Фӕлхатгонд ӕгъдау 18 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Сауджын левитты хай

¹ Сауджын левиттӕн, Левийы хӕдзарвӕндагӕн ӕмткӕй, иннӕ израилӕгтӕй хъауджыдӕр, хай нӕ уыдзӕн, бынтӕ сын нӕ баззайдзӕн: Дунедарӕджы хуынтӕй цӕрдзысты, уыдон сты сӕ хай.

² Левийы мыггагӕн хай нӕ уыдзӕн се ’фсымӕрты ’хсӕн. Дунедарӕг сын зӕрдӕ куыд бавӕрдта, афтӕмӕй Йӕхӕдӕг у уыдонӕн сӕ хай.

³ Стур кӕнӕ лыстӕг фосы кусартӕн йӕ базыг, ӕфсӕр ӕмӕ ахсӕн уагӕвӕрдмӕ гӕсгӕ сауджынтӕм хауынц, ӕмӕ сӕ алчидӕр хъуамӕ уыдонӕн дӕтта.

⁴ Хор, сӕн, сой ӕмӕ къуымбилы сӕртӕ дӕр уыдонӕн дӕтгӕ сты.

⁵ Уымӕн ӕмӕ ӕппӕт мыггӕгты ’хсӕн уыдоны равзӕрста Дунедарӕг, дӕ Хуыцау, цӕмӕй Йын уырдыг лӕууой ӕмӕ Йӕ номы сӕраппонд лӕггад кӕной сӕ тъымы-тъымамӕ.

⁶ Израилы сахартӕй кӕцыфӕндыйы цӕрӕг левит дӕр, Дунедарӕг Йӕ номыл цы бынат равзӕрста, уырдӕм йӕ зӕрдӕйы фӕндонмӕ гӕсгӕ куы бацӕуа

⁷ ӕмӕ, уым Дунедарӕгӕн уырдыг чи лӕууы, уыцы левиттау, йе ’фсымӕртау, лӕггад куы кӕна Дунедарӕгӕн, дӕ Хуыцауӕн,

⁸ уӕд ын уыдонимӕ ӕмхуызон хай ис, йӕ фыды бынтӕ йын цӕрынваг куы кӕной, уӕд дӕр.

Кӕлӕнгӕнджытӕ ӕмӕ дӕсныты ныхмӕ

⁹ Дунедарӕг, уӕ Хуыцау, сымахӕн цы бӕстӕ дӕтты, уырдӕм куы бацӕуат, уӕд уымы адӕмты ӕлгъаг митӕ ма бафӕзмут.

¹⁰ Ма уӕд уе ’хсӕн: йӕ фырты кӕнӕ йӕ чызджы арты нывондӕн чи ӕрхӕсса, ахӕмтӕ; дӕсныфӕрсджытӕ, хингӕнджытӕ, кӕлӕнгӕнджытӕ;

¹¹ куырысдзаутӕ, мӕрдтӕмсидджытӕ, мӕрдты удтӕй сӕ фӕрстытӕн дзуапп домджытӕ.

¹² Уымӕн ӕмӕ ӕлгъаг у Дунедарӕгӕн ахӕм адӕймаг. Уыдӕтты тыххӕй байсдзӕни Дунедарӕг, уӕ Хуыцау, ацы зӕхх ӕндӕр адӕмтӕй ӕмӕ йӕ сымахӕн ратдзӕн.

¹³ Ӕнӕкъӕм ут Дунедарӕджы, уӕ Хуыцауы раз!

¹⁴ Уымӕн ӕмӕ, уӕхи кӕй зӕхх бакӕндзыстут, уыцы адӕмтӕ дӕснытӕ ӕмӕ кӕлӕнгӕнджытӕм хъусынц, сымахӕн та Дунедарӕг, уӕ Хуыцау, ахӕм бар нӕ дӕтты.

Дунедарӕг рарвитдзӕн Моисейы хуызӕн пехуымпары

¹⁵ Мӕн куыд сӕвӕрдта Дунедарӕг, уӕ Хуыцау, афтӕ уын уе ’фсымӕртӕй иуы скӕндзӕни пехуымпар, ӕмӕ-иу уымӕ хъусут.

¹⁶ Сымах ӕмбырдӕй Хоревы рӕбын Дунедарӕгӕй, уӕ Хуыцауӕй, цыдӕриддӕр домдтат, уыдӕттӕ сӕххӕст уыдзысты. Загътат: „Куынӕуал фехъусиккам Дунедарӕджы, нӕ Хуыцауы, хъӕлӕс, куынӕуал фениккам уыцы стыр арт, ӕндӕра нын ӕнӕ мӕлгӕ нӕ уыдзӕн!“

¹⁷ Ӕмӕ мын Дунедарӕг загъта: „Афтӕ кӕй загътой, уый хорз у.

¹⁸ Сӕхи ’хсӕнӕй сын сӕвӕрдзынӕн Ӕз дӕ хуызӕн пехуымпары. Йӕ комы йын Мӕ ныхӕстӕ бавӕрдзынӕн, ӕмӕ йын Ӕз цыдӕриддӕр зӕгъон, уыдӕттӕ дзурдзӕн.

¹⁹ Уыцы пехуымпар Мӕ номӕй цы дзура, уыдӕттӕм чи нӕ байхъуса, уымӕн Ӕз Мӕхӕдӕг тӕрхон кӕндзынӕн.

²⁰ Фӕлӕ пехуымпар, Ӕз кӕй нӕ загътон, уыцы ныхас Мӕ номӕй кӕнӕ ӕндӕр хуыцӕутты номӕй дзурын куы бауӕнда, уӕд ӕй марын хъӕуы“.

²¹ Чи зоны, ды дӕхинымӕр зӕгъай: „Ӕмӕ куыд базондзыстӕм мах, Дунедарӕгӕй чи нӕ рацыди, уыцы ныхас?“

²² Пехуымпар Дунедарӕджы номӕй кӕй зӕгъа, уыцы ныхас куынӕ ӕрцӕуа ӕмӕ куынӕ сӕххӕст уа, уӕд йӕ ныхас Дунедарӕгӕй нӕ рацыд, фӕлӕ йӕ пехуымпар къӕйныхӕй загъта йӕхӕдӕг, ма дзы тӕрс.