Езекиел 48 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Мӕнӕ Израилы хӕдзарвӕндӕгты нӕмттӕ. Цӕгатаг арӕныл скӕсӕйнаг арӕнӕй ныгуылӕнӕрдӕм, Стыр денджызы онг, йӕхи айтыгъта Даны хӕдзарвӕндаджы хай — иу хай. Ауылты Дамаскы цӕгатаг арӕнӕй цӕуы фӕндаг Хетлонмӕ, Хаматмӕ ӕмӕ Хацар-Энанмӕ.

² Даны хӕдзарвӕндаджы ӕмарӕн, скӕсӕнӕй ныгуылӕнмӕ, ис Асиры хӕдзарвӕндаджы хай — иу хай.

³ Асиры хӕдзарвӕндаджы ӕмарӕн, скӕсӕнӕй ныгуылӕнмӕ, ис Неффалимы хӕдзарвӕндаджы хай — иу хай.

⁴ Неффалимы хӕдзарвӕндаджы ӕмарӕн, скӕсӕнӕй ныгуылӕнмӕ, ис Менассиайы хӕдзарвӕндаджы хай — иу хай.

⁵ Менассиайы хӕдзарвӕндаджы ӕмарӕн, скӕсӕнӕй ныгуылӕнмӕ, ис Ефремы хӕдзарвӕндаджы хай — иу хай.

⁶ Ефремы хӕдзарвӕндаджы ӕмарӕн, скӕсӕнӕй ныгуылӕнмӕ, ис Рувимы хӕдзарвӕндаджы хай — иу хай.

⁷ Рувимы хӕдзарвӕндаджы ӕмарӕн, скӕсӕнӕй ныгуылӕнмӕ, ис Иудӕйы хӕдзарвӕндаджы хай — иу хай.

⁸ Иудӕйы хӕдзарвӕндаджы ӕмарӕн уыдзӕни уаз зӕххы хай; цӕгатӕй хуссарӕрдӕм йӕ уӕрх — фондз ӕмӕ ссӕдз мин ӕлмӕрины, йӕ дӕргъ та скӕсӕнӕй ныгуылӕнӕрдӕм — иннӕ зӕххы хӕйтты хуызӕн. Йӕ астӕу уыдзӕни Кувӕндон.

⁹ Дунедарӕгӕн-иу рауӕлдай кӕнут, йӕ дӕргъ фондз ӕмӕ ссӕдз мин ӕлмӕрины кӕмӕн уа, йӕ уӕрх та — дӕс мин ӕлмӕрины, ахӕм зӕххы хай.

¹⁰ Ацы уаз зӕхх у сауджынты хай; цӕгатӕрдӕм дӕргъмӕ у фондз ӕмӕ ссӕдз мин ӕлмӕрины, ныгуылӕнӕрдӕм та уӕрхмӕ у дӕс мин ӕлмӕрины; скӕсӕнӕрдӕм уӕрхмӕ у дӕс мин ӕлмӕрины, хуссарӕрдӕм та дӕргъмӕ — фондз ӕмӕ ссӕдз мин ӕлмӕрины. Йӕ астӕу уыдзӕни Дунедарӕджы Кувӕндон.

¹¹ Уый-иу рауӕлдай кӕнут сауджынтӕн, Цадокы байзӕддагӕй чи у, Мӕ Кувӕндоны Мын уазлӕггад чи кодта, уыдонӕн. Израилӕгтӕ Мӕ куы ныууагътой, уӕд мыл адон иннӕ левиттау сӕхи нӕ атигъ кодтой.

¹² Ӕмӕ уымӕ гӕсгӕ уаз зӕххӕй райсдзысты ацы иууылуаз хай, левитты арӕныл.

¹³ Левиттӕ дӕр сауджынты ӕмарӕн райсдзысты хай, йӕ дӕргъ — фондз ӕмӕ ссӕдз мин ӕлмӕрины, йӕ уӕрх та — дӕс мин ӕлмӕрины.

¹⁴ Уыцы хайӕ сын нӕдӕр ауӕйгӕнӕн уыдзӕни, нӕдӕр баивӕн. Уый уыцы зӕххӕн йӕ хуыздӕр хай у, ӕмӕ хъуамӕ къухӕй-къухмӕ ма цӕуа, уымӕн ӕмӕ уый у Дунедарӕджы уаз хай.

¹⁵ Иннӕ зӕххы хай, йӕ уӕрх фондз мин ӕлмӕрины кӕмӕн у, йӕ дӕргъ та — дыууын фондз мин ӕлмӕрины, уый у сахарӕн лӕвӕрд. Уыдзӕнис иумӕйаг, уазыл нымад нӕ уыдзӕн, цӕмӕй дзы адӕм ӕрцӕрой. Уым уыдзысты сахарӕн йӕ уӕтӕртӕ дӕр. Сахар йӕхӕдӕг та уыдзӕнис астӕуӕй.

¹⁶ Мӕнӕ сахарӕн йӕ ас, уӕрхмӕ дӕр ӕмӕ дӕргъмӕ дӕр: йӕ цӕгатварс — цыппар мин фондзсӕдӕ ӕлмӕрины, йӕ хуссарварс дӕр — цыппар мин фондзсӕдӕ ӕлмӕрины, йе скӕсӕнварс дӕр — цыппар мин фондзсӕдӕ ӕлмӕрины, йӕ ныгуылӕнварс дӕр — цыппар мин фондзсӕдӕ ӕлмӕрины.

