Езекиел 32 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Хъарӕг фараон ӕмӕ Мысырыл

¹ Дыууадӕсӕм азы дыууадӕсӕм мӕйӕн йӕ фыццаг бон мын Дунедарӕг загъта:

² «Адӕймаджы фырт! Ныхъхъарӕг кӕн фараоныл, Мысыры паддзахыл: „Адӕмты ’хсӕн ды уыдтӕ домбайы лӕппынау, денджызы кӕфхъуындарау, дӕ цӕугӕдӕтты-иу фынк калдтай дӕ фындзӕй, дӕ дзӕмбытӕй-иу дӕттӕ сызмӕстай, ӕмӕ-иу фестадысты лакъон“.

³ Афтӕ зӕгъы Дунедарӕг Хуыцау: бирӕ адӕмты раз дыл Мӕ ахсӕн хыз баппардзынӕн, ӕмӕ дӕ уыдон ӕрцахсдзысты Мӕ хызы.

⁴ Ӕз дӕ тыгъд быдыры фехсдзынӕн зӕххыл, ӕмӕ-иу дыл ӕрбаддзысты алы тӕхгӕ мӕргътӕ, сӕхи дӕ ӕфсаддзысты алы хъӕддаг сырдтӕ.

⁵ Дӕ холыйы фыд дын ныппырх кӕндзынӕн хӕхтыл, байдзаг дзы кӕндзынӕн дӕлвӕзтӕ.

⁶ Зӕхх бафсаддзынӕн дӕ тугӕй, уый анхъӕвздзӕни суанг хӕхты онг, байдзаг дзы уыдзысты мӕсчъытӕ.

⁷ Куы бабын уай, уӕд Ӕз сӕхгӕндзынӕн арв, стъалытӕ бамынӕг кӕндзынӕн, хур мигъы аууон бакӕндзынӕн, ӕмӕ мӕй дӕр нал ратдзӕн йӕ рухс.

⁸ Дӕ сӕрмӕ арвыл цыдӕриддӕр рухсгӕнӕнтӕ ис, уыдон батар кӕндзынӕн ӕмӕ зӕххыл саудалынг бафтаудзынӕн, — зӕгъы Дунедарӕг Хуыцау.

⁹ Дӕ сӕфты хабар дын куы айхъуысын кӕнон, уӕд ӕвирхъау тасы бацӕудзысты бирӕ адӕмтӕ, суанг йӕ кой кӕмӕн никуы фехъуыстай, уыдон дӕр.

¹⁰ Фыд тас сыл бахӕцдзӕн, сӕ паддзӕхтӕ дӕр фыр тӕссӕй риздзысты, Мӕ кардӕй сӕм куы февзидон, уӕд. Дӕ сӕфты бон сӕ алчидӕр тӕрсдзӕни йӕ удӕн.

¹¹ Дунедарӕг Хуыцау афтӕ зӕгъы: Вавилоны паддзах йӕ кард сисдзӕни дӕ ныхмӕ.

¹² Тыхгӕнджыты кардӕй бабын уыдзысты дӕ адӕм. Уыдон сты адӕмты фыддӕртӕ ӕмӕ бабын кӕндзысты Мысыры ӕфсад, сӕрыстыр кӕмӕй у, уый. Йӕ адӕм иууылдӕр цагъды фӕуыдзысты.

¹³ Ӕз ын йӕ бирӕ фос ныццӕгъддзынӕн Нилы былгӕрӕтты, ӕмӕ йын йӕ дӕттӕ налдӕр лӕджы къах змӕнтдзӕн, налдӕр фосы сӕфтӕг.

¹⁴ Афтӕмӕй Нилы донӕн Ӕз ратдзынӕн ӕнцой, ӕмӕ йӕ дӕттӕ акӕлдзысты сойау, — зӕгъы Дунедарӕг Хуыцау. —

¹⁵ Мысыры зӕхх куы федзӕрӕг кӕнон, йе ’ппӕт адӕмы дӕр ын куы ныддӕрӕн кӕнон ӕмӕ йӕ ис-бисӕй ӕнӕхай куы фӕуа, уӕд базондзысты, Ӕз Дунедарӕг кӕй дӕн, уый.

¹⁶ Уӕд скӕндзысты хъарӕг, ӕмӕ-иу уыцы хъарӕг сисдзысты алы адӕмты сылгоймӕгтӕ. Хъарӕг кӕндзысты Мысырыл ӕмӕ йӕ бирӕ адӕмыл, — зӕгъы Дунедарӕг Хуыцау».

¹⁷ Дыууадӕсӕм азы дыууадӕсӕм мӕйӕн йӕ фынддӕсӕм бон мын Дунедарӕг загъта:

¹⁸ «Адӕймаджы фырт! Ныхъхъарӕг кӕн, ныронг чи фӕмарди, уыдонау дӕлдзӕхмӕ ныххауинӕгтыл — Мысыры адӕмыл ӕмӕ иннӕ хъомысджын адӕмты чызджытыл.

