Фӕтӕгтӕ 17 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Ефремы хохыл цардис иу лӕг, йӕ ном — Миха.

² Иу хатт йӕ мадӕн афтӕ зӕгъы: «Мин ӕмӕ сӕдӕ шекелы дӕ ӕвзист куы фесӕфти, уӕд дын ӕз де ’лгъыст фехъуыстон. Уыцы ’хца мӕнӕ сты, ӕз сӕ райстон». Мад загъта: «Дунедарӕг арфӕ ракӕнӕд мӕ лӕппуйӕн!»

³ Ӕмӕ йын Миха мин ӕмӕ сӕдӕ шекелы ӕвзист фӕстӕмӕ куы радта, уӕд ын загъта: «Ацы ӕвзист мӕ лӕппуйы номыл нывонд кӕнын Дунедарӕгӕн. Уадз ӕмӕ дзы хуыцауы кӕрдгӕныв ӕмӕ джиппыуагъд гуымиры саразой».

⁴ Фӕлӕ йын уый йе ’взист фӕстӕмӕ радта. Мад згъӕртайынгӕнӕгмӕ дыууӕсӕдӕ шекелы ӕвзист радта, ӕмӕ дзы уый хуыцауы кӕрдгӕныв ӕмӕ джиппыуагъд гуымиры сарӕзта. Михайы хӕдзары сӕ сӕвӕрдтой.

⁵ Афтӕ Михамӕ фӕзынди йӕхи кувӕндон. Ефод ӕмӕ хӕдзарон хуыцаугӕндтӕ дӕр сарӕзта, сауджынӕй та сӕвӕрдта йӕ фырты.

⁶ Уыцы заман Израилы паддзах нӕ уыди, ӕмӕ алчидӕр кодта, цы йӕ фӕндыд, уый.

^7-8 Иудӕйы хӕдзарвӕндагӕй иу лӕппу, левит, уыцы заман царди иудейаг Вифлеемы ӕмӕ уырдыгӕй ног цӕрӕнбынат агурӕг ацыди. Ӕрбахӕццӕ ис Ефремы хохмӕ, Михайы хӕдзармӕ.

⁹ Миха йӕ бафарста: «Кӕцон дӕ?» Уый йын дзуапп радта: «Ӕз дӕн левит, иудейаг Вифлеемӕй, кӕм ӕрцӕрон, уый агурын».

¹⁰ Миха йын загъта: «Мӕнмӕ лӕуу, сауджынӕй мӕм кусдзынӕ, фыды хуызӕн мын суыдзынӕ. Азмӕ дын дӕс шекелы ӕвзист дӕтдзынӕн, уымӕй уӕлдай — дзаума ӕмӕ хӕринаг». Ӕмӕ левит Михамӕ баззади.

¹¹ Сразы ис Михайы хӕдзары цӕрыныл, ӕмӕ йын хъӕбулы ад скодта.

¹² Миха левиты сауджыны куыстыл бафтыдта, ӕмӕ йӕ хӕдзары царди.

¹³ Миха дзырдта: «Ныр ӕз фидарӕй ӕууӕндын, Дунедарӕг мыл кӕй ауды, ууыл, уымӕн ӕмӕ мӕ хӕдзары левит у сауджын».