¹⁷ Сахарӕн йӕ уӕтӕрты фӕтӕн цӕгатӕрдӕм у дыууӕсӕдӕ фӕндзай ӕлмӕрины, скӕсӕнӕрдӕм дӕр — дыууӕсӕдӕ фӕндзай ӕлмӕрины, хуссарӕрдӕм дӕр — дыууӕсӕдӕ фӕндзай ӕлмӕрины, ныгуылӕнӕрдӕм дӕр — дыууӕсӕдӕ фӕндзай ӕлмӕрины.

¹⁸ Уаз зӕххы ныхмӕ скӕсӕнӕрдӕм ис дӕс мин ӕлмӕрины дӕргъӕн хай, ныгуылӕнӕрдӕм дӕр — афтӕ. Уыцы зӕххыты тыллӕг уыдзӕни сахары цӕрджыты, фӕллойгӕнджыты, хӕлц.

¹⁹ Зӕххытӕм хъуамӕ зилой сахары цӕрджытӕ — Израилы ӕппӕт хӕдзарвӕндӕгты минӕвӕрттӕ.

²⁰ Уаз зӕхх ӕмӕ сахары зӕххисбоны ӕппӕт фӕзахст у ӕмхуызон цыппаркъуымон — дыууӕрдӕм дӕр фӕйнӕ дыууын фондз мин ӕлмӕрины.

^21-22 Ацы фӕзахсты фӕйнӕфарс зӕххытӕ — скӕсӕнӕрдӕм Иорданы онг, ныгуылӕнӕрдӕм та денджызы онг — сты фӕтӕджы хай. Дыууӕрдӕм дӕр сӕ уӕрх — дыууын фондз мин ӕлмӕрины. Афтӕмӕй, Иудӕйы хӕдзарвӕндаджы зӕххисбон ӕмӕ Бениамины хӕдзарвӕндаджы зӕххисбоны ’хсӕн цыдӕриддӕр зӕххытӕ ис, Кувӕндоны зӕххытӕ, левитты зӕххытӕ ӕмӕ сахары зӕххытӕ рахицӕн кӕнгӕйӕ, уыдон сты фӕтӕджы хай.

²³ Иннӕ хӕдзарвӕндӕгты хӕйттӕй, скӕсӕнӕй ныгуылӕнмӕ, иу у Бениамины хӕдзарвӕндаджы хай.

²⁴ Бениамины хӕдзарвӕндаджы ӕмарӕн, скӕсӕнӕй ныгуылӕнмӕ, ис Симеоны хӕдзарвӕндаджы хай — иу хай.

²⁵ Симеоны хӕдзарвӕндаджы ӕмарӕн, скӕсӕнӕй ныгуылӕнмӕ, ис Иссахары хӕдзарвӕндаджы хай — иу хай.

²⁶ Иссахары хӕдзарвӕндаджы ӕмарӕн, скӕсӕнӕй ныгуылӕнмӕ, ис Зевулоны хӕдзарвӕндаджы хай — иу хай.

²⁷ Зевулоны хӕдзарвӕндаджы ӕмарӕн, скӕсӕнӕй ныгуылӕнмӕ, ис Гады хӕдзарвӕндаджы хай — иу хай.

²⁸ Гады хӕдзарвӕндаджы ӕмарӕн ис Негев, йӕхи айтыгъта сахар Тамарӕй Мериват-Кадешы доны онг, стӕй дон-дон — суанг Стыр денджызы онг.

²⁹ Гъе уый у, Израилы хӕдзарвӕндӕгтӕн халӕппӕрстӕй кӕй байуардзыстут, уыцы зӕхх, сӕ зӕххы хӕйттӕ, — зӕгъы Дунедарӕг Хуыцау.

Йерусалимы кулдуӕрттӕ ӕмӕ йӕ ног ном

^30-31 Мӕнӕ сахары кулдуӕрттӕ, ис сын Израилы хӕдзарвӕндӕгты нӕмттӕ. Цӕгатӕрдыгӕй — ам сахары дӕргъ у цыппар мины ӕмӕ фондзсӕдӕ ӕлмӕрины — ис ӕртӕ кулдуары: Рувимы кулдуар, Иудӕйы кулдуар ӕмӕ Левийы кулдуар.

³² Скӕсӕнӕрдыгӕй — ам дӕр сахары дӕргъ у цыппар мины ӕмӕ фондзсӕдӕ ӕлмӕрины — ис ӕртӕ кулдуары: Йосефы кулдуар, Бениамины кулдуар ӕмӕ Даны кулдуар.

³³ Хуссарӕрдыгӕй — ам дӕр сахары дӕргъ у цыппар мины ӕмӕ фондзсӕдӕ ӕлмӕрины — ис ӕртӕ кулдуары: Симеоны кулдуар, Иссахары кулдуар ӕмӕ Зевулоны кулдуар.

³⁴ Денджызы ’рдыгӕй — ам дӕр сахары дӕргъ у цыппар мины ӕмӕ фондзсӕдӕ ӕлмӕрины — ис ӕртӕ кулдуары: Гады кулдуар, Асиры кулдуар ӕмӕ Неффалимы кулдуар.

³⁵ Сахары алыварс ӕдӕппӕтӕй у ӕстдӕс мин ӕлмӕрины. Йӕ ном фидӕны уыдзӕни: «Дунедарӕг уым ис».