Фӕтӕгтӕ 19 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Левит ӕмӕ йӕ номылус

¹ Израилы паддзах куынӕ уыд, уыцы заман Ефремы хӕхты фахсыл цардис иу лӕг — левит. Уый иудейаг Вифлеемӕй йӕхицӕн номылус ӕрбакодта.

² Йӕ номылус йемӕ фӕхыл ис ӕмӕ фӕстӕмӕ йӕ фыды хӕдзармӕ, Иудейаг Вифлееммӕ, ацыди. Рацыди цыппар мӕймӕ ’ввахс.

³ Левит йемӕ ракодта йӕ лӕггадгӕнӕджы, стӕй дыууӕ хӕрӕджы ӕмӕ йӕ номылусмӕ бӕрӕггӕнӕг ацыди. Йӕ зӕрды уыди сылгоймагӕн балӕгъстӕ кӕнын, цӕмӕй фӕстӕмӕ раздӕха. Номылус левиты йӕ фыды хӕдзармӕ бахуыдта. Уый йӕ, цингӕнгӕ, суазӕг кодта

⁴ ӕмӕ йын ныллӕгъстӕ кодта, цӕмӕй йӕм уазӕгуаты баззайа; афтӕмӕй ӕртӕ боны хордтой, нуӕзтой ӕмӕ фынӕй кодтой.

⁵ Цыппӕрӕм бон сӕумӕрайсом левит йӕхи фӕндагмӕ срӕвдз кодта. Йӕ каис ын загъта: «Цӕуыны размӕ уал иу чысыл исты ахӕр».

⁶ Ӕрбадтысты та, иумӕ бахордтой, бануӕзтой, ӕмӕ та левитӕн йӕ каис афтӕ зӕгъы: «Цӕй, ахсӕв ма лӕуу, баулӕф».

⁷ Левит цӕуынмӕ хъавыди, фӕлӕ йын йӕ каис тынг балӕгъстӕ кодта, ӕмӕ ма иу ӕхсӕв баззади.

⁸ Фӕндзӕм бон сӕумӕрайсом левит йӕхи срӕвдз кодта, фӕлӕ та йӕм йӕ каис ныххатыди, бахӕр, зӕгъгӕ, ӕмӕ изӕрмӕ фынджы уӕлхъус фӕбадтысты.

⁹ Уый фӕстӕ левит йӕ номылус ӕмӕ йӕ лӕггадгӕнӕгимӕ йӕхи фӕндагмӕ цӕттӕ кӕнын байдыдта. Йӕ каис та йын загъта: «Акӕс-ма, изӕрдалынгтӕ кӕны, ахсӕв ам лӕуу! Баулӕф ӕмӕ райсом сӕумӕцъӕхӕй ацӕудзыстут уӕ хӕдзармӕ».

¹⁰ Фӕлӕ левит ӕхсӕвы уым баззайыныл нал сразы, ӕмӕ сӕ фӕндагыл ацыдысты. Бахӕццӕ сты Йевусы сахармӕ (ома Йерусалиммӕ). Левитимӕ уыдысты йӕ номылус ӕмӕ дыууӕ хӕрӕджы ӕд уӕргътӕ.

¹¹ Йевусы сахармӕ бахӕццӕ сты изӕрмилты. Левитӕн йӕ лӕггадгӕнӕг загъта: «Цомут ацы йевусӕгты сахармӕ ӕмӕ уым ӕхсӕвиуат бакӕнӕм».

¹² Йӕ хицау ын загъта: «Нӕ, мах ӕцӕгӕлӕттӕм, Израилы адӕмӕй чи нӕу, уыдонмӕ нӕ бацӕудзыстӕм. Гевӕйы сахармӕ ацӕуӕм».

¹³ Стӕй ма йӕ ныхасмӕ бафтыдта: «Ацы хъӕутӕй иумӕ бахӕццӕ уӕм, Гевӕ кӕнӕ Рамайы ӕхсӕвиуат бакӕндзыстӕм».

¹⁴ Ӕмӕ дарддӕр ацыдысты. Бениамины зӕххыл Гевӕйы сахармӕ куы бахӕццӕ сты, уӕдмӕ хур аныгуылди.

¹⁵ Ӕмӕ Гевӕйы ’рдӕм фӕзылдысты, цӕмӕй уым ӕхсӕвиуат бакӕной. Сахары фӕзы ӕрбадтысты, фӕлӕ сӕ йӕ хӕдзармӕ ӕхсӕвиуат бакӕнынмӕ ничи хуыдта.

