Иоанн 11 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Лазыры мӕлӕт

¹ Иу адӕймаг, йӕ ном — Лазыр, уыди рынчын. Уый уыди Вифанийӕ, Мариа йӕ хо Марфӕимӕ кӕм царди, уыцы хъӕуӕй.

² Мариа та уыди, Хицау Йесойы хӕрздӕфгӕнӕнӕй чи байсӕрста ӕмӕ Йын Йӕ къӕхтӕ йӕ дзыккутӕй чи ныссӕрфта, уыцы сылгоймаг. Ӕмӕ ныр йе ’фсымӕр Лазыр уыди рынчын.

³ Хотӕ Йесомӕ хабаргӕнӕг арвыстой: «Хицау, Ды кӕй уарзыс, уый рынчын у».

⁴ Йесо уый куы фехъуыста, уӕд загъта: «Уыцы низӕн йӕ кӕрон мӕлӕтмӕ нӕ цӕуы — Хуыцауы кадӕн у, цӕмӕй уый руаджы Хуыцауы Фырты кад раргом уа».

⁵ Марфӕ, стӕй йӕ хо Мариа ӕмӕ Лазыр кӕд Йесойӕн уарзон адӕймӕгтӕ уыдысты,

⁶ уӕддӕр ма, Лазыр рынчын у, уый фехъусгӕйӕ, кӕм уыдис, уым дыууӕ боны афӕстиат.

⁷ Уый фӕстӕ Йӕ ахуыргӕнинӕгтӕн загъта: «Ногӕй ацӕуӕм Иудеймӕ».

⁸ Ахуыргӕнинӕгтӕ Йын загътой: «Равви, ӕрӕджы дӕр ма Дӕ иудейӕгтӕ дуртӕй амарынмӕ куы хъавыдысты, уӕд та фӕстӕмӕ уырдӕм цӕуыс?»

⁹ Йесо сын дзуапп радта: «Боны дыууадӕс сахаты нӕй? Боныгон чи цӕуы, уый нӕ кӕлы, уымӕн ӕмӕ уыны ацы дунейы рухс.

¹⁰ Ӕхсӕвыгон чи цӕуы, уый та фӕкӕлы, уымӕн ӕмӕ дунейы рухс нӕ уыны».

¹¹ Уыцы ныхӕстыл ма Йесо бафтыдта: «Нӕ хӕлар Лазыр бафынӕй ис, ӕмӕ Ӕз цӕуын йӕ райхъал кӕнынмӕ».

¹² Йӕ ахуыргӕнинӕгтӕ Йын загътой: «Хицау, кӕд фынӕй баци, уӕд адзӕбӕх уыдзӕн».

¹³ Йесо сын дзырдта Лазыры мӕлӕты тыххӕй, уыдон та афтӕ ӕнхъӕл уыдысты, цыма Уый хуымӕтӕг фынӕйы кой кӕны.

¹⁴ Уӕд сын ӕй Йесо комкоммӕ загъта: «Лазыр амард.

¹⁵ Ӕмӕ Ӕз уым кӕй нӕ фӕдӕн, уый тыххӕй цин кӕнын сымахыл, уымӕн ӕмӕ баууӕнддзыстут. Ныр та йӕм ацӕуӕм».

¹⁶ Уӕд, фӕсномыгӕй Фаззон кӕй хуыдтой, уыцы Фома иннӕ ахуыргӕнинӕгтӕн загъта: «Цом ӕмӕ мах дӕр Йемӕ амӕлӕм».

Йесо — мӕрдтӕй ӕгасгӕнӕг ӕмӕ царддӕттӕг

¹⁷ Йесо бынатмӕ куы бахӕццӕ ис, уӕд базыдта, Лазыр ныр цыппар боны зӕппадзы кӕй ис, уый.

¹⁸ Вифани та Йерусалиммӕ хӕстӕг уыд, се ’хсӕн уыди фынддӕс стадийы бӕрц.

¹⁹ Ӕмӕ иудейӕгтӕй бирӕтӕ ӕрбацыдысты Марфӕ ӕмӕ Мариамӕ се ’фсымӕры зианы тыххӕй сын тӕфӕрфӕс ракӕнынмӕ.

²⁰ Йесо кӕй ӕрбацӕуы, уый Марфӕ куы фехъуыста, уӕд рацыди Йӕ размӕ. Мариа та хӕдзары баззади.

