Фӕлхатгонд ӕгъдау 23 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Дунедарӕджы размӕ цӕуӕн кӕмӕн ис ӕмӕ кӕмӕн нӕй

¹ Йӕ мӕхстӕттӕ хъыгдард кӕмӕн сты кӕнӕ йе ’рдон буар кӕмӕн ралыг чындӕуыд, уыцы нӕлгоймагӕн Дунедарӕджы размӕ бацӕуӕн нӕй.

² Дзӕгъӕлзадӕн Дунедарӕджы размӕ бацӕуӕн нӕй, йӕ байзӕддӕгтӕн дӕр нӕй бацӕуӕн Дунедарӕджы размӕ, суанг дӕс фӕлтӕры кӕрӕдзийы куы аивой, уӕд дӕр.

³ Аммонӕгтӕ ӕмӕ моавӕгтӕн никуы уыдзӕн Дунедарӕджы размӕ бацӕуӕн, суанг сӕ байзӕддӕгты дӕс фӕлтӕры кӕрӕдзийы куы аивой, уӕд дӕр,

⁴ уымӕн ӕмӕ уын уыдон, Мысырӕй куы рацыдыстут, уӕд фӕндагыл сӕ къӕбӕр ӕмӕ сӕ дон бахӕлӕг кодтой, стӕй ма уыимӕ Арам-Нахараимаг Петоры цӕрӕг Балаамы, Беоры фырты дӕр баххуырстой, цӕмӕй уӕ ралгъита.

⁵ Фӕлӕ Дунедарӕг, уӕ Хуыцау, нӕ байхъуыста Балааммӕ, йе ’лгъыст ын арфӕмӕ раздӕхта, уымӕн ӕмӕ Дунедарӕг, уӕ Хуыцау, уарзы сымах.

⁶ Уымӕ гӕсгӕ сын цӕргӕбонты хорзӕй мацы ракӕнут.

⁷ Едомагыл уӕхи ма атигъ кӕнут: уый уе ’фсымӕр у. Мысырагыл уӕхи ма атигъ кӕнут: йӕ бӕстӕйы ӕрцӕуӕггаг уыдыстут.

⁸ Уыдонӕн сӕ байзӕддӕгты ӕртыккаг фӕлтӕрӕн Дунедарӕджы размӕ бацӕуӕн уыдзӕн.

Рӕсӕнуаты сыгъдӕгдзинады тыххӕй

⁹ Уе знӕгты ныхмӕ хӕстмӕ куы рацӕуат, уӕд уӕхи хъахъхъӕнут фӕчъизийӕ.

¹⁰ Исчи уӕ ӕхсӕвы йӕхи фӕчъизи кодта, зӕгъгӕ, уӕд рӕсӕнуатӕй рацӕуӕд ӕмӕ фӕстӕмӕ ма баздӕхӕд —

¹¹ изӕрӕрдӕм хъуамӕ йӕхи ӕрӕхса, ӕмӕ йын хурныгуылды фӕстӕ рӕсӕнуатмӕ бацӕуӕн уыдзӕн.

¹² Рӕсӕнуаты ӕдде уын, уӕхи хъуыдыйы кӕдӕм цӕуат, ахӕм бынат хъуамӕ уа.

¹³ Хӕцӕнгарзӕй уӕлдай ма уӕ алкӕмӕ дӕр хъуамӕ уа бел дӕр, цӕмӕй, ӕддӕмӕ куы ацӕуай, уӕд уый фӕстӕ дзыхъхъ скъахай ӕмӕ дӕ фаджыстӕ уым баныгӕнай.

¹⁴ Дунедарӕг, уӕ Хуыцау, рӕсӕнуаты ис уемӕ, цӕмӕй уӕ хъахъхъӕна, ӕмӕ уе знӕгтыл уӕлахиз кӕнат. Уымӕ гӕсгӕ уӕ рӕсӕнуат сыгъдӕг хъуамӕ уа, цӕмӕй уын уӕ худинаг ма фена ӕмӕ уыл Йӕхи ма атигъ кӕна.

¹⁵ Искӕй цагъар йӕ хицауӕй сымахмӕ йӕ сӕр куы бафснайа, уӕд ӕй йӕ хицауӕн ма схъӕр кӕнут.

¹⁶ Уадз ӕмӕ уе ’хсӕн, уӕ сахартӕй иуы, кӕм ӕй фӕнда, уым цӕра. Ма йӕ ’фхӕрут.

Кувӕндоны хъахбай

¹⁷ Израилаг сылыстӕгӕй хъахбай мачи уӕд, израилаг нӕлгоймӕгтӕй кувӕндоны хъахбай мачи уӕд!

¹⁸ Хӕтаг сылы ӕфтиаг дӕр ӕмӕ куыдзы аргъ дӕр мацы сомымӕ гӕсгӕ бахӕсс Дунедарӕджы, дӕ Хуыцауы, хӕдзармӕ. Сӕ дыууӕ дӕр ӕлгъаг сты Дунедарӕгӕн, дӕ Хуыцауӕн.

Пайдайыл ӕфстау дӕттӕн нӕй

¹⁹ Ӕхца, хойраг кӕнӕ ӕндӕр исты де ’фсымӕрӕн уӕлӕмхасӕн ӕфтиагыл ӕфстау ма дӕтт.

²⁰ Ӕндӕр искӕмӕй, дӕ бон у, исай уӕлӕмхасӕн ӕфтиаг, фӕлӕ дӕхи ’фсымӕрӕй ма ис, цӕмӕй Дунедарӕгӕй, дӕ Хуыцауӕй, арфӕгонд уа дӕ къухвӕллойӕ алцыдӕр, кӕдӕм раст кӕныс ӕмӕ дӕхи кӕй бакӕндзынӕ, уыцы бӕстӕйы.

Сомыты тыххӕй

²¹ Дунедарӕгӕн, дӕ Хуыцауӕн, истӕй тыххӕй куы басомы кӕнай, уӕд ӕй ӕнӕмӕнг сӕххӕст кӕн, уымӕн ӕмӕ дын ӕй Уый нӕ ныббардзӕн, тӕригъӕд дын фидгӕ уыдзӕн.

²² Дзырд куынӕ раттай, уӕд та дыл ницы тӕригъӕд уыдзӕн.

²³ Зӕрдаивӕй мацы дзур. Дунедарӕгӕн, дӕ Хуыцауӕн, истӕй тыххӕй куы басомы кӕнай, уӕд-иу дӕ сомы сӕххӕст кӕн: барвӕндонӕй радтай дзырд.

Цӕуӕджы хай

²⁴ Искӕй сӕндонмӕ куы бацӕуай, уӕд сӕнӕфсир, цас дӕ хъӕуы, уый бӕрц бахӕр, фӕлӕ дзы дӕ чыргъӕды ма нывӕр.

²⁵ Искӕй хуыммӕ куы бацӕуай, уӕд ын йе ’фсиртӕй дӕхицӕн ратон, фӕлӕ кӕйдӕр тыллӕгмӕ ӕхснырф ма сис.