Фӕтӕгтӕ 5 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Барак ӕмӕ Деворӕйы уӕлахизы зарӕг

¹ Уыцы бон Деворӕ Авиноамы фырт Баракимӕ зарыдысты ахӕм уӕлахизы зарӕг:

² — Израилы йӕ фӕтӕгтӕ хӕстмӕ куы кӕной, адӕм цингӕнгӕ тохмӕ куы цӕуой, — Дунедарӕгӕн арфӕ ракӕнут!

³ Байхъусут, паддзӕхтӕ! Байхъусут, хицӕуттӕ! Ӕз Дунедарӕгӕн зардзынӕн! Дунедарӕджы, Израилы Хуыцауы, стаудзынӕн!

⁴ Дунедарӕг! Сеирӕй куы цыдтӕ, Ды куы цыдтӕ Едомы бӕстӕйӕ, — зӕхх ӕнкъуысти, къӕвда уарыди, ӕмӕ мигътӕй лӕдӕрсти дон.

⁵ Синайы Дунедарӕджы, Израилы Хуыцауы раз, рызтызты хӕхтӕ.

⁶ Йаел ӕмӕ Анаты фырт Шамгары заман фӕндӕгтӕ куы сафтид сты! Бӕлццӕтӕ, ӕмраст фӕндагыл цӕуджытӕ, ӕнӕцыд фӕндӕгтыл куы цыдысты!

⁷ Нал уыдис Израилы фӕтӕгтӕ, цалынмӕ фӕзындтӕ ды, Деворӕ, Израилы мад!

⁸ Сӕхицӕн ног хуыцӕутты равзӕрстой, ӕмӕ сӕ кулдуары раз хӕст куы бацайдагъ! Дыууиссӕдз мин израилаг хӕстонӕй йӕ арц кӕнӕ йӕ уарты сӕр кӕй бахъуыд?

⁹ Мӕ зӕрдӕ барухс ис Израилы ӕфсады хицӕуттӕй, барвӕндонӕй хӕстмӕ цӕуӕг адӕмӕй. Дунедарӕгӕн арфӕ ракӕнут!

¹⁰ Зынаргъ гауызтыл урс хӕрджытыл бадджытӕ, бӕлццӕттӕ, уӕлахизы зарӕг ракӕнут!

¹¹ Цъайты цурӕй хъуысынц фыййӕуты хъӕлӕстӕ, зарӕджы стауынц Дунедарӕджы уӕлахизтӕ — Израилы фӕтӕгты уӕлахизтӕ куы стауынц! Дунедарӕджы адӕм кулдуары раз ӕрлӕууыдысты!

¹² Сыст, ныззар, о Деворӕ! Сыст, Авиноамы фырт Барак, дӕ уацайрӕгты акӕн!

¹³ Чи аирвӕзт, уыцы сахъгуырдтӕ гуыппырсартӕм фӕзындысты ӕххуысмӕ, ӕрлӕууыдысты Дунедарӕджы фарсмӕ — ӕфсады ныхмӕ схӕцынмӕ!

¹⁴ Ацы зӕхх кӕддӕр уыд амалекӕгты, ныр ӕм хӕстонтӕ фӕзындысты Ефремӕй, — уӕ фӕдыл рацыдысты, Бениамины фӕдонтӕ! Фӕзындысты Махиры хицӕуттӕ, фӕзындысты Зевулоны фӕтӕгтӕ.

¹⁵ Иссахары фӕтӕгтӕ дӕр — Деворӕимӕ! Иссахар Баракы фӕдыл дӕлвӕзмӕ куы ныййарц! Рувимы фӕдонтӕ та хъаугъа куы кӕнынц!

¹⁶ Фосдӕтты астӕу кӕдмӕ баддзыстут, фыййауы уадындзмӕ кӕдмӕ хъусдзыстут? Уӕ, хъаугъа куы кӕнынц Рувимы фӕдонтӕ!

¹⁷ Галаад Иорданы фале куы цӕры, Дан та цӕмӕн ӕрцарди йӕ науты? Асир дӕр денджызы был куы ’рбынат кодта, донбакӕлӕнтӕм хӕстӕг куы ’рцарди!

¹⁸ Мӕлӕты размӕ бырстой Зевулоны фӕдонтӕ, семӕ Неффалим дӕр — быдыры къуыбыртыл!

¹⁹ Хӕстмӕ рацыдысты паддзӕхтӕ! Ханааны паддзӕхтӕ хӕстмӕ рацыдысты Таанахы цурмӕ, Мегиддомӕ хӕстӕг доны былмӕ, фӕлӕ ӕвзист нӕ бафтыди сӕ къухы!

²⁰ Уӕларвӕй тохы бацыдысты стъалытӕ, сӕ бынӕттӕй Сисераимӕ стох кодтой.

²¹ Уӕ, Кишоны дон знӕгты куы фӕласы, уӕ рагон дон, цӕугӕдон Кишон! О мӕ уд, знӕгты хъару басӕтт!

²² Уӕ, сӕ бӕхтӕ куы фезгъорынц знӕгтӕн!

²³ Дунедарӕджы зӕд бардзырд куы ратты: «Мерозы сахар ралгъитут, ралгъитут ын йӕ цӕрджыты, — йӕ хӕстонтӕ Дунедарӕджы фарс не ’рлӕууыдысты, сӕ сахъгуырдтимӕ Дунедарӕгмӕ нӕ фӕзындысты!»

²⁴ Арфӕгонд уӕд Йаел, кенаг Хеверы бинойнаг, цатырты цӕрӕг сылгоймӕгты ’хсӕн арфӕгонд у.

²⁵ Уазӕг ракуырдта дон, уый йын радта ӕхсыр, бӕгъатыры аккаг кӕхцы йын ӕхсыры сӕртӕ бахаста.

²⁶ Йӕ галиу къухмӕ райста мих, йӕ рахизмӕ та — кусӕджы дзӕбуг, Сисерайы ныццавта, ныппырх кодта Сисерайӕн йӕ сӕр, йӕ къӕмисӕн ын батыдта!

²⁷ Ӕрхауд йӕ къӕхты бын, хуыссы, йӕ бынаты ӕрхауди мардӕй!

²⁸ Сисерайы мад рудзынгӕй кӕсы, йӕ хъӕлӕс райхъуысы, кӕуы: «Йӕ тохуӕрдӕттӕ куыд ӕрӕгмӕ здӕхынц, цӕмӕн кӕнынц фӕстиат йӕ бӕхтӕ?»

²⁹ Дзуапп ын куы раттынц йӕ лӕггадгӕнджытӕ, зондджын сылгоймӕгтӕ, стӕй йӕхӕдӕг дӕр афтӕ куы фӕзӕгъы:

³⁰ «Ӕфтиаг райстой, ӕмӕ йӕ се ’хсӕн уарынц. Алы хӕстонӕн дӕр — чызг, науӕд — дыууӕ. Сисерайы ’фтиаг — хъулон хӕрдгӕхуыд хъуымӕцтӕ, дыууӕ нывӕфтыд фӕлысты».

³¹ Дунедарӕг, Де знӕгтӕ афтӕ фесӕфӕнт! Дунедарӕджы Чи уарзы, уыдон та — тӕмӕнкалгӕ хуры ӕнгӕс! Дыууиссӕдз азы бӕстӕ уыди сабыр.