²¹ Марфӕ загъта Йесойӕн: «Хицау, Ды ам куы уыдаис, уӕд ме ’фсымӕр нӕ амардаид.

²² Фӕлӕ ӕз ныр дӕр зонын: Ды Хуыцауӕй цыдӕриддӕр ракурай, уый Дын ратдзӕни».

²³ Йесо йын загъта: «Де ’фсымӕр райгас уыдзӕн».

²⁴ Марфӕ Йын дзуапп радта: «Зонын ӕй, фӕстаг бон, Мӕрдты райгасы бон, кӕй райгас уыдзӕни, уый».

²⁵ Йесо йын загъта: «Ӕз дӕн мӕрдтӕй ӕгасгӕнӕг ӕмӕ царддӕттӕг. Мӕныл чи ӕууӕнды, уый куы амӕла, уӕддӕр райгас уыдзӕн.

²⁶ Мӕныл ӕууӕндгӕйӕ чидӕриддӕр цӕры, уый никуы амӕлдзӕн. Уырны дӕ?»

²⁷ Марфӕ Йын дзуапп радта: «О, Хицау! Мӕн уырны, Ды Чырысти кӕй дӕ, уый — дунемӕ ӕрцӕуинаг Чи у, Хуыцауы уыцы Фырт».

²⁸ Уыцы ныхӕсты фӕстӕ Марфӕ ацыди ӕмӕ аивӕй бамбарын кодта йӕ хо Мариайӕн: «Ахуыргӕнӕг ам ис ӕмӕ дӕм дзуры».

²⁹ Мариа уый куы фехъуыста, уӕд фестади ӕмӕ Йесойы размӕ атындзыдта.

³⁰ Йесо хъӕумӕ нӕма бахӕццӕ ис; Марфӕ Йыл кӕм фембӕлдис, уыцы ран баззади.

³¹ Мариаимӕ хӕдзары чи уыд ӕмӕ йын ныфсытӕ чи ӕвӕрдта, уыцы иудейӕгтӕ йӕ ӕваст фестгӕ ӕмӕ рацӕугӕ куы федтой, уӕд йӕ фӕдыл рацыдысты. Уыдон афтӕ ӕнхъӕл уыдысты, зӕппадзмӕ кӕуынмӕ ацыди, зӕгъгӕ.

³² Йесо кӕм уыд, Мариа уырдӕм куы бахӕццӕ ис ӕмӕ Йӕ куы федта, уӕд Ын Йӕ къӕхты бынмӕ ӕрхауди ӕмӕ загъта: «Хицау, Ды ам куы уыдаис, уӕд ме ’фсымӕр нӕ амардаид».

³³ Мариайы ӕмӕ йемӕ ӕрцӕуӕг иудейӕгты Йесо кӕугӕ куы федта, уӕд Йӕхицӕн дӕр Йӕ зӕрдӕ суынгӕг ис

³⁴ ӕмӕ бафарста: «Кӕм ӕй бавӕрдтат?» Уыдон Ын загътой: «Хицау, рацу ӕмӕ йӕ фен».

³⁵ Йесойӕн йӕ цӕссыгтӕ ӕркалдысты.

³⁶ Уӕд иудейӕгтӕ загътой: «Кӕс-ма, куыд ӕй уарзта!»

³⁷ Иуӕй-иутӕ та дзырдтой: «Куырмӕн йӕ цӕстытӕ куы байгом кодта, уӕд Йӕ бон афтӕ бакӕнын нӕ уыд, цӕмӕй ацы адӕймаг ма амӕла?»

Лазыры райгас

³⁸ Йесойӕн йӕ зӕрдӕ ноджы тынгдӕр суынгӕг ис, афтӕмӕй бацыди зӕппадзы размӕ. Уый уыди лӕгӕт, йӕ бацӕуӕныл ын дур бафӕлдӕхтӕуыд.

³⁹ Йесо загъта: «Айсут дур». Марды хо Марфӕ Йын загъта: «Хицау, мард афонмӕ сысмаг ис. Ныр цыппар боны зӕппадзы ис».

⁴⁰ Йесо йын дзуапп радта: «Нӕ дын дзырдтон, куы дӕ уырна, уӕд Хуыцауы кад фендзынӕ, зӕгъгӕ?»

⁴¹ Дур айстой. Йесо арвмӕ скасти ӕмӕ загъта: «Мӕ Фыд, бузныг дӕн Дӕуӕй, кӕй Мӕ фехъуыстай, уый тыххӕй.