¹⁹ Кӕмӕй уӕлдӕр дӕ ды? Ныххау дӕлдзӕхмӕ ӕмӕ уым ӕнӕсунӕтты раз ӕрхуысс!

²⁰ Карды амӕттаг чи баци, уыдонау ды дӕр ӕрхуысдзынӕ сӕ цуры. Ныридӕгӕн цӕттӕ у кард — бабын уӕд фараон йе ’ппӕт ӕрдонгтимӕ!

²¹ Мӕрдтыбӕстӕйы уымӕн дӕр ӕмӕ йӕ цӕдисонтӕн дӕр фидистӕ куы кӕндзысты хъомысджын хӕстонтӕ. Мысырӕгтӕ карды амӕттаг куы бауыдзысты, ӕрхуысдзысты ӕнӕсунӕтты раз.

²² Уым — Ассири йе ’ппӕт ӕфсадимӕ, йӕ алыварс — йӕ хӕстонты цыртытӕ, иууылдӕр куы бабын сты кардӕй.

²³ Ассирийы цыртытӕ — мӕрдтыбӕстӕн суанг йӕ тӕккӕ арфы, йӕ цырты алыварс — йе ’ппӕт ӕфсад; уӕлӕуыл стыр тас чи ӕфтыдта, уыдон иууылдӕр куы бабын сты кардӕй.

²⁴ Уым — Елам йе ’ппӕт ӕфсӕдтимӕ йӕ цырты алыварс; дӕлдзӕхмӕ ӕнӕсунӕтӕй чи ныццыд, уӕлӕуыл стыр тас чи ӕфтыдта, уыдон иууылдӕр куы бабын сты кардӕй; дӕлдзӕхмӕ чи ныццыди, уыдонимӕ дих кӕнынц сӕ худинаг.

²⁵ Кӕй амардӕуыд, уыдоны раз Еламӕн рардӕуыди хуыссӕн йе ’ппӕт ӕфсӕдтимӕ, йӕ алыварс — сӕ цыртытӕ; иууылдӕр — ӕнӕсунӕттӕ, карды амӕттӕгтӕ. Уӕлӕуыл цардудтыл ӕвирхъау тас ӕфтыдтой ӕмӕ ныр, дӕлдзӕхмӕ чи ныццыди, уыдонимӕ дих кӕнынц сӕ худинаг, уыдоны ’хсӕн сӕ сӕвӕрдтой.

²⁶ Уым — Мешех ӕмӕ Тувал се ’ппӕт ӕрдонгтимӕ, сӕ алыварс — сӕ цыртытӕ; иууылдӕр — ӕнӕсунӕттӕ, карды амӕттӕгтӕ, уымӕн ӕмӕ уӕлӕуыл ӕвирхъау тас ӕфтыдтой цардудтыл.

²⁷ Уыдонӕн дӕр сӕ хъысмӕт — ӕнӕсунӕт хӕстонты раз ӕрхуыссын, ӕд хотыхтӕ мӕрдтыбӕстӕм чи ныццыд, сӕ кӕрдтӕ сӕ нывӕрзӕн кӕмӕн сты, сӕ уартытӕ се стджытыл кӕмӕн равӕрдтой. Кӕддӕр та уыдон уӕлӕуыл ӕвирхъау тас ӕфтыдтой цардудтыл.

²⁸ Ды дӕр ӕрцӕудзынӕ ӕнӕсунӕттау сӕфт, карды амӕттаг чи баци, уыдоны раз ӕрхуысдзынӕ.

²⁹ Уым дӕм ӕнхъӕлмӕ кӕсы Едом йӕ паддзӕхтӕ ӕмӕ йе ’ппӕт ӕлдӕрттимӕ, карды амӕттаг чи баци, уыцы хъӕбатыр хӕстонтимӕ. Уым хуыссынц, мӕрдтыбӕстӕм чи ныццыди, уыцы ӕнӕсунӕтты раз.

³⁰ Уым дӕм ӕнхъӕлмӕ кӕсынц цӕгаты барджын ӕлдӕрттӕ иууылдӕр, стӕй ӕппӕт сидойнӕгтӕ. Уыдон дӕр — хъӕбатыр хӕстонтӕ, уӕлӕуыл цардудтыл ӕфтыдтой стыр тас ӕмӕ, кӕй амардӕуыд, уыдонимӕ ныццыдысты дӕлдзӕхмӕ, уым, карды амӕттаг чи баци, уыдонимӕ дих кӕнынц сӕ худинаг.

³¹ Фараон сӕ фендзӕн ӕмӕ нал хъынцъым кӕндзӕн йӕ бирӕ адӕмыл. Карды амӕттаг бауыдзысты фараон ӕмӕ йе ’ппӕт ӕфсад, — зӕгъы Дунедарӕг Хуыцау. —

³² Уӕлӕуыл цардудты Ӕз бауадздзынӕн фыд тас, фараон ӕмӕ йӕ бирӕ адӕм та ӕвӕрд ӕрцӕудзысты ӕнӕсунӕтты раз, карды цӕфӕй чи фӕмарди, уыдоны раз», — зӕгъы Дунедарӕг Хуыцау.