¹⁶ Уыцы рӕстӕг быдырӕй фӕскуыст иу зӕронд лӕг сцӕйцыди. Уый царди Гевӕйы, фӕлӕ йӕхӕдӕг уыди Ефремы хӕхтӕй рацӕугӕ, Гевӕйы сахары та цардысты Бениамины фӕдонтӕ.

¹⁷ Зӕронд лӕг сахары фӕзы бӕлццоны куы федта, уӕд ӕй бафарста: «Кӕцӕй ӕмӕ кӕдӕм цӕуыс?»

¹⁸ Уый йын дзуапп радта: «Мах иудейаг Вифлеемӕй цӕуӕм Ефремы хӕхты фаллаг фарсмӕ, ӕз уырдыгон дӕн. Уыдтӕн иудейаг Вифлеемы ӕмӕ ныр цӕуын нӕхимӕ. Йӕ хӕдзармӕ мӕ ничи хоны.

¹⁹ Алцыдӕр нӕм ис, хъӕмп ӕмӕ нӕм холлаг дӕр ис хӕрджытӕн. Махмӕ, дӕ цагъартӕм, мӕхи ӕмӕ мӕ номылусы, стӕй мӕ лӕггадгӕнӕджы фаг хӕринаг ӕмӕ сӕн ис. Ницы нӕ хъӕуы!»

²⁰ Зӕронд лӕг ын загъта: «Ма тыхс, цы уӕ хъӕуа, уый уын ратдзынӕн. Уе ’хсӕв уынджы ма арвитут».

²¹ Йӕ хӕдзармӕ сӕ бахуыдта ӕмӕ сын сӕ хӕрджытӕн холлаг радта. Бӕлццӕттӕ сӕ къӕхтӕ цӕхсадтой ӕмӕ фынджы уӕлхъус ӕрбадтысты.

²² Уазджытӕ сӕ фӕллад уагътой. Уалынмӕ сахары цӕрджытӕ, хъахбай адӕм, хӕдзары алыварс ӕрӕмбырд сты ӕмӕ дуар батоныныл архайдтой. Уыдон зӕронд лӕгӕй, хӕдзары хицауӕй, домдтой, цӕмӕй сӕм йӕ уазӕджы ракӕна, ӕмӕ йын батых кӕной.

²³ Хӕдзары хицау сӕм рацыд ӕмӕ сын лӕгъстӕ кодта: «Ӕфсымӕртӕ, уӕ хорзӕхӕй, ахӕм фыдракӕнд ма саразут! Мӕ уазӕг у, чъизи хъуыддаг ма бакӕнут.

²⁴ Фӕлтау уын ме ’нӕцыд чызджы ӕмӕ йӕ номылусы ратдзынӕн. Фӕхъазут сӕ, цы уӕ фӕнды, уый сын кӕнут, ӕрмӕст мын мӕ уазӕгӕн ахӕм чъизи ми ма бакӕнут!»

²⁵ Фӕлӕ йӕм уыдон хъусгӕ дӕр нӕ кодтой. Уӕд левит йӕ номылусыл фӕхӕцыд ӕмӕ сӕм ӕй уынгмӕ ракодта. Уыдон ын батых кодтой, ӕнӕхъӕн ӕхсӕв дзы фӕхъазыдысты, ӕрмӕст ӕй боныцъӕхты ауагътой.

²⁶ Сылгоймаг сӕумӕцъӕхӕй, йӕ сӕрыхицау фысымуат кӕм скодта, уыцы хӕдзармӕ ӕрбацыди, къӕсӕрыл ӕрхауд ӕмӕ хурыскастмӕ уым баззади.

²⁷ Куы сбон ис, уӕд йӕ лӕг сыстади ӕмӕ дуар байгом кодта, цӕмӕй дарддӕр йӕ фӕндагыл ацӕуа. Ӕмӕ федта: йӕ номылус хуыссы дуары цур, йӕ къухтӕй къӕсӕрыл ныххӕцыдис, афтӕмӕй.

²⁸ Лӕг ын загъта: «Сыст, цӕугӕ кӕнӕм». Фӕлӕ дзуапп нӕ райхъуысти. Лӕг ын йӕ мард хӕрӕгыл сӕвӕрдта ӕмӕ йӕ хӕдзармӕ араст ис.

²⁹ Куы бахӕццӕ, уӕ фӕрӕт райста, марды буар дыууадӕс дихы акодта ӕмӕ хӕйттӕ Израилы алы зылдмӕ дӕр арвыста.

³⁰ Уыцы хабар чидӕриддӕр федта, уыдон дзырдтой: «Израилӕгтӕ Мысырӕй куы рацыдысты, уӕдӕй нырмӕ ахӕм хабар никуыма ӕрцыди. Исты кӕнын хъӕуы!»