⁴² Ды Мӕ кӕддӕриддӕр кӕй фехъусдзынӕ, уый Ӕз зыдтон, фӕлӕ афтӕ, ам цы адӕм ис, уыдоны тыххӕй загътон — цӕмӕй баууӕндой, Ды Мӕ кӕй рарвыстай, ууыл».

⁴³ Уыцы ныхӕсты фӕстӕ Йесо хъӕрӕй загъта: «Лазыр, ӕддӕмӕ рацу!»

⁴⁴ Ӕмӕ мард рацыди, йӕ къухтӕ ӕмӕ йӕ къӕхтӕ — мӕрдӕмбӕрзӕн хӕцъилты тыхт, йӕ цӕсгом — цӕсгомӕмбӕрзӕнӕй ӕхгӕд. Йесо сын загъта: «Райхалут ӕй, ӕмӕ ацӕуа».

Сусӕгвӕнд Йесойы ныхмӕ

⁴⁵ Мариамӕ чи ӕрбацыд, уыцы иудейӕгтӕй, Йесо цы бакодта, уый чи федта, уыдонӕй Йыл бирӕтӕ баууӕндыдысты.

⁴⁶ Фӕлӕ дзы иуӕй-иутӕ ацыдысты фарисейтӕм ӕмӕ сын, Йесо цы бакодта, уый тыххӕй радзырдтой.

⁴⁷ Уӕд алчертӕ ӕмӕ фарисейтӕ ӕрӕмбырд кодтой синедрион ӕмӕ загътой: «Цы гӕнгӕ нын у? Ацы Адӕймаг бирӕ диссӕгтӕ ӕвдисы.

⁴⁸ Афтӕ Йӕ куы ныууадзӕм, уӕд Ыл се ’ппӕт дӕр баууӕнддзысты. Ӕмӕ ӕрцӕудзысты ромӕгтӕ ӕмӕ нын нӕ ацы уаз бынат дӕр ӕмӕ нӕ адӕмы дӕр бабын кӕндзысты».

⁴⁹ Уыдонӕй иу, Каиафӕ, уыцы аз уыди алчер ӕмӕ сын загъта: «Сымах ницы ӕмбарут!

⁵⁰ Уӕ бон бамбарын нӕу, ӕппӕт адӕмы фесафыны бӕсты сӕ сӕрвӕлтау иу адӕймаг куы амӕла, уӕд сымахӕн хуыздӕр кӕй уыдзӕн, уый».

⁵¹ Уый Каиафӕ йӕхи зондӕй нӕ дзырдта, фӕлӕ пехуымпар ныхас кодта, уымӕн ӕмӕ уыцы аз алчер уыди ӕмӕ рагагъоммӕ загъта, Йесо кӕй хъуамӕ амӕла Йӕ адӕмы сӕрвӕлтау,

⁵² стӕй ӕрмӕст Йӕ адӕмы сӕрвӕлтау нӕ, фӕлӕ ма, алы рӕтты чи ныххӕлиу ис, Хуыцауы уыцы хъӕбулты ӕрӕмбырд ӕмӕ ӕрбаиу кӕныны тыххӕй дӕр.

⁵³ Уыцы бон Йесойы амарынвӕнд скодтой.

⁵⁴ Уымӕ гӕсгӕ-иу Йесо ӕргомӕй иудейӕгты ӕхсӕн нал фӕзынд, фӕлӕ уырдыгӕй ацыд Эфраиммӕ — ӕдзӕрӕг быдырмӕ ӕввахс чи уыди, уыцы сахармӕ; ӕмӕ уым уыди Йӕ ахуыргӕнинӕгтимӕ.

⁵⁵ Ӕрхӕстӕг иудейаг Куадзӕн, ӕмӕ бӕстӕйы алы рӕттӕй бирӕтӕ Куадзӕны размӕ ӕрцыдысты Йерусалиммӕ — сӕхи ссыгъдӕг кӕнынмӕ.

⁵⁶ Уӕд агуырдтой Йесойы ӕмӕ Кувӕндоны дзырдтой сӕ кӕрӕдзийӕн: «Куыд уӕм кӕсы, Йесо бӕрӕгбонмӕ не ’рцӕудзӕн?»

⁵⁷ Хистӕр сауджынтӕ ӕмӕ фарисейтӕ та бардзырд радтой: Йесо кӕм ис, уый исчи куы базона, уӕд сын фехъусын кӕнӕд, цӕмӕй Йӕ ӕрцахсой.