Фӕтӕгтӕ 12 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Галаад ӕмӕ Ефремы хӕст

¹ Ефремы фӕдонтӕ ӕрӕмбырд сты, ӕрбацыдысты Цафоны сахармӕ ӕмӕ Йеффайӕн загътой: «Аммонӕгты ныхмӕ куы хӕцыдтӕ, уӕд махмӕ цӕуылнӕ фӕдзырдтай? Уый тыххӕй дын дӕ хӕдзар демӕ басудздзыстӕм».

² Йеффай сын дзуапп радта: «Ӕз мӕ адӕмимӕ аммонӕгты ныхмӕ карз тохы куы бацыдтӕн, уӕд уӕм сидтӕн, фӕлӕ мын нӕ баххуыс кодтат.

³ Уе ’ххуысмӕ уын ӕнхъӕлмӕ дзӕгъӕлы кӕсын, уый куы бамбӕрстон, уӕд мӕхӕдӕг, мӕ цардыл нӕ ауӕрдгӕйӕ, аммонӕгты ныхмӕ схӕцыдтӕн. Дунедарӕг мын сӕ мӕ къухмӕ радта. Уӕдӕ ныр мемӕ хӕцынвӕнд цӕмӕн скодтат?»

⁴ Йеффай Галаады ӕппӕт цӕрджыты ӕрӕмбырд кодта ӕмӕ Ефремы ныхмӕ схӕцыди. Галаадӕгтӕ ефремонты ныццагътой. Уыдон хъӕр кодтой: «Ефремонтӕ — лидзджытӕ! Галаад Ефрем ӕмӕ Менассиайы астӕу ис!» Уыцы ныхӕстӕм галаадӕгтӕн сӕ маст ссыгъди пиллон артау ӕмӕ ефремонты ӕфсад ныццагътой.

⁵ Галаадӕгтӕ Иорданы донуайӕнтӕ бацахстой. Чи аирвӕзт, уыцы ефремонтӕй-иу исчи доны фаллаг фарсмӕ бахизынмӕ куы хъавыд, уӕд-иу ӕй галаадӕгтӕ бафарстой: «Ефремон нӕ дӕ?» Уый-иу дзуапп радта: «Нӕ дӕн».

⁶ Галаадӕгтӕ йын-иу загътой: «Зӕгъ-ма уӕдӕ „шибболет“». Ефремонӕн-иу уыцы дзырд йӕ дзыхы нӕ бадти, ӕмӕ-иу «сибболет» загъта. Уӕд-иу ӕм фӕлӕбурдтой ӕмӕ-иу ӕй Иорданы донуайӕны раз амардтой. Уыцы заман ефремонтӕй амардӕуыд дыууӕ ӕмӕ дыууиссӕдз минмӕ ’ввахс.

⁷ Йеффай Израилы фӕтӕг уыди ӕхсӕз азы. Уый фӕстӕ амард, ӕмӕ йӕ бавӕрдтой Галаады, йӕхи хъӕуы.

Израилы фӕтӕгтӕ

⁸ Йеффайы фӕстӕ Израилы фӕтӕг сси Ивсан, Вифлеемы сахарӕй.

⁹ Уыди йын дӕс ӕмӕ ссӕдз фырты. Йӕ дӕс ӕмӕ ссӕдз чызджы моймӕ радта ӕмӕ йӕ фырттӕн дӕс ӕмӕ ссӕдз чызджы ӕрхаста. Авд азы дӕргъы Ивсан уыдис Израилы фӕтӕг.

¹⁰ Стӕй амард, ӕмӕ йӕ Вифлеемы бавӕрдтой.

¹¹ Йӕ фӕстӕ Израилы фӕтӕг сси Елон. Уый уыди Зевулоны хӕдзарвӕндагӕй. Елон Израилы фӕтӕг уыди дӕс азы дӕргъы.

¹² Стӕй амард, ӕмӕ йӕ баныгӕдтой Айалоны, Зевулоны зӕххыл.

¹³ Йӕ фӕстӕ Израилы фӕтӕг сси Хиллелы фырт Авдон, Пиратоны сахарӕй.

¹⁴ Уыдис ын дыууиссӕдз фырты ӕмӕ дӕс ӕмӕ ссӕдз фырты фырты. Алкӕмӕ дӕр дзы уыди фӕйнӕ хӕрӕджы. Аст азы дӕргъы Авдон уыди Израилы фӕтӕг.

¹⁵ Уый фӕстӕ Хиллелы фырт Авдон амарди, ӕмӕ йӕ баныгӕдтой Пиратоны, Амалекы хӕхты, Ефремы зӕххыл.