Фӕлхатгонд ӕгъдау 27 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Ӕгъдауы ныхӕстӕ — нывондхӕссӕны дуртыл

¹ Ӕмӕ, израилӕгты хистӕртӕ йемӕ, афтӕмӕй загъта адӕмӕн Моисей: «Абон уын ӕз цыдӕриддӕр фӕдзӕхсын, уыдон ӕххӕст кӕнут.

² Дунедарӕг, уӕ Хуыцау, сымахӕн кӕй дӕтты, уыцы бӕстӕм куы ахизат Иорданы фаллаг фарсмӕ, уӕд дзы стыр дуртӕ сӕвӕрут ӕмӕ сӕ чъырӕй сцӕгъдут.

³ Фаллаг фарсмӕ куы бахизат, Дунедарӕг, уӕ Хуыцау, сымахӕн кӕй дӕтты, ӕхсыр ӕмӕ мыд кӕцӕй хъары, уыцы зӕхмӕ бацӕуыны охыл, Дунедарӕг, уӕ фыдӕлты Хуыцау, сымахӕн зӕрдӕ куыд бавӕрдта, афтӕ, уӕд-иу сыл ацы Ӕгъдауы ныхӕстӕ иууылдӕр ныффыссут.

⁴ Иорданы фаллаг фарсмӕ куы ахизат, уӕд, цы дуртӕй уын зӕгъын, уыдон Эвалы хохы сӕр сӕвӕрут ӕмӕ сӕ чъырӕй сцӕгъдут.

⁵ Уыцы ран Дунедарӕгӕн, уӕ Хуыцауӕн, нывондхӕссӕн саразут, ӕфсӕйнаг кӕуыл нӕ андзӕвыди, ахӕм дуртӕй.

⁶ Ӕнӕвнӕлд дуртӕй скӕнут нывондхӕссӕн Дунедарӕгӕн, уӕ Хуыцауӕн, ӕмӕ йыл хӕссут иууылсудзинаг нывӕндтӕ Дунедарӕгӕн, уӕ Хуыцауӕн.

⁷ Фидыды нывӕндтӕ хӕссут ӕмӕ хӕрут, цин кӕнут Дунедарӕджы, уӕ Хуыцауы, раз.

⁸ Дзӕбӕх куыд зыной ӕмӕ сын ӕнцонӕй равзарӕн куыд уа, афтӕ ныффыссут дуртыл ацы Ӕгъдауы ныхӕстӕ».

⁹ Моисей, сауджын левиттӕ йемӕ, афтӕмӕй загъта ӕгас Израилӕн: «Лӕмбынӕг хъусут, израилӕгтӕ! Абон сымах баистут Дунедарӕджы, уӕ Хуыцауы, адӕм.

¹⁰ Хъусут уӕдӕ Дунедарӕгмӕ, уӕ Хуыцаумӕ, ӕмӕ ӕххӕст кӕнут, абон уын кӕй дзурын, Йӕ уыцы фӕдзӕхстытӕ ӕмӕ фӕтк».

Арфӕтӕ ӕмӕ ӕлгъыстытӕ дзурыны фӕтк

¹¹ Уыцы бон Моисей бафӕдзӕхста адӕмӕн:

¹² «Иорданы сӕрты куы ахизат, уӕд Симеон, Левий, Иудӕ, Иссахар, Йосеф ӕмӕ Бениамины мыггӕгтӕ хъуамӕ Геризимы хохыл ӕрлӕууой ӕмӕ адӕмӕн арфӕ ракӕной.

¹³ Рувим, Гад, Асир, Зевулон, Дан ӕмӕ Неффалимы мыггӕгтӕ та Эвалы хохыл хъуамӕ ӕрлӕууой ӕмӕ сӕ фелгъитой.

¹⁴ Левиттӕ хъуамӕ хъӕлӕсыдзагӕй ныхъхъӕр кӕной ӕмӕ фехъусын кӕной ӕппӕт израилӕгтӕн:

¹⁵ „Ӕлгъыст фӕуӕд, Дунедарӕгӕн ӕлгъаг чи у, ахӕм гуымиры чи сараза, ӕрмдӕсныйы конд гуымиры сусӕгӕй чи сӕвӕра, уый!“ Адӕм та иууылдӕр иумӕ зӕгъӕнт: „Аммен!“

¹⁶ „Ӕлгъыст фӕуӕд, йӕ фыды кӕнӕ йӕ мады чи бафхӕра, уый!“ Адӕм та иууылдӕр иумӕ зӕгъӕнт: „Аммен!“

¹⁷ „Ӕлгъыст фӕуӕд, йӕ сыхаджы арӕныл фалдӕр чи ахӕца!“ Адӕм та иууылдӕр иумӕ зӕгъӕнт: „Аммен!“

¹⁸ „Ӕлгъыст фӕуӕд, куырм адӕймаджы галиу фӕндагмӕ чи аздаха, уый!“ Адӕм та иууылдӕр иумӕ зӕгъӕнт: „Аммен!“

¹⁹ „Ӕлгъыст фӕуӕд, ӕрцӕуӕггаг, сидзӕр ӕмӕ сидзӕргӕсы бартӕ йӕ къӕхты бын чи кӕна, уый!“ Адӕм та иууылдӕр иумӕ зӕгъӕнт: „Аммен!“

²⁰ „Ӕлгъыст фӕуӕд, йӕ фыды усимӕ ӕмуат чи ӕрцӕуа, йӕ фыды чи фегад кӕна, уый!“ Адӕм та иууылдӕр иумӕ зӕгъӕнт: „Аммен!“

²¹ „Ӕлгъыст фӕуӕд, фосимӕ чи схуысса, уый!“ Адӕм та иууылдӕр иумӕ зӕгъӕнт: „Аммен!“

²² „Ӕлгъыст фӕуӕд, йӕ хӕрз хоимӕ кӕнӕ мадӕй иу, фыдӕй хицӕн, йе та фыдӕй иу, мадӕй хицӕн цы хоимӕ сты, уыимӕ ӕмуат чи ӕрцӕуа, уый!“ Адӕм та иууылдӕр иумӕ зӕгъӕнт: „Аммен!“

²³ „Ӕлгъыст фӕуӕд, йӕ усы мадимӕ ӕмуат чи ӕрцӕуа, уый!“ Адӕм та иууылдӕр иумӕ зӕгъӕнт: „Аммен!“

²⁴ „Ӕлгъыст фӕуӕд, сусӕгӕй искӕй чи амара!“ Адӕм та иууылдӕр иумӕ зӕгъӕнт: „Аммен!“

²⁵ „Ӕлгъыст фӕуӕд, искӕй амарын ӕмӕ ӕнаххос адӕймаджы туг ныккалыны тыххӕй гӕртам чи райса, уый!“ Адӕм та иууылдӕр иумӕ зӕгъӕнт: „Аммен!“

²⁶ „Ӕлгъыст фӕуӕд, ацы Ӕгъдау чи нӕ нымайа ӕмӕ йын йӕ алы ныхас дӕр чи не ’ххӕст кӕна, уый!“ Адӕм та иууылдӕр иумӕ зӕгъӕнт: „Аммен!“