фӕлӕ зӕппадзмӕ нӕ бацыди.

⁶ Йӕ хӕдуӕлвӕд Симон Петр дӕр ӕрбахӕццӕ ис, бацыди зӕппадзмӕ ӕмӕ дзы федта ӕрмӕстдӕр мӕрддзӕгтӕ.

⁷ Уыимӕ ма, Йесойы сӕр баст кӕмӕй уыди, уыцы хӕцъил дӕр мӕрддзӕгтимӕ нӕ, фӕлӕ ӕндӕр ран хицӕнӕй тыхт уыди.

⁸ Уӕд, раздӕр чи ӕрбахӕццӕ ис, уыцы ахуыргӕнинаг дӕр зӕппадзмӕ мидӕмӕ бахызти ӕмӕ, алцыдӕр йӕхи цӕстӕй куы федта, уӕд ӕй бауырныдта.

⁹ Уымӕн ӕмӕ уыдон уӕдмӕ Сыгъдӕг Фыстӕй нӕма ӕмбӕрстой, Йесо мӕрдтӕй кӕй хъуамӕ райгас уа, уый.

¹⁰ Ахуыргӕнинӕгтӕ аздӕхтысты сӕхимӕ.

Йесо Йӕ райгасы фӕстӕ раргом ис Магдалӕйаг Мариамӕ

¹¹ Мариа та лӕууыди зӕппадзы цур ӕмӕ куыдта. Кӕугӕйӕ ӕргуыбыр кодта зӕппадзмӕ, ӕмӕ федта,

¹² Йесойы мард кӕм ӕвӕрд уыди, уым дыууӕ зӕды урс дарӕсы бадгӕ, сӕ иу — Йӕ нывӕрзӕны, иннӕ — Йӕ дӕлфӕдты ’рдыгӕй.

¹³ Уыдон ӕй бафарстой: «Хорз ус, цӕуыл кӕуыс?» Мариа сын дзуапп радта: «Мӕ Хицауы мын ахастой ӕмӕ Йӕ кӕм бавӕрдтой, уый нӕ зонын».

¹⁴ Афтӕ куы загъта, уӕд фӕстӕмӕ фӕкаст, ӕмӕ Йесойы йӕ разы лӕугӕйӕ ауыдта, фӕлӕ Йесо кӕй у, уый нӕ базыдта.

¹⁵ Йесо йын загъта: «Хорз ус, цӕуыл кӕуыс? Кӕй агурыс?» Мариа ӕнхъӕл уыди, Уый дыргъдонгӕс у, ӕмӕ Йын загъта: «Хорз лӕг, кӕд Ӕй ды рахастай, уӕд Ӕй кӕм бавӕрдтай, уый мын зӕгъ ӕмӕ Йӕ ӕз ахӕссон».

¹⁶ Йесо йын загъта: «Мариа!» Мариа Йӕм разылди ӕмӕ Йӕм дзуттагау сдзырдта: «Раввуни!» (ома Ахуыргӕнӕг).

¹⁷ Йесо йын загъта: «Ма Мыл бандзӕв, уымӕн ӕмӕ Ӕз Мӕ Фыдмӕ нӕма ссыдтӕн. Фӕлӕ ацу Ме ’фсымӕртӕм ӕмӕ сын зӕгъ: „Цӕуын Мӕ Фыдмӕ ӕмӕ уӕ Фыдмӕ, Мӕ Хуыцаумӕ ӕмӕ уӕ Хуыцаумӕ“».

¹⁸ Магдалӕйаг Мариа ацыди ӕмӕ ахуыргӕнинӕгтӕн радзырдта, Хицауы кӕй федта ӕмӕ йын Уый цы загъта, уыдӕтты тыххӕй.

Йесойы фыццаг фембӕлд ахуыргӕнинӕгтимӕ Йӕ райгасы фӕстӕ

¹⁹ Уыцы бон изӕрӕй, къуырийы фыццаг бон, ахуыргӕнинӕгтӕ ӕмбырдӕй уыдысты иумӕ. Иудейӕгтӕй тарстысты ӕмӕ дуӕрттӕ сӕхгӕдтой. Уӕд уатмӕ ӕрбацыди Йесо, ӕрлӕууыди сӕ разы ӕмӕ загъта: «Фӕрнӕйдзаг ут!»

²⁰ Ӕмӕ сӕм Йӕ къухтӕ ӕмӕ Йӕ фарс равдыста. Ахуыргӕнинӕгтӕ Хицауы куы федтой, уӕд Ыл ныццин кодтой.

²¹ Йесо та сын дыккаг хатт загъта: «Фӕрнӕйдзаг ут! Мӕ Фыд Мӕн куыд рарвыста, афтӕ Ӕз дӕр сымах ӕрвитын».

²² Уыцы ныхӕсты фӕстӕ сыл бафу кодта ӕмӕ сын загъта: «Схайджын ут Сыгъдӕг Удӕй.

²³ Сымах йӕ тӕригъӕдтӕ кӕмӕн ныббарат, уымӕн барст уыдзысты, кӕмӕн сӕ нӕ ныббарат, уымӕн барст нӕ уыдзысты».

Фомайы нӕ уырны, Йесо райгас ис, уый

²⁴ Йесо куы ӕрбацыд, уӕд дыууадӕсӕй иу, Фома, фӕсномыгӕй — Фаззон, семӕ нӕ уыд.

²⁵ Иннӕ ахуыргӕнинӕгтӕ йын загътой: «Мах федтам Хицауы». Фӕлӕ сын уый дзуапп радта: «Йӕ къухтыл зӕгӕлы фӕдтӕ куынӕ фенон, ме ’нгуылдз уыцы хъӕдгӕмттыл куынӕ авӕрон, мӕ къух та — Йӕ фарсы хъӕдгомыл, уӕд мӕ нӕ бауырндзӕн».

²⁶ Аст боны фӕстӕ та ахуыргӕнинӕгтӕ уыдысты хӕдзары, Фома дӕр — семӕ. Дуӕрттӕ ӕхгӕд уыдысты, афтӕмӕй ӕрбацыди Йесо, ӕрлӕууыди сӕ астӕу ӕмӕ загъта: «Фӕрнӕйдзаг ут!»

²⁷ Стӕй Фомамӕ дзуры: «Ӕрбадар-ма де ’нгуылдз ӕмӕ Мын бавнал Мӕ къухтӕм. Ӕрбадар дӕ къух ӕмӕ Мын бавнал Мӕ фарсы хъӕдгоммӕ. Ӕмӕ дызӕрдыг мауал кӕн, фӕлӕ баууӕнд».

²⁸ Ӕмӕ уӕд Фома ныхъхъӕр кодта: «Мӕ Бардарӕг ӕмӕ Мӕ Хуыцау!»

²⁹ Йесо йын загъта: «Ды баууӕндыдтӕ, уымӕн ӕмӕ Мӕ федтай. Тӕхудиаг сты, Мӕн чи нӕ федта, афтӕмӕй чи баууӕндыди, уыдон».

Ацы чиныг ныффыссыны нысан

³⁰ Ацы чиныджы сӕ кой дӕр кӕмӕн нӕй, бирӕ ахӕм диссӕгтӕ ма равдыста Йесо Йӕ ахуыргӕнинӕгтӕн.

³¹ Ацы чиныг та уымӕн фыст ӕрцыд, цӕмӕй баууӕндат, Йесо Хуыцауы Фырт, Чырысти кӕй у, ууыл. Ӕмӕ куы ӕууӕндат, уӕд Йӕ фӕрцы схайджын уыдзыстут мыггагмӕйы цардӕй.